សារព័ត៌មាន នគរវត្ត តែងតែនាំមុខគេជានិច្ច
បទល្មើសនេសាទតាមរយៈការប្រើប្រាស់ឧបករណ៍ខុសច្បាប់បាននិងកំពុងកើតមានយ៉ាងសកម្ម គគ្រឹកគគ្រេងនៅឃុំផាត់សំណាយ ព្រំប្រទល់រវាងស្រុកកំពង់ស្វាយ នឹងស្រុកសន្ទុកក្នុងដែនសមត្ថកិច្ច នាយផ្នែករដ្ឋបាលជលផលផាត់សណ្តាយ លោក យ៉ាន់ វិសាក់ ហៅសែ ។ ពួកឈ្មួញអ្នករកស៊ីដាក់បទល្មើសនេសាទនៅតំបន់នោះអះអាងថា វាជាធម្មតា និងដូចបណ្តាឆ្នាំមុនៗដែរ អ្នកប្រើប្រាស់ឧបករណ៍ល្មើសច្បាប់សុទ្ធតែត្រូវរ៉ូវជាមួយលោកយ៉ាន់ វិសាក់ ហៅសែ ។ ឆ្នាំនេះ លើសឆ្នាំមុនៗទៅទៀតលើការចំណាយពីព្រោះការបង់ប្រាក់មិនមែនត្រឹមតែផ្នែកប៉ុណ្ណោះទេ គឺត្រូវបង់ឲ្យនាយសង្កាត់ផង និងនាយខណ្ឌផង ។
ក្រុមអ្នកនេសាទល្មើសច្បាប់អះអាងថា មុនដាក់ឧបករណ៍ខុសច្បាប់លើផ្ទៃទឹកបាន គឺត្រូវបង់ប្រាក់ឲ្យនាយផ្នែកជាមុនសិន បន្ទាប់មក គឺត្រូវបង់ឲ្យនាយសង្កាត់ រហូតដល់នាយខណ្ឌ ។ ពួកគេដែលជាមន្ត្រីជលផលអះអាងថា ប្រាក់ទាំងនោះ មិនទុកហោប៉ៅផ្ទាល់ខ្លួនទេ គឺត្រូវបញ្ជូនបន្តទៅឲ្យលោកប្រធានមន្ទីរកសិកម្ម រុក្ខាប្រមាញ់ និងនេសាទ ប៉ែន វណ្ណរិទ្ធ បន្តទៀត ។ រឿងលោកប៉ែន វណ្ណរិទ្ធចែករំលែកថ្នាក់ដឹកនាំខេត្តកំពង់ធំ ឬស៊ីដាច់ម្នាក់ឯងនោះ គ្មាននរណាដឹងទេ ។ ប៉ុន្តែប្រភពបង្ហើបថា លោក ប៉ែន វណ្ណរិទ្ធ ក៏បានបន្តក់ឲ្យថ្នាក់ដឹកនាំ ខេត្តខ្លះៗដែរ បើមិនដូច្នោះទេ ថ្នាក់ដឹកនាំខេត្តមុខជាជំរុញឲ្យបង្ក្រាបបទល្មើស និងស្តីបន្ទោសខ្លះៗជាមិនខាន ។
នៅតំបន់បឹងទន្លេសាប ខេត្តកំពង់ធំ បទល្មើសច្រើនជាងគេស្ថិតនៅក្នុងដែនសមត្ថកិច្ចលោកយ៉ាន់ វិសាក់ ហៅសែ នេះឯង ។ នរណាក៏ល្បីដែរថា តំបន់ផាត់សណ្តាយ ជាសម្បុកត្រីនៅក្នុងតំបន់បឹងទន្លេសាបក្នុងខេត្តកំពង់ធំ ។ ពួកឈ្មួញអាចដាក់ឧបករណ៍នេសាទល្មើសច្បាប់ដោយសេរី គ្រាន់តែនិយាយជាមួយលោកយ៉ាន់ វិសាក់ ហៅសែឲ្យត្រូវថ្លៃគ្នាប៉ុណ្ណោះ ។ លោកយ៉ាន់ វិសាក់ មិនបានចុះទៅមើលបទល្មើសដោយផ្ទាល់ទេ ពោលគឺមានមេការរបស់ពួកឈ្មួញ អ្នកប្រព្រឹត្តល្មើសទាំងនោះទាក់ទងរួចជាស្រេច ។ ពួកអ្នកនេសាទល្មើសច្បាប់ ក៏បានសែនព្រេនឲ្យថ្នាក់នាយខណ្ឌនោះផងដែរ បើមិនដូច្នោះទេ មុខជាគេចុះមកចាប់យកស្នាដៃជាមិនខាន ។ រីឯលោកយ៉ាន់ វិសាក់ ក៏ជំរុញឲ្យបង់ជូនថ្នាក់លើនោះដែរ ដើម្បីបានសុខទាំងអស់គ្នា ។ ដូច្នេះមានន័យថា លុយមួយផ្នែកតូចប៉ុណ្ណោះ ដែលលោក សែ លួចច្បិចឲ្យថ្នាក់លើ ៕
