សារព័ត៌មាន នគរវត្ត តែងតែនាំមុខគេជានិច្ច
បច្ចុប្បន្ននេះបទល្មើសនេសាទនៅបឹងទន្លេសាបខេត្តកំពង់ធំបាននិងកំពុងកើតមានជាបន្តបន្ទាប់ជាធម្មតា ដូចរដូវមុនៗដែរ ។ នៅរដូវប្រាំងនេះបទល្មើសនេសាទបានចូលដល់សកម្មភាពនៃការឆក់ និងអូសអួនដោយប្រើទូកធំៗវិញម្តង ។ បទល្មើសនេសាទនៅតំបន់បឹងទន្លេសាបខេត្តកំពង់ធំបានកើតជាចំហរ ដោយគ្មានការបង្ក្រាបពីសំណាក់មន្ត្រីជំនាញអ្វីឡើយ ផ្ទុយទៅវិញ ពួកអ្នកនេសាទល្មើសច្បាប់បានត្រូវរ៉ូវជាមួយពួកមន្ត្រីជលផល ទើបពួកគេអាចប្រព្រឹត្តល្មើសច្បាប់បានដោយសេរី ។ ប្រភពពីពួកអ្នករកស៊ីខុសច្បាប់ទាំងនោះអះអាងថា ពួកមន្ត្រីជលផលឲ្យតែបានលុយ គឺគេមិនដែលហាមឃាត់អំពីបញ្ហាបទល្មើសអ្វីឡើយ ។
ប្រភពរាយការណ៍ថា នៅតំបន់ដែលសម្បូរត្រីដូចជាភូមិផាត់សណ្តាយ និងពាមបាង ពេលនេះសកម្មភាពនេសាទល្មើសច្បាប់បាននិងកំពុងប្រព្រឹត្តឡើងជារៀងរាល់ថ្ងៃ ។ មន្ត្រីជលផលប្រចាំតំបន់ទាំងពីរចាំតែលើកទូរស័ព្ទពីពួកអ្នកនេសាទល្មើសច្បាប់ដើម្បីទូទាត់ប្រាក់តែប៉ុណ្ណោះ ។ គេអះអាងថា តំបន់ពាមបាងស្ថិតក្រោមអំណាចចាត់ចែងរបស់លោក ហួន ផល នាយសង្កាត់រដ្ឋបាលជលផល និងនៅតំបន់ផាត់សណ្តាយគ្រប់គ្រងដោយលោក យ៉ាន់ វិសាក់ ហៅសែ នាយផ្នែករដ្ឋបាលជលផល ។ វេលានេះគ្មានទេការបង្ក្រាប ពោលគឺឲ្យតែពួកឈ្មួញអ្នកប្រព្រឹត្តល្មើសទូរស័ព្ទប្រាប់ពួកគេមុនចុះនេសាទល្មើសច្បាប់គឺជាការស្រេច ។ ម្យ៉ាងទៀតដោយសំអាងថា វាជារដូវបើកនេសាទ ដូច្នេះគេអាចប្រព្រឹត្តល្មើសបានដោយសេរី ។ សេរីយ៉ាងណា ក៏ត្រូវទូរស័ព្ទទាក់ទងជាមួយលោក ហួន ផល និងលោក យ៉ាន់ វិសាក់ ហៅសែ ជាមុនដែរ ។
បើតាមសេចក្តីរាយការណ៍ប្រាប់ថា ទូកអួនធំៗ ក៏ដូចជាឆក់ត្រីតាមបឹងបួរនានារដូវនេះ ដាច់ខាតត្រូវតែមានទំនាក់ទំនងជាមួយលោកយ៉ាន់ វិសាក់ ហៅសែ និងលោក ហួន ផល ជាដាច់ខាត ។ យ៉ាងហោចណាស់ក៏ត្រូវទូរស័ព្ទប្រាប់អំពីទីតាំងដែលត្រូវចុះធ្វើសកម្មភាពល្មើសច្បាប់នោះដែរ ។ យ៉ាងណាយ៉ាងណីរឿងប្រាក់កាសចាំទូទាត់គ្នាជាក្រោយ ។ ប្រភពរាយការណ៍ថា អាជ្ញាធរខេត្តកំពង់ធំលែងខ្វល់អំពល់អំពីបញ្ហាបទល្មើសនេសាទនេះទៀតហើយ ពោលគឺអនុញ្ញាតឲ្យមន្ត្រីជលផលយ៉ាន់ វិសាក់ ហៅសែ និងហួន ផល ធ្វើអ្វីស្រេចតែចិត្តទៅចុះ ។ ប្រការនេះហើយបានជាលោក ហួន ផល និងលោកយ៉ាន់ វិសាក់ ហៅសែ ធ្វើព្យុះធ្វើភ្លៀងនៅតំបន់បឹងទន្លេសាបដោយគ្មានញញើតនរណានោះឡើយ ៕
