សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង: មានហេតុការណ៍គ្រោះថ្នាក់ចរាចរណ៍មួយបានកើតឡើង ដោយរថយន្តច្នៃមួយគ្រឿង បានបុកម៉ូតូ លោកនាយកសាលាបឋមសិក្សា រកាបុស្ស ពេល ជិះបញ្ច្រាសទិសគ្នាយ៉ាងពេញទំហឹង បណ្តាលឲ្យលោកនាយកសាលាស្លាប់យ៉ាងអាណោចអាធ័ម ។
ហេតុការណ៍នេះកើតឡើងនៅម៉ោង៥ល្ងាចថ្ងៃអង្គារ ១០ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី១៥ ខែមករា ឆ្នាំ២០១៩ នៅចំណុចផ្លូវលេខ៥៧ ភូមិភ្ជាវ ឃុំត្រែង ស្រុករតន:មណ្ឌល ខេត្តបាត់ដំបង។
មន្រ្តីនគរបាលចរាចរស្រុករតន:មណ្ឌលបានឲ្យដឹងថា ជនរងគ្រោះដែលស្លាប់មានឈ្មោះ អ៊ុ វណ្ណ: ភេទប្រុស អាយុ៤២ឆ្នាំ ជានាយកសាលាបឋមសិក្សារកាបុស្ស មានទីលំនៅភូមិ-ឃុំ កន្លែងកើតហេតុខាងលើ ។ ចំណែកអ្នកបើកបររថយន្តបង្កកែច្នៃដឹកទំនិញពេញគ្មានពាក់ស្លាកលេខ ទុករថយន្តចោលរត់គេចខ្លួនបាត់។
ក្រោយកើតហេតុសមត្ថកិច្ចនគរបាលចរាចរស្រុករតន:មណ្ឌលទៅដល់បានធ្វើការវាស់វែង យកវត្ថុតាងយានយន្តទាំងពីរគ្រឿងទៅរក្សាទុក រង់ចាំដោះស្រាយគ្នាតាមច្បាប់ពេលក្រោយ ៕ សហការី
