សារព័ត៌មាន នគរវត្ត តែងតែនាំមុខគេជានិច្ច
ឥណ្ឌា និងប៉ាគីស្ថាន គឺជាប្រទេសដែលមានវិវាទនៅតាមបណ្តោយព្រំដែន ដោយកម្លាំងទាហានប្រទេសទាំងពីរ តែងតែប៉ះទង្គិចគ្នាជាបន្តបន្ទាប់ ។ កន្លងមក ប៉ាគីស្ថាន ក៏បានបង្ហាញនៅការសាកល្បងមីស៊ីលដោយជោគជ័យ អាចកម្ទេចទីតាំងនានារបស់សត្រូវបាន ។
នៅពេលនេះដែរ ឥណ្ឌាក៏បានសាកល្បង មីស៊ីលកម្ទេចរថក្រោះ ប្រភេទ Helina បាញ់ចេញពីឧទ្ធម្ភាគចក្រ ។ សារព័ត៌មាន Sputnik បានផ្សាយថា ប្រព័ន្ធសព្វាវុធខាងលើគឺជាប្រភេទមីស៊ីលសម្រាប់បាញ់ពីលើផ្ទៃអាកាស នៃមីស៊ីលកម្ទេចរថក្រោះហៅថា Nag ហើយឈ្មោះរបស់វាថា HeliNa នេះ គឺបានមកពីការរួមបញ្ចូលគ្នានៃពាក្យ Heli ពី Helicopter (ឧទ្ធម្ភាគចក្រ) និង Na ពី Nag ។ អង្គការអភិវឌ្ឍន៍ និងស្រាវជ្រាវសព្វាវុធសម្រាប់វិស័យការពារជាតិឥណ្ឌា (DRDO) បានអភិវឌ្ឍន៍មីស៊ីល Nag ចាប់តាំងពីឆ្នាំ២០០៩ មកម៉្លេះ ដោយចំណាយលុយខ្ទង់៤៧លានដុល្លារអាមេរិក ។
គួរជម្រាបថា មីស៊ីលខាងលើធ្វើប្រតិបត្តិការដោយប្រើមុខងារ Lock on Before Launch ដែលមានរយៈចម្ងាយវាយប្រហារចន្លោះពី៤ទៅ៧គីឡូម៉ែត្រ ដែលជាចម្ងាយឆ្ងាយជាងគេបង្អស់ ក្នុងចំណោមប្រភេទមីស៊ីលដែលប្រើប្រាស់សម្រាប់ប្រឆាំងរថក្រោះនៅលើពិភពលោក។
បើធៀបជាមួយមីស៊ីល Javelin របស់អាមេរិក និង Spike របស់អ៊ីស្រាអែល ដែលប្រើមុខងារ Lock on Before Launch ដែរនោះ គឺពួកវាមានរយៈចម្ងាយត្រឹមតែ២.៥គីឡូម៉ែត្រ ប៉ុណ្ណោះ ។
ពេលថ្មីៗនេះ ប៉ាគីស្ថានបានប្រកាសថា កម្លាំងទាហាន មានមីស៊ីលដែលមានកម្លាំងខ្លាំង អាចយកឈ្នះមីស៊ីលការពារ ទាំងឡាយដែលឥណ្ឌាមាន ក្នុងនោះ មានមីស៊ីល S-400 ដែលឥណ្ឌាទិញពីរុស្ស៊ីផងដែរ ។
សារព័ត៌មាន Sputnik រុស្ស៊ី បានផ្សាយថា ប៉ាគីស្ថាន បានសាកល្បងដោយជោគជ័យពីរលើក កន្លងមកនូវប្រភេទមីស៊ីល Nasr អាចបំពាក់ក្បាលគ្រាប់បរមាណូ ។ មីស៊ីលខាងលើ របស់ប៉ាគីស្ថាន វាយប្រហារចំគោលដៅខ្ពស់ ដោយអាចឆ្លងផុតប្រព័ន្ធការពារមីស៊ីលនានារបស់សត្រូវ ។
ប៉ាគីស្ថានបានប្រកាសថា មីស៊ីល Nasr អាចវាយប្រហារចំគោលដៅខ្ពស់ ក្នុងចម្ងាយ ៧០គីឡូម៉ែត្រ ។ មីស៊ីលខាងលើត្រូវបានផលិតឡើងដើម្បីឆ្លងផុតពីប្រពន្ធមីស៊ីលការពាររបស់ឥណ្ឌា ក្នុងនោះមាន S-400s ដែលទើបទិញពីរុស្ស៊ី។ មីស៊ីល Nasr ត្រូវបានផលិតឡើង តាំងពីឆ្នាំ២០១១ ហើយពេលនេះ បានដាក់ឲ្យប្រើប្រាស់ជាផ្លូវការ ៕
OLYMPUS DIGITAL CAMERA
