សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតីអាមេរិក ដូណាល់ ត្រាំ បានចាប់ផ្តើមបំពេញទស្សនកិច្ចទៅកាន់ឥណ្ឌារយៈពេល ពីរថ្ងៃ គឺនៅថ្ងៃទី២៤ និង២៥ ខែកុម្ភៈ ដើម្បីពិភាក្សាលើបញ្ហាសំខាន់ៗ នៅក្នុងទំនាក់ទំនងប្រទេសទាំងពីរ ។
តាមគម្រោងប្រទេសទាំងពីរ នឹងចុះហត្ថលេខាលើកិច្ចព្រមព្រៀងមានតម្លៃ ជាង៣ពាន់លានដុល្លារ ក្នុងវិស័យការពារជាតិ ក្នុងនោះអាមេរិក នឹងផ្តល់អាវុធទំនើបៗជាច្រើន ដល់ឥណ្ឌា ។ យោងតាមសារព័ត៌មានស៊ិនហួ ចុះផ្សាយឲ្យដឹង នាយប់ថ្ងៃទី២៤ ខែកុម្ភៈ បានឲ្យដឹងថា បន្ទាប់ពីមកដល់រដ្ឋ Gujarat ភាគខាងលិចប្រទេសឥណ្ឌា នាព្រឹកថ្ងៃទី២៤ ខែកុម្ភៈ លោកត្រាំ បានថ្លែងសន្ទរកថាមួយ នៅទីក្រុង Motera ។
លោកនាយករដ្ឋមន្ត្រីឥណ្ឌាបានជ្រើសរើសធ្វើគារវកិច្ចទទួលលោកត្រាំ នៅក្រុងអាមេដាបាដ រដ្ឋ Gujarat ដែលលោកមូឌី ធ្លាប់ជាអភិបាល ជាង១០ឆ្នាំ (២០០១-២០១៤) ។ សិល្បករ ៣ពាន់នាក់បានមកសម្តែងទស្សនីយភាព រាំស្វាគមន៍លោកត្រាំ នៅចំពោះមុខមនុស្សជាង ១១ម៉ឺននាក់ ក្នុងស្តាតគ្រីកេដ៏ធំជាងគេបំផុតនៅលើពិភពលោក ទើបសាងសង់រួច និងជាកិច្ចបើកសម្ពោធស្តាតនេះផង ។
ការទទួលស្វាគមន៍ មានលក្ខណៈអធិកអធមខ្លាំងណាស់ ។ មុនកម្មវិធីទទួលនៅស្តាត មានការដង្ហែក្បួនសិល្បៈ ២៨ក្រុម ជាច្រើនគីឡូម៉ែត្រ តាមគំរូពិធីព្យុះហយាត្រាថ្ងៃបុណ្យជាតិតែម្តង ។ លោកនាយករដ្ឋមន្ត្រីឥណ្ឌា ទទួលលោកត្រាំ ដូចអ្វីដែលអាមេរិកបានទទួលលោក នៅHouston កាលពីខែតុលាឆ្នាំ ២០១៩ ។ លោកម៉ូឌី បានយកការទទួលលោកត្រាំ និងដំណើរទស្សនកិច្ចរបស់លោកនៅអាមេរិក ដើម្បីបង្ហាញសាធារណជនឥណ្ឌាថា ប្រមុខដឹកនាំឥណ្ឌាស្និទ្ធនិងលោកត្រាំ ។
ក្នុងចម្ងាយផ្លូវ២២គីឡូម៉ែត្រ ពីព្រលានយន្តហោះមកដល់កណ្តាលក្រុង ផ្លូវថ្នល់ ចិញ្ចើមថ្នល់ ត្រូវបានបោសសម្អាត លម្អដោយផ្កាភ្ញី តំបន់អនាធិបតេយ្យត្រូវកៀរចេញឬបិទបាំង ដោយផ្ទាំងគំនូរ រូបប្រមុខដឹកនាំទាំងពីរ និង ពាក្យស្លោក “សូមស្វាគមន៍លោកត្រាំ” !
ពិធីស្វាគមន៍ចប់ លោកត្រាំ និងភរិយា អញ្ជើញទៅទស្សនាថ្ងៃលិចនៅវាំង Taj Mahal ដ៏ល្បីល្បាញរបស់ឥណ្ឌា ដែលនៅទីនោះក៏មានបោសច្រាសសម្អាត គ្មានគោ គ្មានស្វា គ្មានឆ្កែអនាថាតាមផ្លូវទៀតទេ ។ សូម្បីតែឆ្នេរទន្លេដែលតាមទម្លាប់គរទៅដោយ សំរាម ក៏ត្រូវបានកាយចេញអស់ ។
ចំណែកសំណុំរឿងសំខាន់ៗ ដូចយ៉ាងសំណុំរឿងពាណិជ្ជកម្ម ត្រូវបានប្រមុខដឹកនាំទាំងពីរលើកយកមកជជែកនៅរដ្ឋធានី ញូវដែលី ។ ដកខ្លួនចេញពីគម្រោងកិច្ចព្រមព្រៀងផ្តោះប្តូរសេរី ១៦ប្រទេសនៅតំបន់ប៉ាស៊ីហ្វិក នៅចុងឆ្នាំ២០១៩ ដោយមិនទុកចិត្តនិងការប្រកួតប្រជែងរបស់ចិន ឥណ្ឌាដែលក្នុងមួយខែៗមានយុវជនប្រមាណមួយលាននាក់រៀនចប់ ចាំរកការងារធ្វើ ចាំបាច់ត្រូវប្រឹងស្វែងរកកិច្ចព្រមព្រៀងពាណិជ្ជកម្មទ្វេភាគីជាមួយអាមេរិកណាស់ ។ ប៉ុន្តែអ្វីៗមិនស្រួលដូចការគិតទេ !
