សារព័ត៌មាន នគរវត្ត តែងតែនាំមុខគេជានិច្ច
កោះកុង៖ នៅថ្ងៃទី១៤ ខែធ្នូ ឆ្នាំ២០១៨នេះ គឺជាថ្ងៃទី១ នៃការចាប់ផ្ដើមព្រឹត្តិការណ៍បុណ្យសមុទ្រដែលព្រះរាជាណាចក្រកម្ពុជាត្រូវរៀបចំជាប្រចាំរៀងរាល់ឆ្នាំតាមខេត្តដែលស្ថិតជាប់នឹងតំបន់ឆ្នេរសមុទ្រហើយសម្រាប់ឆ្នាំនេះ ខេត្តកោះកុងត្រូវទទួលរៀបចំធ្វើសម្រាប់ពិធីបុណ្យសមុទ្រលើកទី៧ជុំទី២ ឆ្នាំ២០១៨នេះ។
ឆ្នាំនេះក៏មិនខុសពីរៀងរាល់ឆ្នាំដែរ ព្រឹត្តិការណ៍សំខាន់ៗនៅក្នុងពិធីបុណ្យសមុទ្រនេះ គឺមានការតាំងពិព័រណ៌ទំនិញ, ផលិតផលក្នុងស្រុក និងក្រៅស្រុក, ពិពរណ៌មុខម្ហូប, ភេជ្ជៈ ,ព្រឹត្តិការណ៍កីឡា , ប្រគំតន្ត្រី ជាមួយនឹងឈុតឆាកសិល្បៈផ្សេងៗជាច្រើន ទៀត។
ពិធីបុណ្យសមុទ្រលើកទី៧ ជុំទី២នេះ បានរៀបចំឡើងរយៈពេល៣ថ្ងៃ ចាប់ពីថ្ងៃទី១៤-១៦ ខែធ្នូ ឆ្នាំ២០១៨ នៅទីរួមខេត្តកោះកុង ហើយនៅថ្ងៃស្អែកនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នឹងអញ្ជេីញជាអធិបតីដ៏ខ្ពង់ខ្ពស់ក្នុងពិធីបើកផ្លូវការនៃពិធីបុណ្យសមុទ្រឆ្នាំនេះ។
ដោយសារកម្ពុជាទទួលបានសុខសន្តិភាពពេញផ្ទៃប្រទេសដូចសព្វថ្ងៃ ទេីបយេីងមានឱកាសបានប្រារពនូវកម្មវិធីបុណ្យសមុទ្រជារៀងរាល់ឆ្នាំ ក៏ដូចជាពិធីបុណ្យជាតិធំៗជាច្រេីនទៀត ដេីម្បីអោយបងប្អូនប្រជាពលរដ្ឋទទួលបានភាពសប្បាយរីករាយ ជាពិសេសធ្វេីអោយភ្ញៀវអន្តរជាតិកាន់តែស្គាល់ពីកម្ពុជាកាន់តែខ្លាំងឡេីងបន្ថែមទៀត។
សូមបងប្អូនប្រជាពលរដ្ឋ ភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិ មកលេងកម្សាន្តក្នុងពិធីបុណ្យសមុទ្រឆ្នាំនេះអោយបានច្រេីនកុះករ ជាពិសេស សូមស្ថាប័នពាក់ព័ន្ធ និងអាជ្ញាធរមានសមត្ថកិច្ចគ្រប់លំដាប់ថ្នាក់ បង្កើនការយកចិត្តទុកដាក់ខ្ពស់ ការពារសុវត្តិភាពជូនបងប្អូនប្រជាពលរដ្ឋ និងភ្ញៀវទេសចរណ៍ជាតិ និងអន្តរជាតិដែលមកលេងបុណ្យសមុទ្រក្នុងរយៈពេល០៣ថ្ងៃនេះ។
សូមឱ្យប្រជាពលរដ្ឋនិង ភ្ញៀវទេសចរទាំងអស់ទទួលបាននូវភាពរីករាយនៅក្នុងឱកាសនៃការចូលរួមព្រឹត្តិការណ៍បុណ្យសមុទ្រនៅក្រុងខេមរភូមិន្ទ ខេត្តកោះកុង ឆ្នាំនេះ៕
