បុរសម្នាក់លេងល្បែងកាស៊ីណូចាញ់់លុយអស់គិតខ្លីរត់ចូលរថយន្តកិនស្លាប់ផ្អើលទាំងយប់

ខេត្តស្វាយរៀង៖ បុរសជនជាតិវៀតណាម្នាក់ ខណៈវក់ងប់ងល់នឹងល្បែងកាស៊ីណូលេងចាញ់អស់គូថខោ និងសង្ស័យជំពាក់លុយគេច្រើនបានដាច់ចិត្តរត់ចូលរថយន្តបណ្ដាលឲ្យកិនស្លាប់បង្កការភ្ញាក់ផ្អើលដល់អ្នកភូមិ និងអ្នកធ្វើដំណើរចោមរោមមើល និងរាយការណ៏មកសមត្ថកិច្ចមូលដ្ឋានកាលពីវេលាម៉ោង៨យប់ថ្ងៃទី០៨ ខែមករា ឆ្នាំ២០២០ នៅលើផ្លូវជាតិលេខ១ ត្រង់ចន្លោះគីឡូម៉ែត្រលេខ១៦៦-១៦៧ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។

បើតាមសមត្ថកិច្ចនគរបាលក្រុងបាវិតបានឲ្យដឹងថា បុរសខាងលើមានឈ្មោះ ត្រាន វ៉ាន់ថាន់ (Tran Van Tan ) អាយុ៣១ឆ្នាំ ជនជាតិវៀតណាម មុខរបរមិនពិតប្រាកដ មានទីលំនៅឃុំចាវ៉ឹង ស្រុកថាន់ប៊ិន ខេត្តតៃនិញប្រទេសវៀតណាម ។ ចំណែកអ្នកបើករថយន្តមិនត្រូវបានស្គាល់ឈ្មោះនោះទេ ក្រោយឃើញសភាពការណ៍ មិនស្រួលរត់គេចខ្លួនបន្សល់រថយន្តកុងទឺន័រមួយគ្រឿង ម៉ាក HYUNDAI ពណ៌ស ពាក់ស្លាកលេខ 61C-391.69 ដែលមានសណ្តោងកន្ទុយកុងទឺន័រ ពាក់ស្លាកលេខ 61R-030.83 នៅ និងកន្លែងកើតហេតុ ។

សមត្ថកិច្ចនគរបាលបានបញ្ជាក់ទៀតថា មូលហេតុដោយសារតែជនរងគ្រោះ បានលេងល្បែងចាញ់ នៅកាស៊ីណូមួយកន្លែងអស់លុយក៏បានគិតខ្លីរត់ចូលរថយន្តតែម្ដង ។

បច្ចុប្បន្ន៖សាកសព ត្រូវបានសមត្ថកិច្ចយើងយកមកតម្កល់ទុកនៅវត្តពោធិ៍ថ្មី(ហៅវត្តបាវិត) រង់ចាំក្រុមគ្រួសារសព មកយកទៅធ្វើបុណ្យតាមប្រពៃណី រីឯរថយន្ត សមត្ថកិច្ចយើង យកទៅរក្សាទុកជាបណ្តោះអាសន្ន នៅអធិការដ្ឋាននគរបាលក្រុង បាវិត ដើម្បីកសាងសុំណុំរឿង ចាត់ការតាមច្បាប់ ៕ យឹមសុថាន