សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជិតដល់ថ្ងៃចូលរោងការហើយ បុរសម្នាក់ជាមន្ត្រីយោធា បានផឹកស្រាស្រវឹង ហើយប្រើអំពើហិង្សាវាយនារីជាគូដណ្ដឹងរបស់ខ្លួន នៅតាមផ្លូវសាធារណៈ បង្កឲ្យមានការភ្ញាក់ផ្អើលដល់ប្រជាពលរដ្ឋដែលនៅក្បែរនោះ រាយការណ៍ប្រាប់សមត្ថកិច្ចឲ្យចុះជួយអន្តរាគមន៍ កាលពីវេលាម៉ោង០៨:៣០នាទីយប់ ថ្ងៃទី២៦ ខែកុម្ភៈ ឆ្នាំ២០១៩នេះ ត្រង់ចំណុចទល់មុខឱសថស្ថានតាំងងួនងួន នៅតាមបណ្ដោយផ្លូវជាតិលេខ២ ស្ថិតក្នុងភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពព័ត៌មានពីបងប្រុសម្នាក់ដែលជាអ្នកឃើញហេតុការណ៍ផ្ទាល់បានរៀបរាប់ប្រាប់ឲ្យដឹងថា មុនពេលកើតហេតុគេបានឃើញបុរសនារី២នាក់ ជិះម៉ូតូមួយគ្រឿង ម៉ាក Honda Scoopy ពណ៌ស ពាក់ស្លាកលេខភ្នំពេញ 1FJ-8254 ពាក់ស្លាកលេខភ្នំពេញ ធ្វើដំណើរតាមបណ្តោយផ្លូវជាតិលេខ២ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ មិនដឹងមានបញ្ហាអ្វីនោះទេ ស្រាប់តែឃើញប្រកែកគ្នាខ្លាំងៗ ហើយបុរសដែលអាងខ្លួនជាមន្ត្រីយោធានោះ ឈប់ម៉ូតូហើយធ្វើសកម្មភាពវាយនារីដែលជាគូដណ្ដឹង ជាច្រើនដៃរួចរុញនាងឲ្យដួល និងធាក់នាងមួយជើងទៀត បណ្តាលឲ្យនារីជាគូដណ្ដឹងរងរបួសទាំងផ្ទៃមុខខាងឆ្វេង តែត្រូវបានអ្នកឃើញហេតុការណ៍ផ្ទាល់ស្រែកពីចម្ងាយកុំឲ្យមន្ត្រីយោធានោះវាយនាងទៀត ហើយបានទាក់ទងទៅកាន់កម្លាំងល្បាតប៉ុស្តិ៍នគរបាលចាក់អង្រែក្រោម ចុះមកជួយអន្តរាគមន៍ភ្លាមៗផងដែរ ។
លោក វុឌ្ឍ ផូសារវ័ន្ត នាយប៉ុស្តិ៍ចាក់អង្រែក្រោម ក៏បាមដឹកនាំកម្លាំងចុះមកដល់កន្លែងកើតហេតុ ហើយបានសួរនាំអ្នកឃើញហេតុការណ៍ រួចសាកសួរបុរសនារី២នាក់គូដណ្ដឹង ស្រាប់តែបុរសបង្កហេតុនោះអះអាងថា រូបគេជាមន្ត្រីយោធាដែរ ហើយក៏រុញច្រានសមត្ថកិច្ចវិញ និងស្រែកសំឡុតសមត្ថកិច្ចមិនឲ្យឃាត់ខ្លួនរូបគេ ទើបបង្កឲ្យមានការភ្ញាក់ផ្អើលដល់ពេញកន្លែងកើតហេតុខាងលើ ។ បន្ទាប់មកសមត្ថកិច្ចឲ្យភាគីទាំងពីរ ទៅសម្របសម្រួលគ្នានៅប៉ុស្តិ៍សិន ចំណែកឯនារីរងគ្រោះដែលជាគូដណ្ដឹងបានប្រាប់សមត្ថកិច្ចឲ្យចាំក្រុមគ្រួសាររបស់នាងមកដល់សិន ចាំទៅប៉ុស្តិ៍ ។ មួយសន្ទុះក្រោយមក ក្រុមគ្រួសាររបស់នាងរងគ្រោះបានមកដល់កន្លែងកើតហេតុ រួចស្ដីឲ្យបុរសដែលជាមន្ត្រីយោធានោះបន្ថែមទៀតផងដែរ ហើយក៏សួរនាំភាគីទាំងពីរបានដឹងរឿងហេតុហើយ ក៏នាំគ្នាទៅសម្របសម្រួលគ្នានៅប៉ុស្តិ៍នគរបាលចាក់អង្រែក្រោម ។
បើតាមប្រភពព័ត៌មានពីបងប្រុសម្នាក់ដែលជាសាច់ញាតិរបស់នារីរងគ្រោះបានប្រាប់ឲ្យសមត្ថកិច្ចបានដឹងថា នៅមុនពេលកើតហេតុពួកគេទាំងពីរ បានញាំអីជុំគ្នាលក្ខណៈគ្រួសារនៅផ្ទះមួយកន្លែងនៅក្រុងតាខ្មៅ ដោយល្អូកល្អឺន និងគ្នាណាស់ និងមិនមានទំនាស់អ្វីកើតឡើងទេ លុះមកដល់មុនម៉ោងកើតហេតុពួកគេទាំងពីរបានជិះម៉ូតូឌុបគ្នាត្រឡប់ទៅផ្ទះវិញ ខណៈដែលភាគីខាងប្រុសមានស្ថានភាពស្រវឹងស្រាបន្តិចបន្តួចផងដែរ ។ លុះក្រោយមកស្រាប់តែនារីរងគ្រោះទូរស័ព្ទប្រាប់ថា បុរសជាគូដណ្ដឹង និងជាមន្រ្តីយោធានោះ បានប្រើហិង្សាវាយមកលើរូបនាងទៅវិញ ទើបពួកគាត់ប្រញាប់នាំគ្នាមកកន្លែងកើតហេតុតែម្តង ។
សមត្ថកិច្ចបានឲ្យដឹងថា ជនបង្កហេតុនោះឈ្មោះ ចេង ប៊ុនលី ភេទប្រុស អាយុ២៨ឆ្នាំ មុខរបរ មន្ត្រីយោធា ជនជាតិខ្មែរ មានទីលំនៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល ។ ចំណែកនារីរងគ្រោះឈ្មោះ សុទ្ធ ស្រីពៅ អាយុ២៧ឆ្នាំ ។
នៅចំពោះមុខសមត្ថកិច្ចភាគីបុរសជាមន្ត្រីយោធា បានធ្វើកិច្ចសន្យាដោយចាប់ពីថ្ងៃនេះតទៅរូបគេឈប់ប្រើអំពើហិង្សាលើឈ្មោះ សុទ្ធ ស្រីពៅ ភេទស្រី អាយុ២៧ឆ្នាំ ត្រូវជាគូដណ្ដឹង ឬគំគួនទៅថ្ងៃមុខទៀតឡើយ បើសិនជារូបគេមិនគោរពតាមកិច្ចសន្យាខាងលើ រូបគេសុខចិត្តទទួលខុសត្រូវចំពោះមុខច្បាប់៕ ភារ៉ា ដង្កោ
