សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅថ្ងៃទី៤ ខែសីហា ឆ្នាំ២០១៩ នៅម៉ោង៨ព្រឹក ចំណុចសួនមនោរម្យផ្លូវសហពន្ធរុស្សី ភូមិ២ សង្កាត់មនោរម្យ ខណ្ឌ៧មករា កម្លាំងអធិការដ្ឋាននគរបាលខណ្ឌ៧មករាបានឃាត់ខ្លួនជនសង្ស័យម្នាក់ករណី ឆក់ខ្សែក ។
សមត្ថកិច្ចបានឲ្យដឹងថា ជនសង្ស័យ ឈ្មោះ ប៊ាន ឆៃយ៉ា អាយុ២០ឆ្នាំ មុខរបរ ជាងថតរូប ស្នាក់នៅផ្ទះអត់ស្គាល់លេខ ផ្លូវ២០០៤ សង្កត់ទឹកថ្លា ខណ្ឌសែនសុខ (ពិនិត្យទឹកនោមគ្មានសារធាតុញៀន) ។ ចំណែកជនរងគ្រោះឈ្មោះ ថាយ យ៉ុម ភេទស្រី អាយុ៣៤ឆ្នាំ បុខរបរ កម្មកររោងចក្រស្នាក់នៅផ្ទះជួលគ្មានលេខផ្លូវលំ ភូមិស្លែងរលើង សង្កាត់ទឹថ្លា ខណ្ឌសែនសុខ ។
សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបានជិះម៉ូតូ២នាក់បងស្រី ដោយបងស្រីជាអ្នកឌុបចេញពីផ្ទះជួល គោលបំណងមករកទិញឥវ៉ាន់នៅផ្សារកណ្តាល ។ លុះដល់ចំណុចសួនមនោរម្យក៏ស្រាប់តែមានជនសង្ស័យម្នាក់ជិះម៉ូតូម៉ាកស្កុបពី ពណ៌ ស ០១ឝ្រឿង គ្មានស្លាកលេខ ពាក់អាវ ស ដៃវែង បានធ្វើសកម្មភាពឆក់ខ្សែក ពីជនរងគ្រោះបានសម្រេច ហើយបើកម៉ូតូគេចខ្លួន ភ្លាមនោះជនរងគ្រោះបានជិះម៉ូតូតាមពីក្រោយស្វែងរក លុះដល់ចំណុចមុខអាគាលេខ23 ផ្លូវ139 សង្កាត់វាលវង់ ខណ្ឌ៧មករា ក៏បានឃើញជនសង្ស័យកំពុងឈប់ម៉ូតូដោះអាវសដៃវែងចេញ ក៏បានឃាត់ខ្លួន រួចប្រគល់ឲ្យនគរបាលប៉ុស្តិ៍មនោរម្យ និងបានដាក់ពាក្យបណ្តឹងទៅលើជនសង្ស័យ ។
វត្ថុតាង និងសម្ភារដកហូតរួមមាន៖ ម៉ូតូ០១គ្រឿងម៉ាក ស្កុបពីពណ៌ស គ្មានស្លាកលេខ អាវពណ៌ស ដៃវែង ចំនួន ០១, កាបូបស្ពាយចំនួន០១, ទូរស័ព្ទ ០១ គ្រឿង ម៉ាកអាហ្វូន សម្ភារបាត់បង់រួមមាន ៖ ខ្សែកមាស ០១ខ្សែទម្ងន់៥ជី ។
បច្ចុប្បន្នជនសង្ស័យកំពុងឃាត់ខ្លួននៅអធិការនគរបាលខណ្ឌ៧មករា ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី ៕ ជ្រោយពេជ្រ
