សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន២នាក់ បានធ្វើសកម្មភាពឆក់ទូរស័ព្ទដៃពីប្រុសម្នាក់បាន សម្រេចហើយព្យាយាមគេចខ្លួន តែត្រូវបានប្រជាពលរដ្ឋដេញចាប់បានភ្លាមៗ ។
ហេតុការណ៍នេះ បានកើតឡើងម៉ោង២០និង៤០នាទី ថ្ងៃទី២០ ខែវិច្ឆិកា ឆ្នាំ២០១៩ ចំណុចផ្លូវបេតុងទួលពង្រ ភូមិត្រពាំងថ្លឹង១សង្កាត់ចោមចៅទី១ ខណ្ឌពោធិ៍សែនជ័យ ។
សមត្ថកិច្ចបញ្ជាក់ថា ជនសង្ស័យទី១ មានឈ្មោះ អឿន វុទ្ធី ភេទប្រុស អាយុ២៥ឆ្នាំ មុខរបរមិនពិតស្នាក់នៅមិនពិត ។ ជនសង្ស័យទី២មាន ឈ្មោះ វង់ កក្តដា ភេទប្រុស អាយុ១៩ឆ្នាំ មុខរបរមិនពិត ស្នាក់នៅមិនពិតប្រាកដ ។
តាមចម្លើយសារភាពរបស់ជនង្ស័យបានឲ្យដឹងថាមុនពេលកើតហេតុ ពួកគេបម្រុងជិះម៉ូតូម៉ាកហុងដា ឌ្រីម សង់ ស៊េរី២០១៦ ឡើងតែមស៊េរី២០១៩ ពណ៍ខ្មៅ ពាក់ស្លាកលេខ កំពង់ចាម 1M-3319 បំណងទៅរាំលេងក្លឹប ខណៈមកដល់ចំណុចស្តុបទួលពង្រ ក៏ឃើញបុរសម្នាក់ឈប់ចាំស្តុបក្រហម ដោយនិយាយទូរស័ព្ទ ភ្លាមនោះឃើញឱកាសល្អ ក៏ឆក់យកបានសម្រេចហើយព្យាយាមគេចខ្លួន តែត្រូវប្រជាពលរដ្ឋដេញចាប់បានភ្លាមៗតែម្តង ។
បច្ចុប្បន្នជនសង្ស័យ បានប្រគល់អោយផ្នែកជំនាញ នៃអធិការនគរបាលខណ្ឌពោធិ៍សែនជ័យ ដើម្បីអនុវត្តបន្តតាមនីតិវិធី ៕សុខាសែនជ័យ
