សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ក្រសួងសុខាភិបាលបានមកប្រកាសឲ្យមានការត្រួតពិនិត្យដោយបំពាក់ម៉ាស៊ីនស្កែន (Scan)នៅច្រកទ្វារព្រំដែនអន្តរជាតិក្រុងបាវិតខេត្តស្វាយរៀងដើម្បីស្កែនរកមេរោគកូរ៉ូណាប្រចាំការ២៤ម៉ោង ដើម្បីស្កែនភ្ញៀវទេសចរណ៍ជាតិ និងអន្តរជាតិទាំងអស់ដែលចូលមកព្រះរាជាណចក្រកម្ពុជា ។
បើតាមលោកង៉ូវសុខា អនុប្រធានចត្តាឡីសាក់ប្រចាំច្រកទ្វារព្រំដែនអន្តរជាតិបាវិតបានប្រាប់អ្នកសារព័ត៌មានឲ្យដឹងថា នៅច្រកទ្វារព្រំដែនអន្តរជាតិបាវិតបានបំពាក់ម៉ាស៊ីនស្កែនដើម្បីត្រួតពិនិត្យរោគសញ្ញានៃមេរោគផ្លូវដង្ហើមថ្មីឈ្មោះ កូរ៉ូណា គ្រប់ភ្ញៀវទាំងអស់ដែលចូលមកកម្ពុជាពុំទាន់រកឃើញមានភ្ញៀវណាម្នាក់មានផ្ទុកជម្ងឺផ្លូវដង្ហើមថ្មី(កូរ៉ូណា) នៅឡើយទេ ។
ប្រភពបន្តទៀតថា បើតាមការសង្កេតភ្ញៀវចូលមកតាមច្រកទ្វារព្រំដែនអន្តរជាតិបាវិតនេះ មានគ្រប់ជាតិសាសគឺពួកគេមានការយល់ដឹងច្រើនមានពាក់ម៉ាស់ការពារសុវត្ថិភាពប្រមាណ៧០ភាគរយហើយភ្ញៀវដែលពុំមានពាក់ម៉ាសមន្ត្រីចត្តាឡីសាក់ប្រចាំការនៅបញ្ជរច្រកទ្វារព្រំដែនអន្តរជាតិបាវិតបានចែកម៉ាស់ឲ្យភ្ញៀវពាក់ហ្វ្រីដោយឥតគិតថ្លៃ ។
លោកង៉ូវសុខា ក៏បានបញ្ជាក់ផងដែរថា មន្ត្រីចត្តាឡីសាក់ត្រូវបានក្រសួងសុខាភិបាលឲ្យដកកម្លាំងចេញពីច្រកទ្វារព្រំដែនអន្តរជាតិបាវិតនេះអស់រយៈពេលជាង១ឆ្នាំមកហើយទើបតែក្រសួងឲ្យដាក់វិញនៅថ្ងៃទី១១ ខែមករា ឆ្នាំ២០២០កន្លងមកនេះ ។
ការត្រួតពិនិត្យរោគកូរ៉ូណានេះដោយបំពាក់ម៉ាស៊ីនស្កែនគ្រប់ភ្ញៀវទាំងអស់ប្រសិនបើមានរោគសញ្ញាសង្ស័យមន្ត្រីជំនាញនាំភ្ញៀវនោះចូលក្នុងបន្ទប់សុវត្ថិភាពពិនិត្យ និងវាស់កំដៅសារជាថ្មីបើរកឃើញថាវិជ្ជមាន(កូរ៉ូណា) នៅលើភ្ញៀវមន្ត្រីចត្តាឡីសាក់ត្រូវពាក់សំលៀកបំពាក់ការពារសុវត្ថិភាពហើយបញ្ជូនជនរងគ្រោះទៅកាន់អាគារសុវត្ថិភាពឲ្យដេកនៅលើគ្រែពេទ្យដែលមានបំពាក់បំពង់ខ្យល់អុកស៊ីស៊ែន និងមានគ្រូពេទ្យប្រចាំការពិនិត្យតាមដាន និងសង្គ្រោះ ។ បើត្រូវបញ្ជូនជនរងគ្រោះក៏មានរថយន្តសាមុយ១គ្រឿងយកមកពីមន្ទីរពេទ្យបង្អែកស្រុកប្រតិបត្តិជីភូមកប្រចាំការ២៤ម៉ោងដោយមានបំពាក់បរិក្ខារពេទ្យ និងគ្រូពេទ្យត្រៀមប្រចាំការ ៕ យឹម សុថាន
