សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ តុលាការសម្រេចឃុំខ្លួន ជនសង្ស័យ០៤នាក់ ដែលកម្លាំងស្នងការដ្ឋាននគរបាលខេត្តមណ្ឌលគិរី បានឃាត់ខ្លួនកាលពីថ្ងៃទី២៧ ខែធ្នូ ឆ្នាំ២០១៨ ជុំវិញករណីដេញឡានដឹកឈើបង្កឲ្យមានគ្រោះថ្នាក់ចរាចរណ៍ ។
ការឃុំខ្លួននេះ តុលាការបានធ្វើឡើងនៅរសៀលថ្ងៃទី២៩ ខែធ្នូ ឆ្នាំ២០១៨បន្ទាប់ពីសាកសួរបំភ្លឺជុំវិញករណីដេញឡានដឹកឈើ បង្កឲ្យមានគ្រោះថ្នាក់ចរាចរណ៍ ដែលក្នុងហេតុការណ៍នោះ បណ្ដាលឲ្យមនុស្សស្លាប់ម្នាក់ និងរងរបួសស្រាលធ្ងន់៣នាក់ទៀតនៅចំណុចKm១៣៦ក្នុងភូមិត្រពាំងផ្អេរ ឃុំស្រែខ្ទុម ស្រុកកែវសីមា ខេត្តមណ្ឌលគិរី វេលាម៉ោង៦ និង២៤នាទីថ្ងៃទី២៧ ខែធ្នូឆ្នាំ២០១៨ នោះ ។
ជនសង្ស័យ ដែលត្រូវឃុំខ្លួននោះមានទី១.លោក យូ រ៉ាវុធ ភេទប្រុស អាយុ៥១ឆ្នាំ មុខរបរយោធា ទី២.លោក វ៉ាន់ រួន ភេទប្រុស អាយុ៥៤ឆ្នាំ នគរបាល ទី៣.លោក ស្រ៊ុន ឈួន ភេទប្រុស អាយុ៤៣ឆ្នាំ មុខរបរ មន្ត្រីរដ្ឋបាលព្រៃឈើ និងទី៤.លោក សៀង ចំរ៉ុង ភេទប្រុស អាយុ៣៥ ឆ្នាំ មុខរបរ មន្ត្រីនគរបាល ។
ក្រោយពីសាកសួររួចមកត្រូវបានអយ្យការសម្រេចចេញដីកាឃុំខ្លួនជាបណ្តោះអាសន្ន ទៅលើជនសង្ស័យទាំង០៤នាក់នោះតែម្តង ។
តាមប្រភពថា ជនសង្ស័យនៅសល់៣នាក់ទៀត ដែលមានការពាក់ព័ន្ធបានរត់គេចខ្លួនបាត់នោះមានឈ្មោះទី១/ ឈ្មោះ នី អ្នកសារព័ត៌មាន ទី២/ ឈ្មោះ ណាង អ្នកសារព័ត៌មាន ទី៣/ ឈ្មោះ កាណួត ជាយោធា ហើយសមត្ថកិច្ចក៏កំពុងតែស្រាវជ្រាវយ៉ាងម៉ត់ចត់ផងដែរ ដើម្បីសុំគោលការណ៍ពីតុលាការឈានចូលទៅដល់ការឃាត់ខ្លួនយកមកចាត់ការតាមផ្លូវច្បាប់បន្តទៀត ។
ប្រជាពលរដ្ឋនៅខេត្តមណ្ឌលគិរី ពួកគាត់សំណូមពរទៅ លោក ស្វាយ សំអ៊ាង អភិបាលនៃគណ:អភិបាលខេត្ត សូមមានវិធានការបង្ក្រាបមន្ត្រីកងកម្លាំង ដែលគ្មានភារកិច្ចនៅតាមដងផ្លូវ (កុងត្រូលជជុះ)ឲ្យបានក្ដៅគគុកផងកន្លងមកក្រុមនេះតែងតែបង្កនូវបញ្ហាដល់សង្គមប្រជាពលរដ្ឋមិនចេះចប់នោះដូចជាករណីដេញឡានខាងលើនេះជាដើម ដែលបង្កឲ្យមានមនុស្សស្លាប់យ៉ាងអាណោចអាធ័មបំផុតនោះ ៕ ជីវន្ត័
