សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យមួយក្រុមមានគ្នា៦នាក់ ជិះម៉ូតូ៣គ្រឿង ធ្វើសកម្មភាពឆក់ទូរស័ព្ទពីជនជាតិចិន ប្រុស ស្រីពីរនាក់ បានសម្រេចហើយ ព្យាយាមជិះម៉ូតូរត់ តែត្រូវបានប្រជាពលរដ្ឋជិះម៉ូតូបុកដួលចាប់បានម្នាក់ ។
ហេតុការណ៍នេះ បានកើតឡើងកាលពីវេលាម៉ោង៩និង៣០នាទីយប់ ថ្ងៃទី៧ ខែមករា ឆ្នាំ២០១៩ នៅចំណុចខាងកើតណាហ្គាវើល ផ្លូវបេតុងសង្កាត់ទន្លេបាសាក់ខណ្ឌចំកាមន ។
ជនសង្ស័យឈ្មោះខៀវ ចាន់ណាក់ ភេទប្រុស អាយុ២១ឆ្នាំ មុខរបមិនពិតប្រាកដ មានស្រុកកំណើតនៅភូមិទានភ្លើង ឃុំស្មោងខាងជើង ស្រុកកំចាយមារ ខេត្តព្រៃវែង ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញប្រុស ស្រី២នាក់ជាជនជាតិចិនបានដើរតាមដងផ្លូវក្នុងទិសដៅ ពីជើងទៅត្បូង ខណៈមកដល់ចំណុចកើតហេតុ ស្រាប់តែមានជនសង្ស័យមួយក្រុមមានគ្នា៦នាក់ ជិះម៉ូតូ៣គ្រឿង ដោយមួយគ្រឿងម៉ាក moove ពណ៌ខៀវលាយខ្មៅ គ្មានស្លាកលេខ និង២គ្រឿងទៀតមិនចាំម៉ាក បានមកពីក្រោយហើយម៉ូតូម៉ាកMooveបានធ្វើសកម្មភាពឆក់ទូរស័ព្ទដៃពីជនជាតិចិន បានសម្រេចហើយព្យាយាមជិះម៉ូតូរត់ ស្រាប់តែមានបុរសម្នាក់ឃើញក៏ជិះម៉ូតូបំបុកបណ្តាលឲ្យដួលទើបចាប់បានម្នាក់ចំណែកបក្ខពួកបានជិះម៉ូតូគេចអស់ ។
ក្រោយពេលកើតហេតុសមត្ថកិច្ចបានចុះទៅដល់ចំណុចកើតហេតុនិងនាំជនសង្ស័យមកប៉ុស្តិ៍រដ្ឋបាលនគរបាលទន្លេបាសាក់ រង់ចាំចាត់ការតាមនីតិវិធី ៕ សុខាសែនជ័យ
