សារព័ត៌មាន នគរវត្ត តែងតែនាំមុខគេជានិច្ច
តាមពិតទៅបទល្មើសនេសាទ នៅបឹងទន្លេសាបក្នុងខេត្តពោធិ៍សាត់ ស្ថិតក្រោមការគ្រប់គ្រងរបស់បុរសជនជាតិវៀតណាម ឈ្មោះ ហួន ធី ទាំងស្រុង ។ បណ្តាជនណាដែលចង់ប្រព្រឹត្តល្មើស មិនស្ថិតនៅក្រោមបញ្ជារបស់ហួន ធី ត្រូវប្រឈមនឹងការចាប់ញាត់គុក ។ បច្ចុប្បន្ន នៅតំបន់បឹងទន្លេសាបក្នុងខេត្តពោធិ៍សាត់ មានបទល្មើសអួន ហ៊ុំ ច្រើនជាង៥០វង់ ។ បុរសឈ្មោះ ហួន ធី ជាអ្នកបោះមេ តាមរយៈការចុះប្រមូលលុយពីម្ចាស់អួន ហ៊ុំ យកទៅចែករំលែកឲ្យសមត្ថកិច្ចគ្រប់ផ្នែក គ្រប់ជាន់ថ្នាក់ ។
ការបែកធ្លាយអំពីការបែងចែកផលលាភជូនមន្ត្រីនៅខេត្តពោធិ៍សាត់ ជាពិសេសបណ្តាស្រុកជាប់បឹងទន្លេសាប ត្រូវបានប្រភពបន្ថែមថា ក្រដាសស្នាមនោះត្រូវបានបុរសឈ្មោះ ហួន ធី ធ្វើឡើងកាលពីខែមុន នៅហាងកាហ្វេមុខអធិការដ្ឋាននគរបាលស្រុកក្រគរ ដែលក្នុងនោះ សូម្បីអធិការរងស្រុកក្រគរមួយរូប ក៏បានឃើញក្រដាសស្នាមនៃការបែងចែកផលប្រយោជន៍នោះដែរ ។ នៅក្នុងការបែងចែកនោះ គឺបានបញ្ជាក់យ៉ាងច្បាស់ថា មេ (ទំនងជាថ្នាក់ដឹកនាំខេត្ត) ក្នុងមួយវង់ អួន ហ៊ុំ ត្រូវបង់១៦លានរៀល ។ សាកគណនាមើលថា តើបើមាន អួន ហ៊ុំ ៥០វង់ មេនោះ ទទួលបានប្រាក់ប៉ុន្មាន? រីឯមន្ត្រីផ្សេងៗទៀត ដូចជាអគ្គនាយករដ្ឋបាលជលផល ក្នុងមួយវង់បាន៣លានរៀល ចុះបើ៥០វង់ បានប៉ុន្មាន? នៅមានមន្ត្រីតាមផ្នែកជំនាញជលផល ដែលមួយវង់នៃ អួន ហ៊ុំ ត្រូវទទួលបានផលលាភយ៉ាងហោចណាស់២លានរៀល ។
ការបែកធ្លាយលិខិតស្នាមបែងចែកផលលាភនេះ ធ្វើឲ្យបុរសឈ្មោះ ហួន ធី ក្តៅក្រហាយជាខ្លាំង ហើយបានបញ្ជាឲ្យដៃជើង ដែលលេងហ្វេសប៊ុក ក៏ដូចជាគេហទំព័រខ្លះ ជេរប្រមាថដោយគ្មានមូលដ្ឋានលើគេហទំព័រ ឬបណ្តាញផ្សព្វផ្សាយនានា ដែលបានចុះផ្សាយ អំពីលិខិតស្នាមបែងចែកផលលាភនោះ ។ វាជារឿងអាម៉ាស់ មិនមែនសម្រាប់បុគ្គលឈ្មោះ ហួន ធី នោះទេ ប៉ុន្តែវាជាការទទួលខុសត្រូវរបស់ថ្នាក់ដឹកនាំខេត្តពោធិ៍សាត់ទាំងមូល ។ ករណីនេះ គួរតែមានការស៊ើបអង្កេតឲ្យបានច្បាស់លាស់ថា តើអ្វីដែលហួន ធីបានធ្វើ វាជាការពិតឬយ៉ាងណា ពីព្រោះថា មានមនុស្សយ៉ាងតិច២០នាក់ ស្ទើរគ្រប់ស្ថាប័ន ដែលជាអ្នកទទួលបានផលប្រយោជន៍ពីហួន ធី ក្នុងរឿងបទល្មើសនេសាទអួន ហ៊ុំ តែមួយមុខប៉ុណ្ណោះ ។
អ្វីដែលជាចំណាប់អារម្មណ៍របស់ប្រជាពលរដ្ឋ ជាពិសេសអ្នកនេសាទកំប៉ិកកំប៉ុកនៅតំបន់បឹងទន្លេសាប ក្នុងស្រុកកណ្តៀង ក៏ដូចជាស្រុកក្រគរមើលឃើញថា អំណាចរបស់ហួន ធី ខ្លាំងហួសប្រមាណ ចង់ចាប់អ្នកណាដាក់គុក ក៏បាន បើយល់ថា អ្នកនោះជាឆ្អឹងទទឹងក ក្នុងការធ្វើឲ្យរាំងស្ទះផលប្រយោជន៍របស់ពួកគេ ។ មិនតែប៉ុណ្ណោះ មានអ្នកលេងហ្វេសប៊ុកខ្លះ ក៏ដូចជាគេហទំព័រមួយចំនួន បែរជាមកខាំទាំងទទឹងទិសលើបណ្តាញផ្សព្វផ្សាយ ដែលមានវិជ្ជាជីវៈត្រឹមត្រូវទៅវិញ ។ ក្នុងបញ្ហានេះ នរណាក៏ដឹងដែរថា ហួន ធី គឺជាមេខ្លោងដែលជាអ្នកស្វែងរកផលប្រយោជន៍ឲ្យថ្នាក់ដឹកនាំខេត្តពោធិ៍សាត់ និងស្ថាប័នពាក់ព័ន្ធនានានៅលើបឹងទន្លេសាប ៕