ក្រោយពីបានធ្វើសង្គ្រាមពាណិជ្ជកម្មជាមួយចិន ម៉ិចស៊ិក និងកាណាដា លោកត្រាំ ប្រកាសព្យួរភាពអនុគ្រោះពិសេសជាមួយឥណ្ឌាតាំងពីថ្ងៃទី ៥ មិថុនា២០១៩មក និងដើម្បីឲ្យមានលំនិងពាណិជ្ជកម្ម អាមេរិកបានដំឡើងពន្ធនាំចូលដែកថែប២៥% និងអាលុយមីញ៉ូម ១០%ពីឥណ្ឌា ព្រមទាំងបន្តបន្ទោសឥណ្ឌាថាមាននយោបាយការពារតែប្រយោជន៍សេដ្ឋកិច្ចខ្លួនឯង ។ ជាចម្លើយតប ឥណ្ឌាក៏បានដំឡើងពន្ធនាំចូលផលិតផលអាមេរិកមួយចំនួនវិញ ដើម្បីការពារទីផ្សារក្នុងស្រុក ។
ពាណិជ្ជកម្មទ្វេភាគីឥណ្ឌា-អាមេរិក មានទំហំដល់ទៅ ១៥០ពាន់លានដុល្លារ នៅឆ្នាំ២០១៩ ប៉ុន្តែជញ្ជីងពាណិជ្ជកម្មហាក់ផ្អៀងខ្លាំងមកខាងឥណ្ឌា ( ២៣ពាន់លាន) ។ លោកត្រាំ បានរំលើកអំពីបញ្ហានេះ ជាថ្មី តាំងពីមុនចេញដំណើរមកញូវដាលី ។
តាមការពិត ប្រទេសទាំងពីរ បានចាប់ផ្តើមចរចាពាណិជ្ជកម្ម តាំងពីតែពីដើមឆ្នាំ២០១៨មក ប៉ុន្តែទំនងជាគ្មានឱកាសបានលទ្ធផលភ្លាមៗ ឬក្នុងពេលនេះទេ ។ គ្មានទេការចុះហត្ថលេខាលើកិច្ចព្រមព្រៀងទូទៅមួយ ក្នុងអំឡុងពេលទស្សនកិច្ចរបស់លោកត្រាំថ្ងៃនេះ ព្រោះ ការផ្តោះប្តូរពាណិជ្ជកម្មរវាងមហាយក្សទាំងពីរ នៅមានឧបសគ្គច្រើននៅឡើយ ។ នេះបើតាមការព្យាករណ៍របស់ក្រុមប្រតិភូអាមេរិក ។
ថ្វីបើមានការស្មុគស្មាញខ្លាំងបន្តិចលើវិស័យពាណិជ្ជកម្ម តែខាងផ្នែកសហប្រតិបត្តិការយោធាវិញ ទំនាក់ទំនងអាមេរិក-ឥណ្ឌា រីកលូតលាស់ល្អ ។ អាមេរិកបានក្លាយជាប្រទេសអ្នកផ្គង់ផ្គង់អាវុធលំដាប់ទីពីរសម្រាប់ឥណ្ឌា ។ លោកត្រាំ ត្រូវបង្ហើយកិច្ចព្រមព្រៀងទិញឧត្ថម្ភាគចក្រយោធាជាមួយឥណ្ឌា ។ ដៃគូទាំងពីរ ទំនងជានិងអាចត្រូវរ៉ូវគ្នាលើការពង្រឹងពង្រីក ការទិញសម្ភារៈយោធា ឧស្ម័នរាវរបស់អាមេរិក និងកម្មវិធីនុយក្លេអ៊ែរ អវកាសឬវិទ្យាសាស្ត្រទៀត ។
ក្នុងនាមជាអ្នកមាននយោបាយការពារតែប្រយោជន៍ជាតិឯងដូចគ្នា អាមេរិករបស់លោកត្រាំ ក៏គ្មានជម្រើសអ្វីច្រើន ក្រៅពីត្រូវប្រឹងរក្សាចំណងទំនាក់ទំនងពិសេស-ជាដៃគូយុទ្ធសាស្ត្រជាមួយឥណ្ឌាទេ ព្រោះកាលពីថ្ងៃទី ១១កុម្ភៈ ហ្វីលីពីនបានប្រកាសដកខ្លួនចេញពីកិច្ចព្រមព្រៀងយោធាយុទ្ធសាស្ត្រជាមួយអាមេរិក ដូច្នេះដើម្បីទប់ទល់និងឥទ្ធិពលរបស់ចិន នៅតំបន់អាស៊ី អាមេរិកត្រូវការឥណ្ឌាជាងពេលណាៗទាំងអស់៕
