នគរបាលខណ្ឌសែនសុខ បង្ក្រាបក្រុមជនសង្ស័យមុខសញ្ញាឆក់យ៉ាងសកម្មបាន៣នាក់

ភ្នំពេញ៖ ក្រោមការដឹកនាំរបស់លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខបាន បង្ក្រាប និងឃាត់ខ្លួនក្រុមជនសង្ស័យមួយក្រុម មានគ្នា៣នាក់ ដែលជាមុខសញ្ញាឆក់យ៉ាងសកម្មក្នុងរាជធានីភ្នំពេញកាលពីថ្ងៃទី០២ ខែឧសភា ឆ្នាំ២០១៩ វេលម៉ោង១១ និង០០នាទីនៅចំណុចមុខហាងប៉េស្តា ផ្លូវ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

យោងតាមមន្ត្រីនៃអធិការដ្ឋាននគរបាលខណ្ឌសែនសុខ បានឲ្យដឹងថា ជនសង្ស័យមាន៤នាក់ ប៉ុន្តែរត់រួចម្នាក់ ដែលឃាត់ខ្លួនបានគឺជាមុខសញ្ញាឆក់យកទូរស័ព្ទដៃពីជនរងគ្រោះ កាលពីថ្ងៃ២៣ ខែមេសា ឆ្នាំ២០១៩ វេលាម៉ោង២៣ និង០០នាទី នៅចំណុចមុខហាងប៉េស្តា ផ្លូវ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខនាពេលកន្លងមក ។ ជនសង្សយដែលឃាត់ខ្លួនមាន ១-ឈ្មោះ សេដ្ឋា មិនារិទ្ធ ភេទប្រុស អាយុ២៣ឆ្នាំ មុខរបរមិនពិតប្រាកដ ជនជាតិខ្មែរ ស្នាក់នៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ (មានសារធាតុញៀន) ។ ២-ឈ្មោះ ជា ករុណា ភេទប្រុស អាយុ២៧ឆ្នាំ មុខរបរមិនពិតប្រាកដ ជនជាតិខ្មែរ ស្នាក់នៅភូមិរោងចក្រ សង្កាត់គោកឃ្លាង ខណ្ឌសែនសុខ (មានសារធាតុញៀន) ។ ៣-ឈ្មោះ សុខ ចន្ទ័រង្សី ភេទប្រុស អាយុ១៨ឆ្នាំ មុខរបរមិនពិតប្រាកដ ជនជាតិខ្មែរ ស្នាក់នៅភូមិរោងចក្រ សង្កាត់គោកឃ្លាង ខណ្ឌសែនសុខ (មានសារធាតុញៀន) ។

ជនរងគ្រោះ ១នាក់ ឈ្មោះ ម៉ៅ ស្រីណាវ ភេទស្រី អាយុ២៩ឆ្នាំ មុខរបរបុគ្គលិកហាងសំរិតពេជ្រ ស្នាក់នៅបន្ទប់ជួល ផ្លូវលំ សង្កាត់បឹងកក់២ ខណ្ឌទួលគោក ។ សម្ភារបាត់បង់ ៖ ទូរសព្ទ័ដៃ១គ្រឿង ម៉ាកសាំសុងផ្លើស ។ សម្ភារបន្សល់ទុក៖ ម៉ូតូ២គ្រឿង (១-ម៉ូតូម៉ាក PCX ០១គ្រឿង ពណ៌ស ផលិតឆ្នាំ២០១៥ ពាក់ស្លាកលេខ ភ្នំពេញ 1FN-0209 និងម៉ូតូម៉ាកឃ្យូប៉ិច ពណ៌ខ្មៅ លាយបៃតង ផលិតឆ្នាំ ២០១៨ ពាក់ស្លាកលេខ ភ្នំពេញ HC-4811 (របស់ជនសង្ស័យ) ។

ប្រភពពីសមត្ថកិច្ចបានឲ្យដឹងថា កាលពី ថ្ងៃទី២៣ ខែមេសា ឆ្នាំ២០១៩ វេលាម៉ោង ២៣ និង០០នាទី ជនរងគ្រោះ និងមិត្តភក្តិបានជិះម៉ូតូ០១គ្រឿង ចេញពីកន្លែងធ្វើការ ដោយធ្វើដំណើរដល់ចំណុចកើតហេតុខាងលើ ស្រាប់តែមានជនសង្ស័យ០១ក្រុម មានគ្នា០៤នាក់ ជិះម៉ូតូ០៣គ្រឿង មកជិតជនរងគ្រោះរួចធ្វើសកម្មភាពឆក់យកទូរសព្ទ័ដៃពីជនរងគ្រោះបាន រួចបំរ៉ុងជិះម៉ូតូគេចខ្លួន តែដៃចង្កូតម៉ូតូរបស់ជនសង្ស័យ បានទាក់ជាមួយដៃចង្កូតជាម៉ូតូរបស់រងគ្រោះបណ្តាលឲ្យដួលម៉ូតូទាំងអស់គ្នា ហើយជនសង្ស័យបានរត់ឡើងជិះម៉ូតូបក្ខពូកគេចខ្លួន ដោយបន្សល់ទុកម៉ូតូជនសង្ស័យដួល០១គ្រឿង នៅកន្លែងកើតហេតុ រួចជនរងគ្រោះបានមកដាក់ពាក្យបណ្តឹងនៅប៉ុស្តិ៍រដ្ឋបាលភ្នំពេញថ្មី ។ បន្ទាប់មកសមត្ថិកិច្ចយើងបាន ស្រាវជ្រាវ លុះដល់ថ្ងៃទី០២ ខែឧសភា ឆ្នាំ២០១៩ វេលាម៉ោង ១១ និង០០នាទី បានឃាត់ខ្លួនក្រុមជនសង្ស័យនៅចំណុចខាងលើបាន០៣នាក់តែម្តងចំណែកបក្ខពួកជនសង្ស័យឈ្មោះ សរ សំណាង បានគេចខ្លួន ។

បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធី៕ តុង សីហា