សារព័ត៌មាន នគរវត្ត តែងតែនាំមុខគេជានិច្ច
គេរាយការណ៍ថា លោក ណម ពិសិដ្ឋ ប្រធានមន្ទីរសេដ្ឋកិច្ច និងហិរញ្ញវត្ថុខេត្តសៀមរាបធុំក្លិនមិនស្រួល ព្រោះតែប្រព្រឹត្តអំពើពុករលួយច្រើនរូបភាព ដែលបណ្តាមន្ទីរផ្សេងៗជុំវិញខេត្តរអ៊ូរទាំគ្រប់ៗគ្នា ។ ប្រភពបន្ថែមថា ការកាត់ភាគរយពីតាមមន្ទីរអង្គភាពជុំវិញខេត្ត គឺជារឿងមួយដែលបានកើតមានជាទូទៅ នៅតាមមន្ទីរហិរញ្ញវត្ថុនានាទូទាំងប្រទេស ប៉ុន្តែសម្រាប់លោក ណម ពិសិដ្ឋ ប្រកាសជាចំហរចំពោះការកាត់ប្រាក់ភាគរយនៅតាមមន្ទីរនានា ដែលគេហៅថា ទឹកតែ ដោយលោកអះអាងថា ដើម្បីរួមចំណែកចុះមូលដ្ឋាន ។ នៅពេលដែលលោកមានប្រសាសន៍យ៉ាងដូច្នេះ គឺគ្មាននរណាហ៊ានតវ៉ានោះឡើយ ។ គេមិនដឹងថា តើករណីនេះ លោកអភិបាលខេត្តសៀមរាប និងលោករដ្ឋមន្ត្រីក្រសួងសេដ្ឋកិច្ច ហិរញ្ញវត្ថុបានជ្រាបដែរឬទេ? នេះគឺជារឿងមួយ ។
ឯរឿងមួយទៀតនោះ គឺមានលាយឡំនឹងអំពើពុករលួយ ក្នុងការស្តារស្ទឺងសៀមរាប ដែលលោក ណម ពិសិដ្ឋ សហការជាមួយក្រុមហ៊ុនរាជសី នាគ្រាកន្លងមក ។ ប្រភពរាយការណ៍ថា ការស្តារស្ទឹងសៀមរាបមានពាក់ព័ន្ធជាមួយលោក ណម ពិសិដ្ឋ ដោយមានភាពមិនប្រក្រតីជាច្រើន ។ គេរាយការណ៍ថា គ្រាន់តែអាចម៍ដី ដែលបានជីកកកាយពីមាត់ស្ទឹងសៀមរាបយកទៅចាក់បំពេញនៅក្នុងដីឡូត៍ លោក ណម ពិសិដ្ឋ ក៏ជារឿងមួយមានភាពមិនប្រក្រតីដែរ ។ ករណីនេះ ត្រូវបានមន្ត្រីសាលាក្រុងសៀមរាបអះអាងថា សកម្មភាពដែលបានធ្វើឡើងក្នុងការស្តារស្ទឹងសៀមរាបដោយក្រុមហ៊ុនរាជសីមានពាក់ព័ន្ធនឹងអំពើពុករលួយជាមួយលោក ណម ពិសិដ្ឋ ។ គេមិនដឹងថា តើថ្នាក់ដឹកនាំខេត្តសៀមរាប មានពាក់ព័ន្ធនឹងបញ្ហានេះជាមួយលោកណម ពិសិដ្ឋ ដែរឬយ៉ាងណានោះទេ ។ ប៉ុន្តែគេកត់សម្គាល់ឃើញថា មិនដែលមានប្រតិកម្មអំពីមន្ត្រីថ្នាក់ដឹកនាំខេត្តជុំវិញការស្តារស្ទឹងសៀមរាបនោះទេ ។
មន្ត្រីរាជការជុំវិញសាលាខេត្តសៀមរាបខ្សឹបខ្សៀវគ្នាតាមតុកាហ្វេថា អំពើពុករលួយរបស់ប្រធានមន្ទីរសេដ្ឋកិច្ច និងហិរញ្ញវត្ថុបានក្លាយទៅជាទម្លាប់ ដែលគ្មាននរណាអាចតវ៉ាបាន ហើយបញ្ហាដែលបានកើតឡើងនៅតាមមន្ទីរនានា ជាពិសេសការកាត់ប្រាក់ភាគរយ ឬថ្លៃទឹកតែ តែងតែកើតមានតាំងពីដើមរៀងមក ។ ចំណុចនេះ មន្ត្រីប្រធានស្ថាប័ននានានៅតាមអង្គភាពជុំវិញសាលាខេត្តសៀមរាបអះអាងថា គួរតែបញ្ចប់វប្បធម៌បែបនេះទៅ ។ មន្ត្រីទាំងនោះសំណូមពរឲ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុពិនិត្យមើលប្រធានមន្ទីរនៅខេត្តសៀមរាបផង ពីព្រោះលោកបានប្រព្រឹត្តអំពើពុករលួយល្មមឆ្អែតឆ្អន់ហើយ ។ អំពើពុករលួយពេលនេះ បែរជាយកការងារធ្វើជាលេសដើម្បីប្រយោជន៍បុគ្គលថែមទៀតផង ៕
