សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ ជនសង្ស័យចំនួន២នាក់ ត្រូវបានកម្លាំងជំនាញ នៃអធិការដ្ឋាននគរបាល ស្រុករតនៈមណ្ឌល ចុះបង្រ្កាបឃាត់ខ្លួនដាំដំណាំកញ្ឆាហាមឃាត់ខុសច្បាប់ខណៈនោះជនសង្ស័យបានយកកាំភ្លើងកែច្នៃបម្រុងបាញ់មកលើសមត្ថកិច្ច ប៉ុន្តែត្រូវសមត្ថកិច្ចភ្ជង់ទាន់ វ៉ៃដាក់ខ្នោះបញ្ជូនមកកាន់អធិការដ្ឋាននគរបាលស្រុក ដើម្បីអនុវត្តតាមនីតិវិធីច្បាប់ទៅលើជនសង្ស័យទាំង២នាក់ ហើយនៅថ្ងៃទី២៣ ខែឧសភា ឆ្នាំ២០១៩ ត្រូវបានកម្លាំងការិយាល័យជំនាញនៃស្នងការដ្ឋាននគរបាលខេត្តបាត់ដំបង កសាងសំណុំរឿងចាប់បញ្ជូនទៅកាន់តុលាការដើម្បីចាត់ការតាមផ្លូវច្បាប់នោះហើយ ។
លោកអនុសេនីយ៍ឯក ឈុន រុន អធិការរងនគរបាលស្រុករតនៈមណ្ឌលបានបញ្ជាក់ថា កិច្ចប្រតិបត្តិការនេះ ខាងលើបានធ្វើឡើង កាលពីថ្ងៃទី២២ ខែឧសភា ឆ្នាំ២០១៩ វេលាម៉ោង១០ព្រឹក នៅចំណុចភូមិជីសាង ឃុំត្រែង ស្រុករតនៈមណ្ឌល ខេត្តបាត់ដំបង ដោយកម្លាំងជំនាញ សហការជាមួយកម្លាំងនគរបាលប៉ុស្តិ៍ត្រែង។
លោកអធិការរងបានបន្តថា បន្ទាប់ពីបានដឹងថា មានការលបលួច ដាំដោយខុសច្បាប់នូវរុក្ខជាតិញៀន(កញ្ឆា) រួចមក លោកបានដឹកនាំកម្លាំង ចុះទៅដល់ត្រង់ចំណុចខាងលើ នៅពេលនោះដែរក្រុមជនសង្ស័យ ដែលមានគ្នា២នាក់បានស្ទុះទាញកាំភ្លើងកែច្នៃ ដោយមានចេតនាចង់តដៃ ប៉ុន្តែដោយសារកម្លាំងមានភាពរហ័សរហួន បានភ្ជង់ជាប់មិនឲ្យជនទាំងនេះកម្រើកខ្លួនបាន ។
ជនសង្ស័យមាន ឈ្មោះ ឆុន ឆិ ភេទប្រុស អាយុ៤០ឆ្នាំ (អ្នកដាំកញ្ឆា) និង ឈ្មោះ ហេង លីហ៊ួត ហៅ ស្ដេចខ្មោច ភេទប្រុស អាយុ៣៥ឆ្នាំ (ជាអ្នកផ្តល់ដីដាំកញ្ឆា) អ្នកទាំងពីរ រស់នៅភូមិ-ឃុំ ខាងលើ ។ សមត្ថកិច្ចត្រួតពិនិត្យ រកឃើញដកហូតនូវវត្ថុតាង កញ្ឆាស្រស់ ចំនួន៣០០ដើម អាវុធខ្លីកែច្នៃចំនួន១ដើម ក្បាលគ្រាប់អាវុធ M ១៦ចំនួន ២៦ គ្រាប់ គ្រាប់កង់ ចំនួន ៣ គ្រាប់ ឧបករណ៍ បំផ្ទុះក្បាលគ្រាប់ ចំនួន៣ និង គីបផាវ(រំសេវ) មួយចំនួន ៕ សំ វិច្ឆិកា
