ស្វាមីតារាសម្ដែងអ្នកនាង ទ្បោម លក្ខិណា ជួបគ្រោះថ្នាក់ចរាចរណ៍ស្លាប់នៅខណ្ឌពោធិ៍សែនជ័យ

ភ្នំពេញ៖ តារាចម្រៀង និងជាអ្នកសម្ដែងអ្នកនាង ទ្បោម លក្ខិណា បានបង្ហោះសារតាមបណ្ដាញសង្គមហ្វេសប៊ុក ដោយគាត់មានទុក្ខក្រៀមក្រម ខណៈដែលស្វាមីរបស់ខ្លួន គឺលោកប៉ា ចាន់ពិសិដ្ឋ បានជួបគ្រោះថ្នាក់ចរាចរណ៍ វាងរថយន្តពីរគ្រឿងបុកគ្នា បណ្ដាលឲ្យប្តីរបួសធ្ងន់រហូតដល់ស្លាប់ ក្រោយដឹកបញ្ជូនទៅសង្គ្រោះមិនទាន់ដល់មន្ទីរពេទ្យ កាលពីវេលាម៉ោង ៤ និង៣០នាទីទៀបភ្លឺ ឈានចូលថ្ងៃទី១៦ ខែមករា ឆ្នាំ២០២០ ស្ថិតតាមបណ្ដោយផ្លូវបេតុង ក្នុងភូមិព្រៃក្រឡា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

យោងតាមប្រភពពីបណ្ដាញសង្គមហ្វេសប៊ុករបស់អ្នកនាងឡោម លក្ខិណា បានសរសេរថា យើងខ្ញុំជាក្រុមគ្រួសារនៃសព លោក PISETH PA ដែលបានទទួលមរណភាពនៅថ្ងៃព្រហស្បតិ ទី ១៦ ខែមករា ឆ្នាំ២០២០ ដោយគ្រោះថា្នក់ចារាចរ ។ សូមជំរាបជូនដំណឹងដល់ញាតិមិត្តជិតឆ្ងាយនៃសព ដែលយើងខ្ញុំមិនបានទៅអញ្ជើញដោយផ្ទាល់អោយបានជ្រាបថា យេីងខ្ងុំរៀបចំពិធីបុណ្យសព ឋិតនៅវត្តក្រាំងធ្នុង អាស្រ័យហេតុនេះ សូមគោរពអញ្ជើញញាតិមិត្តជិតឆ្ងាយមេត្តាចូលរួមដោយក្កីអនុគ្រោះ ។ ដោយទីតាំងនៅវត្តក្រាំងធ្នុង ជិតបុរីឈូកវ៉ា ៣ សូមអរគុណ ។ សូម បងទៅកាន់ទីស្ងប់សុខរឿងកូនបងកុំបារម្ភ អូននឹងមេីលថែកូនអោយល្អ បងដាច់ចិត្តណាស់ហ៊ានទៅចោលអូនគ្មានផ្តាំផ្ញេីរអីអូនមួយម៉ាត់ ។

ជនរងគ្រោះឈ្មោះ ប៉ា ចាន់ពិសិដ្ឋ អាយុ៣៣ឆ្នាំ មុខរបររត់តាក់ស៊ី រស់នៅបុរីឈូកវ៉ា១ ស្ថិតក្នុងសង្កាត់ក្រាំង ខណ្ឌសែនសុខ រាជធានីភ្នំពេញ មានប្រពន្ធ និងកូន ត្រូវជាស្វាមីរបស់តារាសម្ដែង និងអ្នកចម្រៀងអ្នកនាង ទ្បោម លក្ខិណា ។

គួរបញ្ជាក់ថា មុនពេលកើតហេតុ គេឃើញជនរងគ្រោះបើករថយន្តម៉ាកព្រូស ពណ៌ស ពាក់ផ្លាកលេខ ភ្នំពេញ 2AQ-9139 ដោយធ្វើដំណើរពីត្បូងទៅជើង តាមបណ្ដោយផ្លូវបេតុង បានប៉ះជាមួយម៉ូតូ១គ្រឿង ហើយបើករត់ ត្រូវគេដេញពីក្រោយ ។ លុះមកដល់ចំណុចកើតហេតុ ក៏បានបុកជាមួយរថយន្តដឹកទឹកកក ពណ៌ស ពាក់ផ្លាកលេខ ភ្នំពេញ AK-7485 ធ្វើដំណើរពីជើងទៅត្បូង តាមបណ្ដោយផ្លូវបេតុងពេញទំហឹង បណ្ដាលឲ្យភាគីខាងរថយន្តព្រូស រងរបួសធ្ងន់ ។ ភ្លាមៗនោះ ត្រូវបានរថយន្តសាមុយដឹកយកទៅសង្គ្រោះនៅឯមន្ទីរពេទ្យ តែជាអកុសលដល់ពាក់កណ្ដាលផ្លូវ បានដាច់ខ្យល់ស្លាប់តែម្ដង ។ ទើបរថយន្តដឹកយកមកកន្លែងកើតហេតុវិញ ដើម្បីឲ្យសាច់ញាតិក្រុមគ្រួសារ យកសពទៅធ្វើបុណ្យតាមប្រពៃណី ។

ក្រោយកើតហេតុ សមត្ថកិច្ចជំនាញ បានចុះមកវាស់វែង យករថយន្តទាំង២គ្រឿង ទៅរក្សាទុក រង់ចាំដោះស្រាយគ្នានៅពេលក្រោយ ៕ សុខា សែនជ័យ