សារព័ត៌មាន នគរវត្ត តែងតែនាំមុខគេជានិច្ច
ដោយមានការឃុបឃិតពីលោកសុខ សំណាង ស្នងការនគរបាលខេត្តតាកែវ លោក ឃុន យ៉ាន អធិការរងនគរបាលស្រុកសំរោង ខេត្តតាកែវ ត្រូវគេអះអាងថា បានពន្យារអាយុអស់រយៈពេល៣ឆ្នាំមកហើយ ។ ការពន្យារអាយុមិនព្រមចូលនិវត្តន៍របស់លោកអធិការរងនេះ ដោយសំអាងថា គ្មានមនុស្សធ្វើការ ដូច្នេះមានតែប្រើគាត់បណ្តោះអាសន្នសិនទៅ ។ ប៉ុន្តែក្រុមមន្ត្រីនគរបាលស្រុកសំរោង ខេត្តតាកែវ មិនពេញចិត្តចំពោះចំណាត់ការនេះទេ ពីព្រោះថា បើដល់អាយុចូលនិវត្តន៍ហើយនោះ គួរតែអនុវត្តទៅតាមច្បាប់ ។ យ៉ាងណាក៏ដោយ គេអះអាងថា ដោយសារអំណាចខ្សែរយះជាមួយលោកស្នងការ ទើបអាចនៅធ្វើការបាន បើទោះបីជាដល់អាយុចូលនិវត្តន៍ក៏ដោយ ។
ប្រភពពីមន្ត្រីនគរបាលខេត្តតាកែវអះអាងថា លោកអធិការរងស្រុកសំរោងឈ្មោះ ឃុន យ៉ាន តែងតែបានពន្យារអាយុមួយឆ្នាំម្តង ដោយសារការសម្របសម្រួលពីលោក សុខ សំណាងអធិការនគរបាលខេត្តតាកែវ ។ អ្វីដែលធ្វើឲ្យក្រុមមន្ត្រីនគរបាលស្រុកសំរោងហួសចិត្តនោះ គឺការដែលគាត់អាចពន្យារអាយុមួយឆ្នាំហើយមួយឆ្នាំទៀត, ម្តងហើយម្តងទៀត ។ ការដែលគាត់អាចធ្វើយ៉ាងដូច្នេះបាន ក៏ព្រោះតែដោយសារតែមានខ្សែបណ្តោយខ្សែទទឹង យ៉ាងដូច្នោះឯង ។ ពោលគឺបើគ្មានការបិទភ្នែកសម្របសម្រួលពីលោកស្នងការនគរបាលខេត្តទេ ក៏លោកឃុន យ៉ាន គ្មានឱកាសនៅធ្វើការរហូតដល់ទៅ៣ឆ្នាំយ៉ាងដូច្នោះដែរ។
ក្រុមមន្ត្រីនគរបាលស្រុកសំរោងអះអាងថា លោកអធិការរង បើទោះបីជាចាស់បន្តិចមែន ប៉ុន្តែគាត់នៅតែមានកម្លាំងពលំ អាចធ្វើការបាន ។ ហេតុដូច្នេះហើយ បានជាគាត់មិនព្រមចូលនិវត្តន៍ដោយព្យាយាមពន្យារមួយឆ្នាំហើយមួយឆ្នាំទៀតរហូតដល់ទៅ៣ឆ្នាំនោះ ។ បើតាមសេចក្តីរាយការណ៍បានឲ្យដឹងថា លោកឃុន យ៉ាន បានចំណាយសេវាជាច្រើនជូនថ្នាក់ដឹកនាំប្រយោជន៍ដើម្បីបាននៅធ្វើការ និងម្យ៉ាងទៀតថ្នាក់ដឹកនាំនគរបាលខេត្តតាកែវយល់ថា នៅស្រុកសំរោងខ្វះធនធានកម្លាំងនគរបាល ដូច្នេះមានតែឲ្យលោកឃុន យ៉ាន នៅធ្វើការជាបន្តទៅទៀត បើទោះបីជាគាត់លើសអាយុច្រើនហើយក៏ដោយ ។ គេមិនដឹងថា តើជាគោលការណ៍ក្រសួងមហាផ្ទៃអាចឲ្យមន្ត្រីនគរបាលពន្យារអាយុរហូតដល់ទៅ៣ឆ្នាំនោះឬយ៉ាងណាទេ ៕
