សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យុវជនសង្ស័យម្នាក់ ត្រូវបាន សមត្ថកិច្ចនគរបាលឃាត់ខ្លួន បន្ទាប់ពីស្រវឹងស្រាបានប្រើ ហិង្សាវាយទៅលើជនជាតិចិន ម្នាក់បណ្ដាលឲ្យរងរបួស ធ្ងន់កាលពីថ្ងៃទី២៣ ខែតុលា ឆ្នាំ២០១៩ វេលាម៉ោង ៤និង០៥នាទីទៀបភ្លឺ ត្រង់ចំណុចខាងមុខសាលា វិទ្យាល័យបាវិត ស្ថិតក្នុងភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង ។
យោងតាមសមត្ថកិច្ចនគរបាលក្រុងបាវិតបានឲ្យដឹងថា ជនសង្ស័យមានឈ្មោះ គង់ វ៉ាន់ឌី អាយុ២០ឆ្នាំ ជន ជាតិខ្មែរ មុខរបរបុគ្គលិកកាស៊ីណូ មានទីលំនៅភូមិតាបិប សង្កាត់បាវិត ក្រុងបាវិត ខេត្តស្វាយរៀង ។
ចំណែកជនរងគ្រោះ មិនស្គាល់អត្តសញ្ញាណ ភេទប្រុស ជនជាតិចិន ដោយសន្លប់ស្ដូកស្ដឹង ត្រូវបានបញ្ជួនទៅព្យាបាល នៅមន្ទីរពេទ្យផាសុខភាព២ បាវិត ។
ប្រភពបន្តថា មុនកើតហេតុមានយុវជន សង្ស័យម្នាក់បានផឹកស្រាស្រវឹងជោក ដើរតាមផ្លូវត្រង់ចំណុចខាងមុខសាលាវិទ្យាល័យបាវិត ស្រាប់តែឃើញជនរងគ្រោះសំឡឹងមើលមុខធ្វើឲ្យជនសង្ស័យខឹង ណាមួយស្រវឹងផង ក៏ស្ទុះទៅវាយដោយដៃ បណ្ដាលឲ្យដួលសន្លប់ស្ដូកស្ដឹងបង្កការភ្ញាក់ផ្អើលតែម្ដង ។
បច្ចុប្បន្នជនរងគ្រោះ ត្រូវបានបញ្ជួនទៅព្យាបាល នៅមន្ទីរពេទ្យផាសុខភាព២ បាវិតរីឯជនសង្ស័យ ត្រូវបានសមត្ថកិច្ចនគរបាល ធ្វើការឃាត់ខ្លួន ជាបណ្តោះអាសន្ន នៅប៉ុស្តិ៍នគរបាលរដ្ឋបាល បាវិត ដើម្បីកសាងសំណុំរឿង ចាត់ការតាមច្បាប់ ៕ យឹម សុថាន
