សារព័ត៌មាន នគរវត្ត តែងតែនាំមុខគេជានិច្ច
អ្នកនាំពាក្យក្រសួងការបរទេសចិន លោក Geng Shuangបានឲ្យដឹងនៅថ្ងៃពុធនេះថា ក្រុងប៉េកាំងបានព្រមានថា ការសម្រេចចិត្តរបស់សហរដ្ឋអាមេរិក ចំពោះការអនុម័តលក់អាវុធទៅឲ្យកោះតៃវ៉ាន់ គឺជារឿងខុសច្បាប់ បំពានច្បាប់ចិនតែមួយ ហើយ ទីក្រុងប៉េកាំង នឹងដាក់ទណ្ឌកម្មទៅលើ ក្រុមហ៊ុនអាមេរិក ។
កាលពីខែកក្កដា កន្លងទៅនេះ ក្រុងប៉េកាំង បានព្រមានរដ្ឋាភិបាលក្រុងវ៉ាស៊ីនតោន ចំពោះការជ្រៀតជ្រែកចូលកិច្ចការផ្ទៃក្នុងរបស់កោះតៃវ៉ាន់ និងបានទាមទារឲ្យសហរដ្ឋអាមេរិក បញ្ឈប់រាល់ទំនាក់ទំនងផ្លូវការ និងយោធារវាងទីក្រុងវ៉ាស៊ីនតោន និងតៃប៉ិ ប៉ុន្តែក្រុងវ៉ាស៊ីនតោនដូចជានៅតែធ្វើមិនដឹងមិនលឺ ចំពោះការព្រមាននេះដដែល ។
ចិនបានព្រមានថា ខ្លួននឹងដាក់ទណ្ឌកម្មទៅលើបណ្តាក្រុមហ៊ុនអាមេរិក ដែលសម្រេចលក់អាវុធទៅឲ្យកោះតៃវ៉ាន ក្រោយរដ្ឋាភិបាលអាមេរិក ប្រកាសលក់គ្រឿងសព្វាវុធ ក្នុងនោះមានយន្តហោះចម្បាំងផងដែរ មានតម្លៃ រហូតដល់ជាង៨ពាន់លានដុល្លារអាមេរិក ។
អ្នកនាំពាក្យក្រសួងការបរទេសចិន បានប្រកាសថា ចិននឹងដាក់ទណ្ឌកម្មទៅលើបណ្តាក្រុមហ៊ុនអាមេរិក ដែលបានលក់អាវុធទៅឲ្យកោះតៃវ៉ាន់ ព្រោះនេះជាការបំពាន់ច្បាប់តែមួយរបស់រដ្ឋាភិបាលទីក្រុងប៉េកាំង ។ ជាមួយគ្នានេះដែរ ចិនបានស្នើដល់អាមេរិក ឲ្យឈប់ទំនាក់ទំនងយោធាជាមួយតៃវ៉ាន ដោយសារតែកោះតៃវ៉ាន់ គឺជាផ្នែកមួយ នៃទឹកដីរបស់ប្រទេសចិន ដោយមិនអាចកាត់ផ្តាច់ពីគ្នាបាន ។
កាលពីថ្ងៃទី២០ ខែសីហា ក្រសួងការពារជាតិអាមេរិក បានសម្រេចអនុម័តលក់យន្តហោះចម្បាំង ប្រភេទF-16 ចំនួន៦៦គ្រឿងទៅឲ្យកោះតៃវ៉ាន់ ។ លោក Derek Grossman អ្នកឯកទេសវិភាគស្តីពីសកម្មភាពការពារជាតិអាមេរិក បានវាយតម្លៃថា «ខ្ញុំគិតថា ការព្រមានដាក់ទណ្ឌកម្មរបស់ចិន គឺជារឿងស្រមើស្រមៃនោះទេ ។ កន្លងមក អាមេរិកបានលក់រថក្រោះ ប្រភេទ Abrams មានតម្លៃ២ពាន់លានដុល្លារ ទៅឲ្យកោះតៃវ៉ាន់ រួចមកហើយ ។ ប៉ុន្ដែនៅពេលនោះ ចិនក៏ធ្លាប់ព្រមានដាក់ទណ្ឌកម្មដល់ក្រុមហ៊ុនអាមេរិកដូចគ្នានេះដែរ ប៉ុន្តែមិនមានលទ្ធផលអ្វីឡើយ ។
តៃវ៉ាន់ បានគ្រប់គ្រងស្វ័យភាព ចាប់តាំងពីឆ្នាំ១៩៤៩មកម៉្លេះ ប៉ុន្តែចិននៅតែចាត់ទុកកោះតៃវ៉ាន់ គឺជាផ្នែកមួយ នៃទឹកដីចិន ដោយមិនអាចកាត់ផ្តាច់បានឡើយ ។ លុះមកដល់អំឡុងឆ្នាំ១៩៧៩ អាមេរិកបានផ្លាស់ប្តូរទំនាក់ទំនងការបរទេស ពីកោះតៃវ៉ាន ងាកទៅរកទីក្រុងប៉េកាំងវិញ ដោយបានចុះកិច្ចព្រមព្រៀង ជាមួយចិន គោរពច្បាប់ចិនតែមួយ ។ ដូច្នេះការលក់អាវុធរបស់អាមេរិកទៅឲ្យកោះតៃវ៉ាន់ គឺជាការបំពាន់លើច្បាប់ចិនតែមួយ៕
