ផ្ទះពលរដ្ឋមួយខ្នង ត្រូវភ្លើងឆេះស្ទើរទាំងស្រុង មូលហេតុឆ្លងចរន្ដអគ្គិសនី

ខេត្តកណ្ដាល៖ ផ្ទះរបស់ពលរដ្ឋមួយខ្នង ត្រូវអគ្គិភ័យឆេះខូចខាតស្ទើរទាំងស្រុង និងបាត់បង់ទ្រព្យសម្បត្ដិជាច្រើនផងដែរ ។ ហេតុការណ៍នេះ បង្កមានការភ្ញាក់ផ្អើលឡើងនៅវេលាម៉ោង១៣និង៤០នាទី ថ្ងៃទី២៩ ខែមករា ឆ្នាំ២០១៩ ស្ថិតក្នុងភូមិទីទុយពង ឃុំសំរោងលើ ស្រុកអង្គស្នួល ខេត្តកណ្ដាល ។

មន្រ្ដីនគរបាលស្រុកអង្គស្នួលបានឲ្យដឹងថា ផ្ទះដែលត្រូវអគ្គិភ័យឆាបឆេះមានទំហំ៦ម៉ែត្រគុណនឹងទទឹង៧ម៉ែត្រ សង់អំពីឈើប្រក់ក្បឿង ជារបស់ឈ្មោះ ផុន សុពេជ្រ ភេទប្រុស អាយុ៤៣ឆ្នាំ មុខរបរគ្រូបង្រៀន និងប្រពន្ធឈ្មោះ ផាត់ ផល្លី អាយុ៤២ឆ្នាំ មានទីលំនៅភូមិឃុំកើតេហតុខាងលើ ។ ក្នុងហេតុការណ៍នេះផងដែរ បណ្ដាលឲ្យបាត់បង់ទ្រព្យសម្បត្ដិមាន៖ ប្រាក់រៀលចំនួន១១លានរៀល ,ប្រាក់ដុល្លារចំនួន៣ពាន់ដុល្លារសហរដ្ឋអាមេរិក និងប្លង់ដីចំនួន៧ប្លង់ ។

ប្រភពដដែលបន្ដថា បន្ទាប់ពីទទួលបានព័ត៌មានថា មានអគ្គីភ័យឆេះផ្ទះរបស់ពលរដ្ឋខាងលើ ភ្លាមនោះកម្លាំងនគរបាល បានចេញអន្ដរាគមន៍ រួមទាំងប្រជាពលរដ្ឋជិតខាងដោយប្រើរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ដកណ្ដាលចំនួន២គ្រឿង ,រថយន្តរបស់អង្គភាពK៨៦ ចំនួន១គ្រឿង ប្រើប្រាស់ទឹកអស់ចំនួន៤ស៊ីទែន ភ្លើងត្រូវបានរលត់ជាស្ថាពរ ។

បន្ទាប់ពីធ្វើការពន្លត់រួច សមត្ថកិច្ចជំនាញបញ្ជាក់ថា គឺបណ្ដាលមកពីឆ្លងចរន្ដអគ្គិសនីក្នុងផ្ទះ (ទុស្សេខ្សែភ្លើង)ទើបបានជាមានអគ្គិភ័យកើតឡើង ៕ ស្អាងជ័យ