សកម្មភាពបង្កប់អត្ថន័យ និងជាសារសំខាន់របស់មេដឹកនាំ គីម ជុងអ៊ុន

ចែករំលែក៖

មេដឹកនាំកូរ៉េខាងជើង លោក គីម ជុងអ៊ុន បានជិះសេះស ឡើងភ្នំពិសិដ្ឋ ក្រោយពេលកូរ៉េខាងជើង បានប្រកាសកាលពីថ្ងៃទី៤ ខែធ្នូថា នឹងកោះប្រជុំ ថ្នាក់ដឹកនាំសំខាន់នៅក្នុងបក្សកាន់អំណាចកូរ៉េខាងជើង ។ ក្រុមអ្នកឯកទេសវិភាគបានលើកឡើងថា សកម្មភាពខាងលើរបស់កូរ៉េខាងជើង ជាសញ្ញា នៃការត្រៀមលក្ខណៈ ទប់ទល់ ជាមួយចេតនាអាក្រក់ពីខាងក្រៅ ។

កន្លងមកថ្មីៗឧបការីទទួលបន្ទុក បញ្ហាកូរ៉េខាងជើង លោក Stephen Biugun បានលើកឡើងថា ទីក្រុងវ៉ាស៊ីនតោន នឹងមិនបោះបង់កិច្ចពិភាក្សាជាមួយទីក្រុងព្យុងយ៉ាងនោះឡើយ ។ ចំណែកការកំណត់ពេលវេលាចុងក្រោយនៅចុងខែធ្នូ នេះ ត្រូវបានរដ្ឋាភិបាលអាមេរិកចាត់ទុកថាជា«ក្លែងក្លាយ»ហើយព្រមានថា កូរ៉េខាងជើង និងធ្លាក់ចូលក្នុងកំហុសយ៉ាងធ្ងន់ប្រសិនបើបោះបង់កិច្ចពិភាក្សា និងមានសកម្មភាពឌឺដង់នោះ ។ ចំណែកភាគីកូរ៉េខាងជើងវិញបានចោទប្រកាន់អាមេរិក ថាមានចេតនា ពន្យាពេលវេលាតែប៉ុណ្ណោះ មិនមានបំណងពិភាក្សាជាមួយកូរ៉េខាងជើង ដោយស្មោះនោះឡើយ ។

កាលពីថ្ងៃទី៤ ខែធ្នូ មេដឹកនាំកូរ៉េខាងជើង គីម ជុងអ៊ុន បានជិះសេះសឡើងទៅលើកំពូលភ្នំដ៏ពិសិទ្ធិបំផុតនៅក្នុងប្រទេសនេះគឺភ្នំ Paektu រួមជាមួយមន្ត្រីជាន់ខ្ពស់ជាច្រើនរូប ។ រូបភាពស្តីពីការជិះសេះសខាងលើត្រូវបានសារព័ត៌មាន KCNA ផ្សព្វផ្សាយជាសាធារណៈ នៅថ្ងៃទី៤ខែធ្នូ ។

នេះជាលើកទីពីរហើយ ដែលមេដឹកនាំគីម ជុងអ៊ុនឡើងទៅកាន់ភ្នំពិសិទ្ធិនេះ ។ ដំណើរទស្សនកិច្ចនោះធ្វើឡើងក្នុងពេលដែល ទីក្រុងព្យុងយ៉ាង និងវ៉ាស៊ីនតោនដាក់គំនាបគ្នាទៅវិញទៅមក ឲ្យមានការបន្ធូបន្ថយ ដើម្បីឈានដល់កិច្ចពិភាក្សាបញ្ចប់កម្មវិធីបរមាណូ ។ កូរ៉េខាងជើង បានដាក់ឱសានវាទ ចុងឆ្នាំ២០១៩នេះ ហើយពេលវេលាក៏ជិតអស់ហើយ ។

កាលពីដើមខែមេសា លោកគីម ជុងអ៊ុន បាននិយាយថាលោកបានកំណត់ពេលវេលាចុងក្រោយបង្អស់ ដើម្បីពិភាក្សាគឺនៅចុងខែធ្នូខាងមុខនេះ ។ មេដឹកនាំកូរ៉េខាងជើង បានបញ្ជាក់ថា ប្រសិនបើអាមេរិកមិនផ្លាសប្តរូឥរិយាបទ លោកនឹងមានផ្លូវដើរផ្សេងទៀត ។

កាលពីខែតុលាកន្លងមក មេដឹកនាំ គីមជុងអ៊ុន បានទស្សនកិច្ចទៅកាន់ភ្នំ Paektu ហើយដំណើរទស្សនកិច្ចទៅកាន់តំបន់ពិសិទ្ធិគឺជាសារ សំខាន់មួយជូនដល់អាមេរិក ពាក់ព័ន្ធ និងកម្មវិធីបរមាណូ ។

ចំណែកសារព័ត៌មានRodong Sinmum បានបង្ហោះរូបភាព មេដឹកនាំ គីម ជុងអ៊ុន និងភរិយា ញញឹម រីករាយ ពេលឆ្លងកាត់ ព្រិលស នៅលើកំពូលភ្នំយ៉ាងស្រស់ស្អាត ។ នៅជើងភ្នំនោះមាន សណ្ឋាគារ មានទីតាំងពាណិជ្ជកម្ម វប្បធម៌ និងសុខាភិបាល ។

ជាមួយគ្នានេះមេដឹកនាំ គីម ជុងអ៊ុន បានអំពាវនាវដល់អាមេរិក ឲ្យលុបចោលទណ្ឌកម្មសេដ្ឋកិច្ច ដើម្បីពិភាក្សាឈានទៅរកការរំសាយអាវុធបរមាណូ ទាំងស្រុង ៕