សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ ជនសង្ស័យបើករថយន្ដបំបុកបារ៉ាស់សមត្ថកិច្ចនគរបាលចរាចរណ៍(ជាន់សាជី) នៅគោលដៅអនុវត្តត្រួតពិនិត្យ ច្បាប់ចរាចរណ៍ នៅមុខមន្ទីរសាធារណការខេត្តកំពង់ស្ពឺ បណ្តាលឲ្យសមត្ថកិច្ចរត់ចែកជើងគ្នា ។ ក្រោយបង្កហេតុ ជនសង្ស័យ ត្រូវបានឃាត់ខ្លួន កសាងសំណុំរឿងចាត់ការតាមនីតិវិធី ។
ប្រភពបានឲ្យដឹងថា នៅគោលដៅត្រួតពិនិត្យពង្រឹងការអនុវត្ដន៍ច្បាប់ចរាចរណ៍ផ្លូវគោក លើផ្លូវជាតិលេខ៤ មុខមន្ទីរសាធារណការ និងដឹកជញ្ជូនខេត្ដ កាលពីថ្ងៃទី៣០ ខែមីនា ឆ្នាំ២០១៩ វេលាម៉ោង៧ និង៤០នាទី មានជនបង្កបើករថយន្ត មួយគ្រឿងម៉ាក Nissan ប្រភេទរថយន្តកែឆ្នៃ ដឹកដី ពណ៌ស ពាក់ស្លាកលេខ ចង្កូតស្តាំ KPS.0536 សណ្ដោងរ៉ឺម៉ក ដឹកគ្រឿងចក្រ។
ជនបង្កមានឈ្មោះម៉ៅ សំរិទ្ធ អាយុ ២៧ឆ្នាំ រស់នៅភូមិរំលោង សង្កាត់កណ្ដោលដុំ ក្រុងច្បារមន ខេត្តកំពង់ស្ពឺ បើកបរពីទិសខាងលិចទៅទិសខាងកើត លុះមកដល់ចំណុចគោលដៅត្រួតពិនិត្យចរាចរណ៍បានបើកបំបុក សាជី ដែលដាក់ជាសញ្ញាសម្គាល់ធ្វើចរាចរណ៍ ធ្វើឲ្យនគរបាលរត់ចែកជើងសឹងតែមិនទាន់ ។
ក្រោយមានសកម្មភាពហេតុការណ៍ខាងលើ ជនបង្កបានព្យាយាមបើករថយន្ដរត់ទៅមុខបន្ដ មិនឈប់នៅកន្លែងកើតហេតុនោះទេ សមត្ថកិច្ចនគរបាលបានធ្វើអន្ដរាគមន៍ភ្លាមៗ ចាប់ឃាត់រថយន្ដ និងជនបង្កបាននៅចំណុចមុខធនាគារវឌ្ឍនៈចម្ងាយប្រមាណ១គីឡូម៉ែត្រ ពីកន្លែងគោលដៅត្រួតពិនិត្យ ។
តាមការបញ្ជាក់ឲ្យដឹងពីមន្ដ្រីនគរបាលចរាចរណ៍ដែលនៅបញ្ជាចរាចរណ៍ ត្រួតពិនិត្យការអនុវត្ដន៍ច្បាប់ចរាចរណ៍ផ្លូវគោក រឿងហេតុដំបូង កម្លាំងបានធ្វើសញ្ញាបញ្ជាឲ្យរថយន្ដចូលអមខាងស្ដាំដៃដើម្បីត្រួតពិនិត្យឯកសារមួយចំនួន និងពិនិត្យ ស្ទីកគ័របិទលើកញ្ចក់រថយន្ដ និងដាក់វាំងននបិទបាំងពីខាងក្នុង ស្រាប់តែរថយន្ដមិនព្រមបន្ថយល្បឿន តាមការបញ្ជារបស់មន្ដ្រីនគរបាលចរាចរណ៍ទេ រួចបើកសំដៅមករកនគរបាលតែម្ដង ធ្វើឲ្យមានការភិតភ័យរត់ចែកជើងគ្នាសឹងតែមិនទាន់ ស្របពេលនោះ ក៏បើកជាន់ សាជី ដែលដាក់ជាសញ្ញានៅគោលដៅតែម្ដង បណ្ដាលឲ្យខូចខាតសាជីចំនួន២ ។
ករណីនេះសមត្ថកិច្ចនគរបាលចរាចរណ៍បាន ឃាត់ ខ្លួនជនបង្ក(អ្នកបើកបរ) និងរថយន្តមករក្សាទុកនៅការិយាល័យចរាចរណ៍ផ្លូវគោកដើម្បីកសាងសំណុំរឿងបញ្ជូនទៅស្ថាប័នអយ្យការចាត់ការតាមនីតិវិធី ៕ សេនាស័ក្តិ
