សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ដោយមានការសម្របសម្រួលពីដំណាងអាយ្យការអមសាលាដំបូងខេត្តពោធិ៍សាត់លោក អធិការ និងអធិការរងនៃអធិការដ្ឋាននគរបាលក្រុងពោធិ៍សាត់ ដឹកនាំកម្លាំងជំនាញក្រោមឱវ៉ាតបង្រ្កាបសង្វៀនបញ្ជល់មានមួយកន្លែង ឃាត់ខ្លួនមនុស្សចំនួន ២នាក់រួមទាំងវត្ថុតាង និិងសម្ភារៈ និងម៉ូតូចំនួន ២០គ្រឿងផងដែរ ចំណែកអ្នកញៀនល្បែងនេះរត់បាតជើងសព្រាតហុយដីទ្រលោម។
ប្រតិបត្តិការខាងលើធ្វើឡើងនៅវេលាម៉ោង២ និង៣០នាទី រសៀលថ្ងៃទី២៥ ខែធ្នូ ឆ្នាំ២០១៨ ត្រង់ចំណុចផ្ទះរបស់ឈ្មោះ ថោង វឿន ភេទប្រុស អាយុ ៦៥ឆ្នាំ ជនជាតិខ្មែរ ស្ថិតក្នុងភូមិដូនអី សង្កាត់ចំរើនផល ក្រុង.ខេត្តពោធិ៍សាត់។
លោក វរសេនីយ៍ឯក យឹម ស៊ាងហៃ អធិការនៃអធិការដ្ឋាននគរបាលក្រុងពោធិ៍សាត់បានឲ្យដឹងថា ក្នុងកិច្ចប្រត្តិបត្តការបង្រ្កាបអ្នកល្បែងជល់សត្វមាន់ខាងលើ កម្លាំងបានឃាត់ខ្លួនម្ចាស់ផ្ទះ និងម្ចាស់សង្វៀនជល់សត្វមាន់ម្នាក់ឈ្មោះ ថោង វឿន ភេទប្រុស អាយុ៦៥ឆ្នាំ ជនជាតិខ្មែរ បច្ចុប្បន្ន រស់នៅភូមិ.សង្កាត់កើតហេតុខាងលើ រួមទាំងវត្ថុតាង និិងសម្ភារៈផ្សេងៗក្នុងបុព្វហេតុជល់មាន់មួយចំនួន។
លោក អធិការបន្តថា ក្នុងនោះជាក់ស្ដែងកម្លាំងឃាត់បុរសម្នាក់ផ្សេងទៀតដោយមានវត្ថុតាងកំពុងបីសត្វមាន់គក ១ក្បាលឈ្មោះ មុត កំសត់ អាយុ ៤៤ឆ្នាំ ជនជាតិខ្មែរ បច្ចុប្បន្ន រស់នៅភូមិតាសាក់ ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ រួមទាំងម៉ូតូចំនួន ២០គ្រឿងផងដែរខណៈម្ចាស់រត់គេចចោលបាត់។
លោក បន្តទៀតថា ចំពោះជនសង្ស័យទាំង ២នាក់ម្ចាស់សង្វៀន និងបុរសកាន់វត្ថុតាង(មាន់)រួមទាំងវត្ថុតាង និិងសម្ភារៈផ្សេងៗ និងម៉ូតូចំនួន ២០គ្រឿងបាននាំ និងដឹកយកមកបន្តនីតិវិធី នៅអធិការដ្ឋាននគរបាលក្រុងពោធិ៍សាត់៕ ប៉ឹម ពិន
