សារព័ត៌មាន នគរវត្ត តែងតែនាំមុខគេជានិច្ច
ក្រសួងការពារជាតិជប៉ុនត្រូវគេរាយការណ៍ថា មានគម្រោងចំណាយប្រាក់រហូតដល់២៤០ពាន់លានដុល្លារក្នុងរយៈពេល៥ឆ្នាំខាងមុខ ទៅលើវិស័យការពារជាតិ ក្នុងនោះផ្តោតលើការទិញសព្វាវុធបន្ថែមពីអាមេរិកផងដែរ ។
កាសែត Nikkei Business Dailyបានផ្សាយថា គម្រោងចំណាយនេះ ស្របតាមការប្រកួតប្រជែងផ្នែកសន្តិសុខ ក៏ដូចធ្វើឲ្យល្អប្រសើរផ្នែកសេដ្ឋកិច្ចជាមួយអាមេរិកខណៈត្រូវទិញអាវុធពីប្រទេសនេះ ។
ប្រភពខាងលើបានផ្សាយកាលពីថ្ងៃទី៧ ខែធ្នូ ថា ក្រសួងការពារជាតិជប៉ុន ឡើងគម្រោងចំណាយយ៉ាងតិច២៧ សែនកោដិ យេន ( trillion yen) ប្រហាក់ប្រហែល២៤០ពាន់លានដុល្លារអាមេរិក ចន្លោះពីខែមេសា ឆ្នាំ២០១៩ ដល់ខែមីនា ឆ្នាំ២០២៤ ដែលជាការចំណាយមួយ កើនឡើងគិតជាមធ្យមភាគ ១.១ភាគរយប្រចាំឆ្នាំ ខណៈការចំណាយលើកមុន គិតជាមធ្យមភាគ មានតែ០.៨ភាគរយ ដែលត្រូវផុតបញ្ចប់នៅខែមីនា ឆ្នាំ២០១៩ ។
បច្ចុប្បន្នការចំណាយទៅលើសព្វាវុធ និងកម្លាំងយោធា គឺមានសរុប៨០ភាគរយនៃគម្រោងការពារជាតិដែលបានអនុម័ត ។ ប៉ុន្តែគម្រោងថ្មី ចំណាយទៅលើសព្វាវុធគឺដាច់ដោយឡែក ធ្វើឲ្យងាយស្រួលទិញអាវុធពីអាមេរិក ។
នៅពាក់កណ្តាលខែធ្នូ ឆ្នាំ២០១៨នេះ រដ្ឋសភាជប៉ុននឹងបោះឆ្នោតសម្រេចថា តើយល់ព្រម ឬក៏អត់ ទៅលើគម្រោងរបស់រដ្ឋាភិបាលខាងលើនេះ ។
ទិញអាវុធដែលផលិតដោយអាមេរិកនេះ អាចជួយឲ្យជប៉ុនចៀសផុតពីការប៉ះទង្គិចពាណិជ្ជកម្មជាមួយទីក្រុងវ៉ាស៊ីនតោន ខណៈប្រធានាធិបតីអាមេរិក ដូណាល់ ត្រាំ ជំរុញជប៉ុនឲ្យទិញទំនិញអាមេរិកបន្ថែម ក្នុងនោះមានឧបករណ៍យោធា អមទៅដោយការគំរាមកំហែងបង្កើនប្រាក់ពន្ធនាំចូលរថយន្តពីជប៉ុនទៅកាន់អាមេរិកនោះ ។
កាលពីខែសីហា ក្រសួងការពារជាតិជប៉ុនបានពិចារណា ចំណាយ៥.៣សែនកោដិយេន (ប្រហែល៤៧ពាន់លានដុល្លារ) នៅឆ្នាំក្រោយនេះ សម្រាប់បំពាក់សព្វាវុធទំនើបៗ ដើម្បីបាញ់ទម្លាក់ប្រព័ន្ធមីស៊ីល បាល្លីស្ទិកកូរ៉េខាងជើង ដែលទីក្រុងតូក្យូ រំពៃថា ចេះតែបន្តគំរាមកំហែង បើទោះបីទីក្រុងព្យុងយ៉ាង សន្យាបោះបង់អាវុធបរមាណូនោះហើយក៏ដោយ ។
នាយករដ្ឋមន្ត្រីជប៉ុន លោក Shinzo Abe បានខិតខំពង្រឹងឥទ្ធិពលយោធា ដើម្បីឆ្លើយតបការវាយប្រហារណាមួយដោយមីស៊ីលរបស់កូរ៉េខាងជើង ក៏ដូចប្រឆាំងចិនដែលបង្កើនឥទ្ធិពលទាំងនៅលើដែនសមុទ្រ និងដែនអាកាស ជុំវិញជប៉ុន ។
ជប៉ុននៅមិនទាន់ទុកចិត្តកូរ៉េខាងជើងដែលថា បោះបង់អាវុធបរមាណូ និងកម្មវិធិអាវុធមីស៊ីល បាល្លីស្ទិកនោះឡើយ ។ ក្រសួងការពាររបស់ជប៉ុនបានថ្លែងនៅក្នុងក្រដាសស កាលពីខែសីហាថា ក្រុងព្យុងយ៉ាង នៅតែជាចំណុចគំរាមកំហែងបំផុតរបស់ជប៉ុន ៕ ថាច់ យ៉ាត
