កុងតឺន័រក្រុមហ៊ុនតេងឡាយ បត់ឆ្លងផ្លូវបុកកៀរម៉ូតូសេ១២៥ខ្ទេច របួសធ្ងន់ម្នាក់

ភ្នំពេញ ៖ បុរសម្នាក់រងរបួសជើងធ្ងន់ ខណៈដែលកំពុងជិះម៉ូតូធ្វើដំណើរតាមផ្លូវ ត្រូវបានរថយន្តកុងតឺន័ររបស់ក្រុមហ៊ុនតេងឡាយ បត់ឆ្លងផ្លូវមកបុកកៀរ ដួលចូលក្រោមរថយន្ត កាលពីវេលាម៉ោង១០និង៤៥នាទីព្រឹក ថ្ងៃទី១២ ខែឧសភា ឆ្នាំ២០១៩ ស្ថិតនៅតាមបណ្តោយមហាវិថី ឈ្នះ ឈ្នះ ភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ ។

តាឞប្រភពបានឲ្យដឹងថា មុនកើតហេតុ រថយន្តបង្កប្រភេទកុងតឺន័រ ម៉ាក FUSO ពណ៌បៃតង ពាក់ស្លាកលេខ ភ្នំពេញ 3C-0637 ជារថយន្តរបស់ក្រុមហ៊ុន ផែស្ងួត តេង ឡាយ បើកល្បឿនលឿន គ្មានគោរពសិទ្ធអ្នកដទៃ ពីជើងទៅត្បូង ដល់ចំណុចកើតហេតុ បត់ឆ្លងផ្លូវវឹង ចូលទៅគន្លងផ្លូវអថិភាព យានម្ខាងទៀត ជ្រុលទៅបុកកៀរជាមួយម៉ូតូ ម៉ាកហុងដា សេ១២៥ ស៊េរី២០១៨ ពណ៌ខ្មៅ ពាក់ស្លាកលេខ ភ្នំពេញ 1GI-6294 កំពុងធ្វើដំណើរ ពីត្បូងទៅជើង បណ្តាលឲ្យទាំងមនុស្ស ទាំងម៉ូតូចូលក្រោមរថយន្ត រងរបួសជើងធ្ងន់ ម៉ូតូរងខូចខាត ។

ចំពោះករណីបង្កគ្រោះថ្នាក់ខាងលើ សមត្ថកិច្ចចុះទៅពិនិត្យ ដល់កន្លែងកើតហេតុ វាស់វែងដើម្បីឲ្យភាគីទាំងសងខាងធ្វើការសម្របសម្រួលគ្នា ៕ សុខាសែនជ័យ