សារព័ត៌មាន នគរវត្ត តែងតែនាំមុខគេជានិច្ច
នៅក្នុងប្រទេសចិន កាលពីថ្ងៃទី១២ ខែកុម្ភៈ ឆ្នាំ២០២០ ត្រូវបានរាយការណ៍ថា មានការធ្លាក់ចុះបន្តទៀតចំនួនករណីអ្នកជំងឺថ្មី ដែលឆ្លងវីរុស ខណៈដែល៩៧នាក់បន្ថែមទៀតដែលបានស្លាប់នោះ ធ្វើឲ្យចំនួនជនរងគ្រោះបាត់បង់ជីវិតទាំងអស់កើនឡើង ១១០០នាក់ ។ បើទោះបីប្រទេសនេះបាននិងកំពុងបិទបណ្តាញចរាចរណ៍ទ្រង់ទ្រាយធំនៅឡើយ ដើម្បីការពារឆ្លងរាលដាលនៃជំងឺនេះ ។
គណៈកម្មការសុខាភិបាលជាតិរបស់ចិន នៅថ្ងៃទី១២ ខែកុម្ភៈ ឆ្នាំ២០២០ បានបញ្ជាក់ថា ករណីជំងឺថ្មី មានចំនួន ២ ០១៥នាក់ គិតក្នុងរយៈពេល២៤ម៉ោង គឺបានធ្លាក់ចុះជាលើកទីពីរបន្ទាប់ពីមួយថ្ងៃមុននេះ មានការធ្លាក់ចុះផងដែរ ។ នៅក្នុងប្រទេសចិន អ្នកជំងឺសរុបមាន ៤៤ ៦៥៣នាក់ ។ ទោះបីជាបែបនេះក៏ដោយ ក៏ក្រុមអ្នកជំនាញនិយាយថា ចំនួនច្រើនដទៃផ្សេងទៀតបានឆ្លង ប៉ុន្តែគេនៅមិនទាន់រកឃើញ ឬរាប់បញ្ចូល ។
អ្នកជំងឺស្លាប់បន្ថែម៩៧នាក់ទៀតធ្វើឲ្យអ្នកជំងឺស្លាប់កើនឡើង ១១១៣នាក់ ។
ការឈប់សម្រាកពិធីបុណ្យចូលឆ្នាំប្រព្រៃណីចិនបានបញ្ចប់ក្រោយការពង្រីកបន្ថែមថ្ងៃឈប់សម្រាកនោះក៏ដោយ ក៏ភាគច្រើនចិននៅបន្តបន្តបិទទីតាំងអាជីវកម្ម ពលរដ្ឋបន្តសម្ងំនៅក្នុងផ្ទះ ខណៈដែលមនុស្សប្រហែល៦០លាននាក់ស្ថិតនៅក្រោមការកំណត់ឲ្យនៅដាច់ដោយឡែកពីគេឯង។
អង្គការសុខភាពពិភពលោក WHO បានដាក់ឈ្មោះផ្លូវការថា COVID-19 ជំនួសឈ្មោះមុនដែលហៅថា 2019-nCoV ហើយនៅខ្មែរយើងត្រូវបានស្គាល់ថា ជាជំងឺរលាកសួតបង្កឡើងដោយវីរុសកូរ៉ូណាថ្មីនោះ ។
ជំងឺនេះផ្ទុះឡើងដំបូងគេនៅក្នុងខែធ្នូ ឆ្នាំ២០១៩ នៅផ្សារលក់អាហារសមុទ្រមួយកន្លែងក្នុងទីក្រុងវូហាន ខេត្តហ៊ូប៉ី ភាគកណ្តាលរបស់ប្រទេសចិន ។
អង្គការសុខភាពពិភពលោក WHO កាលពីថ្ងៃទី១១ ខែកុម្ភៈ ឆ្នាំ២០២០ បានប្រកាសថា ឈ្មោះ «COVID-19» នឹងក្លាយឈ្មោះផ្លូវការរបស់ជំងឺដ៏សម្លាប់មនុស្សនៅក្នុងប្រទេសចិន ។ អង្គការ WHO អះអាងថា ជំងឺនេះ តំណាងឲ្យការគំរាមកំហែងដ៏ធ្ងន់ធ្ងរសម្រាប់ពិភពលោក ។ ប៉ុន្តែ មានភាពប្រកដនិយមថា អាចបញ្ឈប់ជំងឺនេះបាន ។
ថ្លែងទៅកាន់អ្នកកាសែតនៅទីក្រុងហ្សឺណែវ ប្រធានអង្គការសុខភាពពិភពលោក (WHO) លោក Tedros Adhanom Ghebreyesus បានបញ្ជាក់ថា «ឥឡូវនេះ យើងមានឈ្មោះមួយសម្រាប់ជំងឺនោះ ហើយវាត្រូវបានហៅថា COVID-19»។
លោក Tedros បានបកស្រាយអត្ថន័យដូច្នេះថា «CO» មានន័យថា «CORONA(កូរ៉ូណា)» «VI» មានន័យថា VIRUS(វីរុស), «D» គឺជា «DISEASE»(ជំងឺ), ខណៈដែល«19» គឺជាឆ្នាំ គឺថ្ងៃទី៣១ ខែធ្នូ ឆ្នាំ២០១៩ ដែលជំងឺនេះបានឆ្លងរាលដាល។
