សារព័ត៌មាន នគរវត្ត តែងតែនាំមុខគេជានិច្ច
រដូវទឹកសម្រក គឺជារដូវដែលប្រមូលបានផលនេសាទបានច្រើន។ ផលនេសាទទាំងនោះមិនសម្រាប់ប្រជាជនកម្ពុជាម្ចាស់ស្រុកនោះទេ ប៉ុន្តែអាជ្ញាធរស្រុកបុរីជលសា ខេត្តតាកែវបានលក់ផលនេសាទទាំងនោះឲ្យទៅឈ្មួញវៀតណាមតាមរយៈការដាក់ដាយកាត់ទន្លេ៣កន្លែង ស្ថិតក្នុងឃុំកំពង់ក្រសាំង ស្រុកបុរីជលសា ខេត្តតាកែវ នៅចំណុចអតីតឡូត៍លេខ៥ ។ អ្នកភូមិ ក៏ដូចជាសហគមន៍នេសាទក្នុងឃុំកំពង់ក្រសាំង អះអាងថាអភិបាលស្រុកបុរី ជលសា លោក ទុយ សុភក្ត្រ និងមេឃុំកំពង់ក្រសាំងឃុបឃិតគ្នាអនុញ្ញាតឲ្យឈ្មួញវៀតណាមដាក់ដាយកាត់ទន្លេនោះ ។
នៅទីនោះល្បីល្បាញថាសម្បូរត្រី ដែលគេអាចប្រមូលបានត្រីគ្រប់ប្រភេទរាប់សិបតោនក្នុងមួយថ្ងៃៗ ។ តាមរយៈដាយ៣កន្លែងនោះ ឈ្មួញវៀតណាម អាចប្រមូលត្រីគ្រប់ប្រភេទរាប់សិបតោនក្នុងមួយថ្ងៃៗ នាំទៅប្រទេសវៀតណាម ដោយមិនរំខានអាជ្ញាធរមានសមត្ថកិច្ចក្នុងខេត្តតាកែវនោះឡើយ ។ ពលរដ្ឋខ្មែរនៅទីនោះបានត្រឹមឈរមើលផលនេសាទដែលជនជាតិវៀតណាមដឹកទាំងទូកៗ ទៅប្រទេសគេតែប៉ុណ្ណោះ ។ បើតាមប្រភពបានបន្ថែមថា ការអនុញ្ញាតឲ្យជនជាតិវៀតណាមចូលមកដាក់ដាយនៅក្នុងទឹកដីខ្មែរនៃស្រុកបុរីជលសានេះ គឺមានការឃុបឃិតពីអាជ្ញាធរដែនដី និងស្ថាប័នជំនាញ គឺខាងរដ្ឋបាលជលផល ។ នៅពេលដែលមានបញ្ហា ទាំងអាជ្ញាធរ ក៏ដូចជាស្ថាប័នជំនាញចោទ និងទម្លាក់កំហុសទៅលើសហគមន៍នេសាទមូលដ្ឋាន នៅគ្រាដែលគេដឹងថា ផលលាភដែលទទួលបានច្រើនជាងគេពីការអនុញ្ញាតឲ្យជនជាតិវៀតណាមចូលមកធ្វើនេសាទក្នុងដីខ្មែរ គឺអាជ្ញាធរដែនដី និងស្ថាប័នជំនាញ ។
អ្នកភូមិនៅតំបន់នោះ បានឲ្យដឹងថា ឆ្នាំនេះទឹកទន្លេបានឡើងយឺតជាងបណ្តាឆ្នាំមុនៗ ពោលគឺទឹកទើបតែឡើងខ្លាំងនៅអំឡុងចុងខែសីហានេះតែប៉ុណ្ណោះ ។ នៅពេលដែលទឹកស្រកទៅវិញលឿន គេអាចដាក់ដាយបានផលនេសាទ(ត្រី) យ៉ាងច្រើនក្នុងមួយថ្ងៃៗ ។ ប្រភពបន្ថែមថា អាជ្ញាធរ និងស្ថាប័នជំនាញ បានដាក់កំហុសទៅលើសហគមន៍នេសាទឃុំកំពង់ក្រសាំងថា ជាអ្នកលក់ទន្លេនោះឲ្យទៅជនជាតិវៀតណាមដាក់ដាយ ។ ប៉ុន្តែសម្រាប់សហគមន៍នៅទីនោះអះអាងថា សមត្ថភាពរបស់ពួកគាត់ គ្មានឡើយសម្រាប់ការលក់ដូរទន្លេឲ្យទៅជនជាតិវៀតណាម ។ គេនិយាយថា បើគ្មានការឃុបឃិតពីអាជ្ញាធរស្រុកបុរីជលសា និងមន្ត្រីជំនាញរដ្ឋបាលជលផលទេនោះ គឺឈ្មួញវៀតណាមមិនអាចចូលមកនេសាទក្នុងដីខ្មែរបានឡើយ ។ ប្រជានេសាទសំណូមពរឲ្យលោក អ៊ូច ភា អភិបាលខេត្តតាកែវ ក៏ដូចជាអគ្គនាយកដ្ឋានរដ្ឋបាលជលផលពិនិត្យរឿងនេះផង ពីព្រោះវាមិនខុសពីការដែលអនុញ្ញាតឲ្យជនជាតិវៀតណាមចូលមកជួលដីខ្មែរធ្វើស្រែនោះដែរ ៕
