នាំប្រពន្ធចុងផឹកស៊ីជាមួយប្រពន្ធដើម ពេលស្រវឹងស្រឿងៗ កើតភ្លើងប្រច័ណ្ឌប្រពន្ធដើមរករឿងឈ្លោះផ្អើលសមត្ថកិច្ចខណ្ឌមានជ័យ

ចែករំលែក៖

ភ្នំពេញ៖ ភាពភ្ញាក់ផ្អើលមួយបានកើតឡើង បន្ទាប់ពីស្រ្តីម្នាក់ស្រែកជេរឈ្លោះប្រកែកគ្នាជាមួយ អតីតបុរសជាប្តីដែលទើបនិងលែងលះគ្នាបានរយះពេលកន្លះខែ ហើយត្រូវកម្លាំងសមត្ថកិច្ចនិងប្រជាពលរដ្ឋរស់នៅជិតខាងជួយធ្វើអន្តរាគមន៍ ខណះដែលបុរសអតីតជាប្តី បានហៅប្រពន្ធចុងមកផឹកស៊ីជាមួយប្រពន្ធដើមជុំគ្នា លុះពេលស្រវឹងស្រឿងៗ ក៏កើតភ្លើងប្រច័ណ្ឌ ។

ហេតុការណ៍ខាងលើនេះ បានកើតឡើងកាលពីវេលាម៉ោង១១និង៣០នាទីយប់ថ្ងៃចន្ទ ២កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៧ ខែមករា ឆ្នាំ២០១៩ នៅចំណុចមុខផ្ទះលេខB3៣ ផ្លូវ២៤BT ក្រុម៤ ភូមិត្នោតជ្រុំ សង្កាត់បឹងទំពុន២ ខណ្ឌមានជ័យ រាជធានីភ្នំពេញ។

បុរសជាប្តី មិនបញ្ជាក់ពីអត្តសញ្ញាណ មានអាយុប្រហែលជាង៣០ឆ្នាំ ជាបុគ្គលិកក្រុមហ៊ុនឯកជន ។ ចំណែកអតីតប្រពន្ធដើម ដែលទើបនិងលែងលះគ្នាបានរយ:ពេលកន្លះខែ មិនស្គាល់ឈ្មោះ អាយុ៣០ឆ្នាំ មុខរបរបុគ្គលិកភោជនីយដ្ឋានមួយកន្លែង និងមានកូនស្រីម្នាក់ អាយុ៧ឆ្នាំ ស្នាក់នៅផ្ទះកើតហេតុខាងលើ ។ រីឯប្រពន្ធចុងមិនស្គាល់អត្តសញ្ញាណដូចគ្នា ។

តាមប្រភពព័ត៍មានពីប្រជាពលរដ្ឋ បានឲ្យដឹងថា មុនពេលកើតហេតុ គេឃើញផ្ទះកើតហេតុខាងលើ មានកម្មវីធីផឹកស៊ីនៅមុខផ្ទះ ដោយមានមនុស្សប្រុសស្រីជាច្រើននាក់ លុះដល់វេលាម៉ោងកើតហេតុ មិនដឹងជាយ៉ាងម៉េច ក៏ស្រាប់តែមានរឿងឈ្លោះប្រកែកវាយគ្នា ផ្អើលពលរដ្ឋនិងសមត្ថកិច្ចចុះទៅជួយធ្វើអន្តរាគមន៍ភ្លាមៗ ទើបដឹងរឿងថា ជារឿងប្រច័ណ្ឌគ្នា រវាងប្រពន្ធចុងនិងប្រពន្ធដើមឈ្លោះគ្នា ។

បើតាមប្រភពពីបុរសជាប្តី បានឲ្យដឹងថា រូបគាត់ជាមួយនិងប្រពន្ធដើម បានចាប់ដៃគ្នារយ:ពេលជិត១០ឆ្នាំហើយ ដោយបានកូនស្រីម្នាក់អាយុ៧ឆ្នាំ លុះការរស់នៅជាមួយគ្នាយូរទៅដូចមិនចុះសម្រុងនិងគ្នា ទើបពួកគាត់ក៏បានសម្រេចចិត្តរៀងៗខ្លួន ដោយផ្តិតមេដៃលែងលះគ្នា ចាប់ពីថ្ងៃទី ១៨ ខែធ្នូ ឆ្នាំ២០១៨កន្លងទៅ ។

បុរសជាប្តីបន្តថា ប៉ុន្តែក្រោយពីលែងលះគ្នារួច ប្រពន្ធដើមគឺបានមករស់នៅជុំគ្នាជាមួយគាត់ដដែល ព្រោះតែអាណិតកូនស្រីនៅតូច ហើយបច្ចុប្បន្ននេះរូបគាត់ក៏មានប្រពន្ធចុងមួយទៀត ។ លុះនៅយប់ថ្ងៃកើតហេតុ រូបគាត់បានរៀបចំកម្មវីធីផឹកស៊ីជួបជុំបងប្អូនមិត្តភក្តិ នៅមុខផ្ទះជាមួយនិងប្រពន្ធដើម ក្រោយមកប្អូនស្រីរបស់គាត់ បានទៅឌុបប្រពន្ធចុងរបស់គាត់មកលេង និងបានហូបចុកផឹកស៊ីជាមួយគ្នា តែរូបគាត់បានប្រាប់ប្រពន្ធដើមហើយ ថាកុំឲ្យរករឿងគ្នា លុះពេលប្រពន្ធដើមផឹកស្រវឹងស្រឿង ស្រាប់តែគាត់កើតភ្លើងប្រច័ណ្ឌប្រពន្ធចុង ក៏បានរករឿងវាយប្តី និងជេរគ្នាផ្អើលអ្នកជិតខាងតែម្តង ។

ក្នុងហេតុការណ៍នោះដែរ ស្ត្រីជាប្រពន្ធដើម គិតតែពីឈរជេរ ហែកហួង អស់កេរ៍គ្មានសល់ ចន្លោះត្រង់ណានោះទេ ហើយស្ត្រីជាប្រពន្ធចុង ក៏មិនបានចេញមុខមកដែរ គឺសម្ងំនៅក្នុងផ្ទះ រហូតបុរសជាប្តី លួងលោមឲ្យស្ត្រីប្រពន្ធដើម និងសម្របសម្រួលចូលក្នុងផ្ទះដេកបាត់ទៅ ។ចំណែកសមត្ថកិច្ចដោយឃើញថាគ្មានរឿងអ្វីធំដុំ ក៏នាំគ្នាត្រលប់មកធ្វើការបន្តទៀតវិញ ៕ស រស្មី