សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យចំនួន៣នាក់ ដែលបានធ្វើសកម្មភាពឆក់ទូរស័ព្ទ ប្រជាពលរដ្ឋតាមដងផ្លូវត្រូវបានសមត្ថកិច្ចនគរបាលខណ្ឌទួលគោក ស្រាវជ្រាវជាប់ខ្លួនបានជាបន្តបន្ទាប់ ប្រព្រឹត្តកាលពីថ្ងៃទី០៨ ខែ មិថុនា ឆ្នាំ២០១៩ ម៉ោងជាង៦ព្រឹក នៅចំណុចមុខផ្ទះលេខ៩០៤ ផ្លូវលេខ១២៨ ក្រុមទី១៧ ភូមិ៥ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ រហូតមកដល់ថ្ងៃទី១៣ ខែមិថុនា ឆ្នាំ២០១៩នេះ ។
សមត្ថកិច្ចបានឲ្យដឹងថា ជនសង្ស័យទាំង៣នាក់ រួមមាន ៖ ១-ឈ្មោះ ឃឿន ឃន ហៅ ឃន អាយុ២៩ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះជួលមិនចាំលេខ សង្កាត់ទំនប់ទឹក ខណ្ឌឬស្សីកែវ រាជធានីភ្នំពេញ (ជាអ្នកឆក់) ។ ២-ឈ្មោះ រឿន រិត ហៅ វែង អាយុ២៩ឆ្នាំ ជនជាតិខ្មែរ មុខរបរ បុគ្គលិកការ៉ាស់ លាងឡាន BMKS ស្នាក់នៅបណ្ដោះអាសន្ននៅ យានដ្ឋានលាងឡាន BMKS ផ្លូវបេតុង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ (ជាអ្នកសមគំនិត) ។ ៣-ឈ្មោះ ង៉ែត សុផាយុត ហៅ យុត អាយុ ២៣ឆ្នាំ ជនជាតិខ្មែរ មុខរបរ ជាងជួសជុលម៉ូតូ ស្នាក់នៅផ្ទះលេខ១៥ ផ្លូវសុកហុក សង្កាត់អូរឬស្សីទី៤ ខណ្ឌ៧មករា រាជធានីភ្នំពេញ (ជាអ្នកសមគំនិត) ។
វត្ថុតាងដកហូតរួមមាន ៖ -ម៉ូតូ០១គ្រឿងម៉ាក Suzuki NeX ពណ៌ស ពាក់ស្លាកលេខ ភ្នំពេញ 1CV-1509 , ទូរស័ព្ទដៃ០១គ្រឿងម៉ាក I phone 6 plus និងធ្វើតេស្តិ៍រកសារធាតុញៀនក្នុងទឹកនោមជនសង្ស័យទាំង០៣នាក់នេះ ជាលទ្ធផលបង្ហាញថា វិជ្ជមាន (មានសារធាតុញៀនទាំង០៣នាក់) ។
បច្ចុប្បន្ន ជនសង្ស័យ កំពុងឃាត់ខ្លួនជាបណ្ដោះអាសន្ននៅ អធិការដ្ឋាន នគរបាលខណ្ឌទួលគោកដើម្បីសាកសួរ និងចាត់ការ បន្តតាមនីតិវិធី ៕ ជ្រោយពេជ្រ
