មនុស្សប្រុស-ស្រី២នាក់ បានស្លាប់ និងរបួស ក្នុងហេតុការណ៍គ្រោះថ្នាក់ចរាចរណ៍រវាងរថយន្ត នឹងម៉ូតូ នៅស្រុកបារាយណ៍

ខេត្តកំពង់ធំ៖ បុរសម្នាក់បានស្លាប់បាត់បង់ជីវិត និងស្ត្រីម្នាក់ទៀតរងរបួសធ្ងន់ និងខូចខាត ម៉ូតូ០១គ្រឿង រថយន្ត០១គ្រឿង ហេតុការណ៍គ្រោះថ្នាក់ចរាចរណ៍ម៉ូតូបុករថយន្ត កាលពីថ្ងៃទី២១ ខែមេសា ឆ្នាំ២០១៩ វេលាម៉ោង២១ និង៣០នាទី លើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ១០៩-១១០ ភូមិរពាក់ពេន ឃុំទ្រៀល ស្រុកបារាយណ៍ ខេត្តកំពង់ធំ ។

សមត្ថកិច្ចបានឲ្យដឹងថា ម៉ូតូម៉ាកហុងដា ឌ្រឹម C125 ពណ៌ខ្មៅ ស្លាកលេខ ភ្នំពេញ 1CY.4814 ទិសដៅពីត្បូងទៅជើង បើកបរដោយឈ្មោះ មឿន មុយ ភេទប្រុស អាយុ ៤២ឆ្នាំ នៅភូមិជីវភាព ឃុំអណ្តូងពោធិ៍ ស្រុកបារាយណ៍ ខេត្តកំពង់ធំ ស្លាប់នៅមន្ទីរពេទ្យបង្អែកបារាយណ៍-សន្ទុក ពាក់មួកសុវត្ថិភាព មុខរបរកសិករ ។

រថយន្តម៉ាកហ៊ីយិនដាយ ពណ៌ស ស្លាកលេខកំពង់ចាម 3A.4910 សណ្តោងសឺមីរ៉ឺម៉ក ស្លាកលេខ កំពង់ចាម 4A.0230 ដឹកស្រូវ ទិសដៅជើងទៅត្បូង បើកបរដោយឈ្មោះ ឡុន សុភ័ក្រ ភេទប្រុស អាយុ ២៤ឆ្នាំ ភូមិទួលសាលាឃុំចុងដូងស្រុកបារាយណ៍ខេត្តកំពង់ធំ គេចខ្លួនបាត់ មុខរបរបើកបររថយន្ត ។ អ្នករួមដំណើរឈ្មោះ អេង សុខរ័ត្ន ភេទស្រីអាយុ ១៩ឆ្នាំ ប្រពន្ធអ្នកបើកបររថយន្ត របួសធ្ងន់ ។

មូលហេតុជាបឋមបង្កដោយអ្នកបើកបរទាំងពីរ បើកបរមិនប្រកាន់ស្តាំ ។

ក្រោយកើតហេតុសមត្ថកិច្ចបញ្ជូនជនរងទៅគ្រោះមន្ទីរពេទ្យ និងធ្វើកំណត់ហេតុ ប្រមូលវត្ថុតាង ម៉ូតូ១គ្រឿង យករក្សាទុកនៅអធិការរដ្ឋាននគរបាលស្រុកបារាយណ៍ ចំណែករថយន្តនៅកន្លែងកើតហេតុ ៕ ប៊ុនរិទ្ធី