ម្នាក់ស្លាប់ និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរ ម៉ូតូ បុកម៉ូតូស្រុកកំពង់ស្វាយ

ខេត្តកំពង់ធំ៖ គ្រោះថ្នាក់ចរាចរ ម៉ូតូ បុកម៉ូតូ ក្នុងទិសដៅផ្ទុយគ្នា បណ្តាលឲ្យរបួសបុរសម្នាក់របួសធ្ងន់ និងបុរសម្នាក់ទៀតស្លាប់នៅកន្លែងកើតហេតុ ព្រមទាំងខូចខាតម៉ូតូ២គ្រឿង ។

ហេតការណ៍នេះបានកើតឡើងកាលពីវេលាម៉ោង១៥ និង២៦នាទី ថ្ងៃសុក្រ ០១កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ ខែមេសា ឆ្នាំ២០១៩ លើកំណាត់ផ្លូវលំក្រាលកៅស៊ូ ភូមិព្រៃគុយ ឃុំព្រៃគុយ ស្រុកកំពង់ស្វាយ ខេត្តកំពង់ធំ ។

សមត្ថកិច្ចបានឲ្យដឹងថា ម៉ូតូម៉ាកហុងដាឌ្រីមC125 ពណ៌ខ្មៅ ស្លាកលេខ កំពង់ចាម 1E.6528 បើកបរដោយឈ្មោះ សាង សុជាតិ ភេទប្រុស អាយុ៣២ឆ្នាំ នៅភូមិសូជៃ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ នាំខ្លួនទៅអធិការដ្ឋាននគរបាលស្រុកកំពង់ស្វាយ របួសស្រាល មិនពាក់មួកសុវត្ថិភាព មុខរបរកម្មករសំណង់ អ្នករួមដំណើរឈ្មោះ ឡេង ចក់ ភេទប្រុស អាយុ៣៣ឆ្នាំ នៅភូមិ ឃុំជាមួយអ្នកបើកបរម៉ូតូ របួសធ្ងន់ មិនពាក់មួកសុវត្ថិភាព មុខរបរកម្មករសំណង់ ។

ចំណែកម៉ូតូម៉ាកហុងដាអាយខន ពណ៌ស លាយក្រហម ស្លាកលេខ ភ្នំពេញ 1BB.7261 បើកបរដោយឈ្មោះ ជន ប៊ុនរ៉ូ ភេប្រុស អាយុ៣៣ឆ្នាំ នៅភូមិស្ទឹងសេន សង្កាតកំពង់ក្របៅ ក្រុងស្ទឹងសែន ខេត្តកំពង់ធំ ស្លាប់នៅមន្ទីរពេទ្យឯកជន៥១៥ ពាក់មួកសុវត្ថិភាព មុខរបរមន្ត្រីឧស្សាហកម្មខេត្តកំពង់ធំ ។

មូលហេតុជាបឋមបង្កដោយអ្នកបើកបរម៉ូតូ ហុងដាឌ្រីមC125 ឈ្មោះសាង សុជាតិ បើកបរក្នុងស្ថានភាពស្រវឹងដែលមានជាតិអាល់កុល១,០៨ មីលីក្រាមក្នុងមួយលីត្រខ្យល់ ។

ក្រោយកើតហេតុ សមត្ថកិច្ចបញ្ជូនជនរងគ្រោះទៅមន្ទីរពេទ្យ និងវាស់វែងធ្វើកំណត់ហេតុ ព្រមទាំងប្រមូលវត្ថុតាងយកមករក្សាទុកនៅអធិការដ្ឋាននគរបាលស្រុកកំពង់ស្វាយរងចាំដោះស្រាយជាក្រោយ ៕ ប៊ុនរិទ្ធី