សារព័ត៌មាន នគរវត្ត តែងតែនាំមុខគេជានិច្ច
ហ្វីលីពីន ៖ កញ្ញា ប៉ូគីមថេង សុធីតា បានចាកចេញពីកម្ពុជាកាលពីថ្មីៗនេះដើម្បីចូលរួមប ព្រឹត្តិការណ៍ប្រកួតសម្រស់ Miss Asia Pacific International 2019 នៅប្រទេសហ្វីលីពីន។ នាងបានធ្វើឲ្យគេសរសើរខ្លាំងក្រោយពីបានគ្រងឈុតតំណាងជាតិ «ស្បៃធំខ្មែរ» បង្ហាញមុខលើឆាកអន្តរជាតិ។
ព្រឹត្តិការណ៍ប្រកួតសម្រស់ Miss Asia Pacific International 2019 ត្រូវបានរៀបចំការប្រកួតចាប់ពីថ្ងៃទី០៤ខែតុលា ឆ្នាំ២០១៩ ដោយមានបេក្ខនារីមកពីបណ្តាប្រទេសចំនួន៥៥ចូលរួមប្រកួត ។ ការប្រកួតផ្តាច់ព្រ័តនឹងត្រូវធ្វើឡើងនៅថ្ងៃទី០៩ ខែកញ្ញាឆ្នាំ ២០១៩នេះ។ កញ្ញា ប៉ូ គីមថេងសុធីតា គឺជាតារាបង្ហាញម៉ូតមួយរូប ដែលមានរូបសម្រស់ស្រស់សោភា និងមានទេពកោសល្យលើវិស័យម៉ូដែលច្រើន រួមផ្សំនឹងចំណេះដឹងទូទៅទូលំទូលាយ សាកសមតំណាងកម្ពុជា ទៅប្រកួតក្នុងកម្មវិធីលំដាប់អន្តរជាតិ។ នាងបានចាកចេញពីកម្ពុជាកាលពីថ្ងៃទី២៦ខែកញ្ញាកន្លងទៅដើម្បីចូលរួមប្រកួតកម្មវិធីកញ្ញាឯកអាស៊ីប៉ាស៊ីហ្វិកឆ្នាំ ២០១៩ នៅប្រទេសហ្វីលីពីន។ កញ្ញា ប៉ូគីមថេង សុធីតា គឺជាបវរកញ្ញាតំណាងឱ្យប្រទេសកម្ពុជា ក្នុងព្រឹត្តិការណ៍ប្រកួតសម្រស់ទ្រង់ទ្រាយធំមួយនេះ ។ មិនខុសពីបវរកញ្ញាបណ្តាប្រទេសដទៃ ដោយបវរកញ្ញា ប៉ូគីមថេង សុធីតា ក៏ធ្វើបានយ៉ាងល្អផងដែរក្នុងព្រឹត្តិការណ៍ដើរបង្ហាញខ្លួនក្នុងឈុតតំណាងជាតិ «ស្បៃធំខ្មែរ» ។ ការបង្ហាញឈុតដែលឆ្នៃដោយដៃខ្មែរនេះត្រូវបានធ្វើឡើងក្រោយព្រឹត្តិការណ៍ប្រកួតបានធ្វើឡើងជាច្រើនថ្ងៃបន្តបន្ទាប់គ្នា ។
បេក្ខភាពដំណាងពីកម្ពុជានាងបានប្រឹងប្រែងធ្វើបានយ៉ាងល្អ និងអស់ពីលទ្ធភាពក្នុងព្រឹត្តិការណ៍ប្រកួតមួយនេះជាបន្តបន្ទាប់ យ៉ាងមានជំនឿជាក់ក្នុងខ្លួន ដើម្បីទាក់ទាញពិន្ទុ ក៏ដូចជាចិត្តគណៈកម្មការ ។ ក្រៅពីស្លៀកសម្លៀកបំពាក់ប្រពៃណីតំណាងជាតិ និងក៏បានបង្ហាញក្បាច់រាំបែបបុរាណខ្មែរយ៉ាងល្វតល្វន់បង្កប់ដោយអត្ថន័យជ្រាលជ្រៅ។
គួរបញ្ជាក់ដែរថាថ្មីៗនេះក្រុមហ៊ុន Arise Agency នៅកម្ពុជាបានបញ្ចេញឈ្មោះបេក្ខជន និងបេក្ខនារីចំនួន៧រូបដើម្បីចេញទៅប្រកួតផ្នែកសម្រស់ធំៗនៅលើឆាកអន្តរជាតិដោយពួកគេបាននាំយកនូវម៉ូដសម្លៀកបំពាក់ ដែលបង្ហាញពីអត្តសញ្ញាណជាតិខ្មែរ និងប្រពៃណីវប្បធម៌ខ្មែរមួយចំនួនទៀត ។ បេក្ខជនតំណាងកម្ពុជាមានទី១ កញ្ញា សំណាង អេលីណា កញ្ញាឯកចក្រវាលកម្ពុជាឆ្នាំ២០១៩ ចេញទៅប្រកួតក្នុងប្រទេស កូរ៉េខាងត្បូង។ទី២ កញ្ញា ថោង ម៉ាឡា កញ្ញាឯកផែនដីកម្ពុជាឆ្នាំ២០១៩ ចេញទៅប្រកួតក្នុងប្រទេស ហ្វីលីពីន។ទី៣ កញ្ញា ចន សុទីម៉ា កញ្ញាឯកទេសចរណ៍អន្តរជាតិកម្ពុជាឆ្នាំ២០១៩ ចេញទៅប្រកួតក្នុងប្រទេស ម៉ាឡេស៊ី។ទី៤កញ្ញា ប៉ូ គីមថេងសុធីតា កញ្ញាឯកអាស៊ីប៉ាស៊ីហ្វិកអន្តរជាតិកម្ពុជាឆ្នាំ២០១៩ ចេញទៅប្រកួតក្នុងប្រទេស ហ្វីលីពីន។ ទី៥ កញ្ញា បុណ្យ កញ្ចនធីតា កញ្ញាឯកអន្តរជាតិកម្ពុជាឆ្នាំ២០១៩ ចេញទៅប្រកួតក្នុងប្រទេសជប៉ុន។ ទី៦ កញ្ញា គង់ សុជាតា កញ្ញាឯក Asia Awards កម្ពុជាឆ្នាំ២០១៩ ចេញទៅប្រកួតក្នុងវៀតណាមនិងទី៧លោក ទ្រី តារាវុធ ដែលទើបនឹងមកពីការប្រកួតក្នុងកម្មវិធី Man Of The Year Cambodia 2019 ចេញទៅប្រកួតក្នុងប្រទេស មីយ៉ាន់ម៉ា៕ វឌ្ឍនា
