សារព័ត៌មាន នគរវត្ត តែងតែនាំមុខគេជានិច្ច
ក្រុមអ្នករកស៊ីដឹកទំនិញកសិផល ឆ្លងកាត់ផ្លូវជាតិលេខ៨ ចំណុចភូមិ-ឃុំព្រែកព្នៅ ស្រុកពារាំង ខេត្តព្រៃវែងបានខ្សឹបខ្សៀវថា ក្រុមមន្ត្រីប្រចាំស្ថានីយជញ្ជីងថ្លឹងរថយន្តនៅចំណុចខាងលើ តែងតែគាបយកលុយពីពួកគាត់ដោយគ្មានញញើតញញើមបើទោះបីជារថយន្តទាំងនោះមិនលើសទម្ងន់ក៏ដោយ ដោយអះអាងថា សុំបាយ ទឹកខ្លះ ។ ជួនកាលក៏មានរថយន្តខ្លះដឹកលើសទម្ងន់បន្តិចបន្តួចដែរ ដូច្នេះ អ្នករកស៊ីដឹកជញ្ជូនតែងតែផ្តល់សេវាឲ្យមន្ត្រីដែលប្រចាំការនៅទីនេះ ដើម្បីជាការយោគយល់គ្នា កុំឲ្យថ្ងៃក្រោយ ពេលដឹកទំនិញលើសទម្ងន់ ខ្លាចពួកមន្ត្រីទាំងនោះគាបស៊ីឆៅៗ ។
ប្រភពបានឲ្យដឹងថា ដោយសារតែមានការឃុបឃិតពីលោក អ៊ុន សុធា ប្រធានមន្ទីរសាធារណការ និងដឹកជញ្ជូនខេត្តព្រៃវែងផង ទើបពួកមន្ត្រីប្រចាំការនៅស្ថានីយជញ្ជីងថ្លឹងរថយន្តលើផ្លូវជាតិលេខ៨ តែងតែធ្វើសកម្មភាពល្មើសច្បាប់ជាច្រើន ជាពិសេសគឺយកលុយពីរថយន្តដឹកទំនិញ ទាំងលើសទម្ងន់ និងមិនលើសទម្ងន់ ដោយមិនយោគយល់ ។ ប្រភពបានបន្តទៀតថា ឈ្មួញមួយចំនួនបានប្រើរថយន្តធុនធំតទ្រុង ឬសណ្តោងកន្ទុយ រ៉ឺម៉កផ្ទុកលើសទម្ងន់ អាចបើកបរឆ្លងកាត់ ស្ថានីយថ្លឹងរថយន្តផ្លូវជាតិលេខ៨បានយ៉ាងរលូន ឲ្យតែម្ចាស់រថយន្តទាំងនោះបង់លុយឲ្យពួកមន្ត្រីដែលប្រចាំការនៅស្ថានីយខាងលើ ។
កំណាត់ផ្លូវជាតិលេខ៨ ត្រូវគេមើលឃើញថាបានរងនូវការខូចខាតដោយអន្លើ ព្រោះតែរថយន្តដឹកលើសទម្ងន់ ។ យ៉ាងណាក៏ដោយ មន្ទីរសាធារណការ និងដឹកជញ្ជូនខេត្តព្រៃវែងមិនដែលខ្វល់ចំពោះបញ្ហានេះទេ ។ ការចេះតែបណ្តែតបណ្តោយស្ងាត់ស្ងៀមជាហូរហែ របស់ប្រធានមន្ទីរសាធារណការ និងដឹកជញ្ជូនខេត្តព្រៃវែង នាំឲ្យប្រជាពលរដ្ឋ ជាពិសេស ក្រុមអ្នករកស៊ីដឹកទំនិញសង្ស័យថា ជាការឃុបឃិតគ្នារវាងមន្ត្រីប្រចាំការនៅស្ថានីយខាងលើនេះ ជាមួយប្រធានមន្ទីរសាធារណការ ខេត្តព្រៃវែង ។ ដូច្នេះ រដ្ឋមន្ត្រីក្រសួងសាធារណការ និងដឹកជញ្ជូនគួរចាត់មន្ត្រីទៅអង្គុយមើលមួយថ្ងៃថា តើមានរថយន្តដឹកទំនិញចូលបង់ប្រាក់ឲ្យមន្ត្រីនៅស្ថានីយខាងលើនេះដែរឬទេ? ៕
