សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ រថយន្តហីយ៉ាន់ដាយមួយគ្រឿង ដែលដឹកធុងហ្គាសបើកលឿនមិនប្រយ័ត្នដាច់ហ្វ្រាំង ជ្រុលបុករថយន្តដឹកដីពីក្រោយ បណ្តាលឲ្យធ្លាក់ធុករាយប៉ាយពេញផ្លូវ ធ្វើឲ្យអ្នកដំណើរ និងអ្នកនៅជិតភ័យព្រលឹងចុងសក់ថែមទាំងស្ទះចរាចរណ៍ទៀតផង កាលពីវេលាម៉ោង១២ថ្ងៃត្រង់ ថ្ងៃទី៣១ ខែឧសភា ឆ្នាំ២០១៩ នៅចំណុចខាងកើតផ្សារបែកចាន តាមបណ្តោយផ្លូវជាតិលេខ៤ ស្រុកអង្គស្នួល ខេត្តកណ្តាល ។
តាមសាក្សីបានឲ្យដឹងថា មុនពេលកើតហេតុ គេបានឃើញរថយន្តដឹកដីមួយគ្រឿងធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែមានរថយន្តហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 2D 8244 ដែលដឹកធុងហ្គាស សម្រាប់ផ្សាដែក ។ ពេលរថយន្តធ្វើដំណើរមកពីក្រោយក្នុងល្បឿនលឿន ដោយដាច់ហ្វ្រាំង ចាប់មិនជាប់ក៏ជ្រុលបុកគូទរថយន្តដឹកដីពេញទំហឹង បណ្តាលឲ្យធ្លាក់ធុងហ្គាស រាយប៉ាយពេញផ្លូវតែមិនផ្ទុះ មិនបណ្តាលឲ្យមនុស្សរងរបួសនោះទេ ភ្លាមនោះ រថយន្តដឹកដី មិនបានឈប់ ក៏បន្តដំណើទៅបាត់ ចំណែកម្ចាស់រថយន្តបង្ក និងព្រូចុះពីលើរថយន្តគេចខ្លួនបាត់ ។
ក្រោយកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុ និងស្ទូចរថយន្តទៅរក្សាទុកនៅស្នងការខេត្តរងចាំដោះស្រាយតាមក្រោយ ៕ សុខាសែនជ័យ
