សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជាអនិកជនខ្មែរប្រទេសអាមេរិក បណ្តេញចេញមកស្រុកវិញម្នាក់ ត្រូវបានគេប្រទះឃើញដេកស្លាប់ក្នុងបន្ទប់ជួល បង្កការភ្ញាក់ផ្អើលកាលពីវេលាម៉ោង៦ព្រឹក ថ្ងៃទី២៤ ខែធ្នូ ឆ្នាំ២០១៩ នៅបន្ទប់ជួលជាន់ទី៣ ក្នុងភូមិគោកចំបក់ សង្កាត់ចោមចៅ១ ខណ្ឌពោធិសែនជ័យ រាជធានីភ្នំពេញ។
សមត្ថកិច្ចបញ្ជាក់ថា ជនរងគ្រោះមានឈ្មោះ ហេង ហុង ភេទប្រុស អាយុ៤៣ឆ្នាំ ជាអនិកជនខ្មែរ ត្រូវបានប្រទេសអាមេរិកបណ្តេញឲ្យវិលត្រឡប់មកស្រុកកំណើតវិញ អស់រយៈពេលជាង១០ឆ្នាំហើយ មានប្រពន្ធ តែមិនបានរៀបការ ឈ្មោះគឹម អុីតា អាយុ២៨ឆ្នាំ មុខរបរមេផ្ទះ មានកូនប្រុស២នាក់ រស់នៅក្នុងបន្ទុក មានស្រុកកំណើត ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ។
តាមការបំភ្លឺពីស្ត្រីជាប្រពន្ធបានឲ្យដឹងថា ប្តីរបស់គាត់ជាអនិកជនខ្មែរ វិលមកពីសហរដ្ឋអាមេរិក គាត់បានគ្នាជាប្តីប្រពន្ធ ជាង១០ឆ្នាំហើយ ដោយមិនបានរៀបការ ទាំងឪពុកម្តាយមិនពេញចិត្ត មានកូន២នាក់ជាចំណងស្នេហ៍ចិត្តឯង មកជួលបន្ទប់ស្នាក់នៅជាង១ឆ្នាំហើយ ។ ប្រភពដដែលបន្តទៀតថា មុនកើតហេតុ នៅល្ងាចថ្ងៃ២៣ ខែធ្នូ ឆ្នាំ២០១៩ ប្តីរបស់គាត់បានផឹកស្រាស្រវឹង ហើយបានដរ ដួលម្តងហើយ ងើបមិនរួច ត្រូវបានអ្នកជិតខាងជួយគ្រាសែង ឡើងលើផ្ទះ ចូលសម្រាកជាធម្មតា លង់លក់បាត់ទៅ ស្រាប់តែនៅវេលាម៉ោង៦ព្រឹកថ្ងៃទី២៤នេះ ភ្ញាក់ពីដំណេក ដាស់មិនងើប ទើបដឹងថា ប្តីស្លាប់បាត់ ទៅហើយ ក៏រាយការណ៍ប្រាប់អាជ្ញាធរ សមត្ថកិច្ច ទៅពិនិត្យ កោសល្យវិច័យ និងប្រគល់ជូនសាច់ញាតិធ្វើបុណ្យតាមប្រពៃណី ៕ សុខា សែនជ័យ
