សារព័ត៌មាន នគរវត្ត តែងតែនាំមុខគេជានិច្ច
មន្ត្រីបរិស្ថានខេត្តពោធិ៍សាត់ មិនដែលខ្វល់សោះឡើយ ចំពោះបញ្ហានៃដំណើរទៅរកការរលាយសូន្យទាំងស្រុងព្រៃឈើតំបន់ដែនជម្រកសត្វព្រៃភ្នំឱរ៉ាល់ ។ ពួកឈ្មួញ កំពុងប្រជែងគ្នាដឹកឈើចេញពីតំបន់ព្រៃការពារ ។ រីឯក្រសួងបរិស្ថាន ក៏មិនដែលឃើញមានប្រតិកម្មយ៉ាងណានោះដែរ ។ បើតាមសេចក្តីរាយការណ៍ពីឈ្មួញអ្នករកស៊ីដឹកឈើនៅខេត្តពោធិ៍សាត់បានឲ្យដឹងថា ឈ្មួញល្បីឈ្មោះយូរឆ្នាំម្នាក់ តាហយ ឬកោះ សំភី ជាអ្នកដែលធ្វើសកម្មភាពយ៉ាងខ្លាំងក្លាក្នុងការឈរចាំទិញឈើពីតំបន់ព្រៃការពារ ក្នុងស្រុកភ្នំក្រវាញ ។ រថយន្តច្រើនគ្រឿង ក៏ដូចជារោងម៉ាស៊ីនខ្សែពីរកន្លែងកំពុងធ្វើសកម្មភាពនៅចំណុចស្រែវាល ស្រែវាក ស្ថិតក្នុងឃុំរកាត ស្រុកភ្នំក្រវាញ ។ ឈើត្រូវបានដឹកចេញពីតំបន់ការពារ ចូលមកក្នុងរោងម៉ាស៊ីនទាំងពីរកន្លែងនេះ ។
មន្ត្រីបរិស្ថានជាពិសេសប្រធានស្នាក់ការឈ្មោះ បឺត ជាអ្នកចាំប្រមូលប្រាក់ ឬចាំយកលុយពីតា ហយ ។ ប្រភពបានរាយការណ៍ថា ឈើដែលដឹកចេញពីតំបន់ដែនជម្រកយកមកស្តុកនៅចំណុចបាតខ្ទះ ស្ថិតក្នុងភូមិក្សេតបុរី ឃុំសន្ទ្រែ ស្រុកភ្នំក្រវាញ ហើយនៅពេលមានឱកាស គេដឹកបន្តមកស្តុកនៅឃុំឈើតុំ ស្រុកក្រគរ ខេត្តពោធិ៍សាត់ ។ តាហយ ឬ កោះ សំភី ជាឈ្មួញដ៏សំខាន់ម្នាក់ក្នុងចំណោម ៣នាក់ ដែលកំពុងដាក់ផែនការកម្ទេចឲ្យអស់ព្រៃឈើនៅតំបន់ដែនជម្រកសត្វព្រៃភ្នំឱរ៉ាល់ ខេត្តពោធិ៍សាត់ ។ គាត់មានរថយន្តដឹកឈើច្រើនគ្រឿង អាចធ្វើសកម្មភាពជាចំហរ ដោយមិនញញើតសមត្ថកិច្ច ជំនាញនោះឡើយ ។ ពួកមេព្រៃខេត្តពោធិ៍សាត់មិនខ្វល់ចំពោះបញ្ហានៃការដឹក ឈើនោះទេ ពីព្រោះថា ពួកគេគ្រាន់តែយកលុយពីឈ្មួញឈើឆ្លងកាត់ ដែនសមត្ថកិច្ចរបស់ខ្លួនតែប៉ុណ្ណោះ ។
ពួកមន្ត្រីបរិស្ថានប្រជែងគ្នាដើម្បីលាភសក្ការ ក្រោមការសម្របសម្រួលពីអតីតមន្ត្រីឧទ្យានុរក្ស ឈ្មោះ ភួង ស្រៀវ ដែលជាអ្នកស្គាល់
មន្ត្រី និងសមត្ថកិច្ចនានានៅតំបន់នោះច្បាស់ដូចបាតដៃ ។ ភួង ស្រៀវ ជាអ្នកសម្របសម្រួល ឬជាអ្នកយកលុយពីឈ្មួញចែកឲ្យសមត្ថកិច្ច មិនថា ក្រុមមន្ត្រីបរិស្ថាន ឬមេព្រៃនោះទេ គឺត្រូវតែទាក់ទង ភួង ស្រៀវ ហើយភួង ស្រៀវ ជាអ្នកបោះមេ រវាងឈ្មួញ នឹងសមត្ថកិច្ច ។ ពួកឈ្មួញនិយាយថា នៅពេលដែលពួកមន្ត្រីបរិស្ថានប្រជែងគ្នាក្នុងផលប្រយោជន៍រៀងៗខ្លួននោះ ដូច្នេះពួកគេ មិនខ្វល់ពីការប្រឈមនឹងការចាប់ចងអ្វីឡើយ ។ រីឯថៅកែឈើ កោះ សំភី ឬ ហ៊ុំ ហយ ក៏ងាយស្រួលក្នុងការរកស៊ីផងដែរ ៕