គួរបញ្ជាក់ថា កាលពីពេលមុននេះ អង្គការសុខភាពពិភពលោក បានដាក់ឈ្មោះបណ្តោះអាសន្នគឺ 2019-nCoV ។ ប៉ុន្តែឈ្មោះផ្លូវការជំងឺនេះ ត្រូវបានផ្លាស់ប្តូរមកជា COVID-19 វិញជាប់ពីពេលនេះតទៅ ។
ជំងឺរលាកសួតបង្កឡើងដោយវីរុសកូរ៉ូណាថ្មី COVID-19 នៅប្រទេសចិន, ប្រទេសក្នុងតំបន់ និងជុំវិញពិភពលោក គិតមកដល់ថ្ងៃទី១២ ខែកុម្ភៈ ឆ្នាំ២០២០ បានឆក់យកជីវិតអ្នកជំងឺនេះសរុប ១ ១១២នាក់, ឆ្លង៤៤ ៧៩៣នាក់ ។ ប៉ុន្តែអ្នកជំងឺ ៤ ៤៦៣នាក់ បានចាកចេញពីមន្ទីរពេទ្យវិញផងដែរ ។ ជំងឺ2019-nCoV នេះក្រុមជំនាញវេជ្ជសាស្ត្រនៅមិនទាន់រកឃើញថ្នាំព្យាបាលជាក់លាក់នៅឡើយទេ ។
យោងតាមការចេញផ្សាយរបស់គេហទំព័រ wikipedia បញ្ជាក់កាលពីថ្ងៃទី១២ ខែកុម្ភៈ ឆ្នាំ២០២០ថា ជំងឺCOVID-19នេះ ផ្ទុះឡើងដំបូងគេនៅក្នុងប្រទេសចិន ហើយវាបានឆ្លងទៅលើមនុស្សសរុប ៤៤ ២៧៦នាក់, ស្លាប់ ១១១០នាក់ និង ៤៤១៣នាក់បានចាកចេញពីមន្ទីរពេទ្យ ។
ក្រៅពីប្រទេសចិន ប្រទេសចំនួន២៨ដទៃផ្សេងទៀត ជំងឺCOVID-19 នេះបានឆ្លងផងដែរ ។ ជាពិសេសនាវាដឹកអ្នកដំណើរមួយគ្រឿង ដែលផ្ទុកអ្នកដំណើរចម្រុះជាតិសាសន៍ និងបាននិងកំពុងដាក់ឲ្យស្ថិតនៅជប៉ុននោះ ជំងឺ2019-nCoV បានឆ្លងមនុស្សកើន១៧៤នាក់ ។ រីឯនៅក្នុងប្រទេសជប៉ុនវិញមានអ្នកជំងឺនេះសរុប២៨ករណី ហើយចាកចេញពីមន្ទីរពេទ្យ៤ករណី ។
ហុងកុងមានអ្នកជំងឺCOVID-19កើនឡើង៤៩ករណី ក្នុងនោះបាត់បង់ជីវិតម្នាក់, សិង្ហុបរី៤៧នាក់, ចាកចេញពីមន្ទីរពេទ្យ៩នាក់, ប្រទេសថៃ៣៣នាក់ ចាកចេញពីមន្ទីរពេទ្យ១០នាក់, កូរ៉េខាងត្បូង២៨ករណី ចាកចេញពីមន្ទីរពេទ្យ៤ករណី, ម៉ាឡេស៊ី១៨ករណី ចាកចេញពីមន្ទីរពេទ្យ១ករណី, តៃវ៉ាន់១៨ករណី ចាកចេញពីមន្ទីរពេទ្យ១ករណី, អាល្លឺម៉ង់១៦ករណី, អូស្ត្រាលី១៥ករណី ចាកចេញពីមន្ទីរពេទ្យ៥ករណី, វៀតណាម១៥ករណី ចាកចេញពីមន្ទីរពេទ្យ៦ករណី, អាមេរិក១៣ករណី ចាកចេញពីមន្ទីរពេទ្យ៣ករណី, បារាំង១១ករណី, ម៉ាកាវ ១០ករណី ចាកចេញពីមន្ទីរពេទ្យ១ករណី, អារ៉ាប៊ីសាអ៊ូឌីត៨ករណី ចាកចេញពីមន្ទីរពេទ្យ១ករណី, អង់គ្លេស៨ករណី, កាណាដា៧ករណី, ហ្វីលីពីន៣ករណី ក្នុងចាកចេញពីមន្ទីរពេទ្យ២ករណី និងស្លាប់មួយករណី, ឥណ្ឌា៣ករណី, អ៊ីតាលី៣ករណី, រុស្ស៊ី៣ករណី, អេស្ប៉ាញ២ករណី, ប៊ែលហ្ស៊ិក១ករណី, នេប៉ាល់១ករណី, ស៊ុយអែត១ករណី, កម្ពុជា១ករណី ចាកចេញពីមន្ទីរពេទ្យ១ករណី, ហ្វាំងឡង់១ករណី ចាកចេញពីមន្ទីរពេទ្យមួយករណី និងស្រីលង្កា១ករណីចាកចេញពីមន្ទីរពេទ្យមួយករណី ។
សរុប អ្នកជំងឺមកត្រឹមថ្ងៃទី១២ ខែកុម្ភៈ ឆ្នាំ២០២០ ឆ្លងសរុប ៤៤ ៧៩៣នាក់, ស្លាប់១១១២នាក់ និងចាកចេញពីមន្ទីរពេទ្យ៤៤៦៣នាក់ ៕
