ម្ចាស់មេដាយមាសអាស៊ី សាលី អ៊ូមើត រំឭកការតស៊ូក្រាញននៀលក្នុងជីវិត ទម្រាំក្លាយជាកីឡាករជម្រើសជាតិម៉ូតូទឹកដ៏មានសក្តានុពល

ភ្នំពេញ៖ បើយោងតាម(CAMSOC) #យើងនាំគ្នាឆ្ពោះទៅស៊ីហ្គេម_អាស៊ានប៉ារ៉ាហ្គេម_ឆ្នាំ២០២៣_ទាំងអស់គ្នា

#កីឡារស់ក្នុងសន្ដិភាព_SPORTS_LIVE_IN_PEACE បានបញ្ជាក់អោយដឹងថា, ដោយរំឭកឡើងវិញនូវការតស៊ូក្រាញននៀលក្នុងជីវិតរបស់ខ្លួន កីឡាករ សាលី អ៊ូមើត ម្ចាស់មេដាយមាសកីឡាអាស៊ីរបស់កម្ពុជា បានលើកបង្ហាញពីដំណើរជីវិតរបស់ខ្លួនខ្លះៗពីភាពអំណត់ព្យាយាមមិនតិចតួចឡើយ ទាំងក្នុងដំណើរជីវិត ទាំងការហ្វឹកហាត់សម្រួចបច្ចេកទេស និងប្រឹងប្រែងអស់ពីសមត្ថភាព ក្នុងការប្រកួតជាបន្តបន្ទាប់ រហូតបានក្លាយទៅកីឡាករប្រកបដោយសក្តានុពល នាពេលបច្ចុប្បន្ន។

នេះជាការលើឡើងរបស់កីឡាករជម្រើសជាតិម៉ូតូទឹកកម្ពុជា នៅក្នុងបទសម្ភាសន៍ថ្មីៗនេះ នៅពហុកីឡដ្ឋានជាតិមរកតតេជោ ក្នុងឱកាសដែលកីឡាកររូបនេះវិលត្រឡប់មកមាតុភូមិ។

«កាលពីដំបូងឡើយ ការចាកចេញរបស់ខ្ញុំពីស្រុកកំណើតទៅប្រទេសថៃ គឺដោយសារមូលហេតុកត្តាជីវភាពខ្វះខាត ដោយចង់ស្វែងរកការងារធ្វើរកលុយនៅទីនោះ។ ខ្ញុំបានជួយធ្វើការងារជូតម៉ូតូទឹកឲ្យបងប្រុសជីដូនមួយរបស់ខ្ញុំ ហើយខ្ញុំឃើញគេជិះម៉ូតូទឹកសប្បាយ ទើបធ្វើឲ្យខ្ញុំចង់ចេះជិះដែរ។ ខ្ញុំតែងតែលួចហ្វឹកហាត់ម៉ូតូទឹកនេះជាមួយបងប្រុសខ្ញុំ ដោយមិនបើកចំហរទេ ព្រោះម៉ូតូទឹកនេះ គឺសម្រាប់តែការហ្វឹកហាត់របស់ជម្រើសជាតិប៉ុណ្ណោះ។ ថ្ងៃមួយ មានការប្រកួតកីឡាករចំណូលថ្មី ហើយខ្ញុំក៏មានឱកាសបានចូលរួមប្រកួតជាមួយគេដែរ។ ក្រោមការលើកស្ទួយពីម្ចាស់ក្លឹបមួយនៅថៃ បានមើលឃើញថា ខ្ញុំមានលក្ខណៈពិសេស និងមានទេពកោសល្យល្អ។ ខ្ញុំត្រូវបានជ្រើសរើសឲ្យចូលរួមប្រកួតជាមួយកីឡាករថៃ ៥នាក់ ហើយកីឡាករថៃទាំង៥នាក់នោះបានធ្លាក់អស់ នៅសល់តែខ្ញុំម្នាក់។ ចាប់ពីពេលនោះមក ខ្ញុំក៏បានព្យាយាមហ្វឹកហាត់អំណត់អត់ធន់ជាខ្លាំង»។ នេះជាការលើកឡើងរបស់ សាលី អ៊ូមើត។

មុននឹងក្លាយជាកីឡាករម៉ូតូទឹកដ៏មានសក្តានុពលក្នុងតំបន់អាស៊ីអាគ្នេយ៍ និងទ្វីបអាស៊ី សាលី អ៊ូមើត គឺជាអ្នកជូតលាងម៉ូតូទឹកឲ្យកីឡាករម្នាក់ជាជម្រើសជាតិថៃ ដែលត្រូវជាបងជីដូនមួយរបស់ខ្លួន។ ក្នុងការងារជាអ្នកមើលការខុសត្រូវ និងថែរក្សាម៉ូតូទឹកឲ្យបងប្រុសជីដូនមួយរបស់ខ្លួន ក្នុងអំឡុងពេលរស់នៅជាមួយឪពុកធំ នៅប្រទេសថៃ អ៊ូមើត អះអាងថា ក្នុងអំឡុងស្នាក់នៅបណ្តោះអាសន្ននោះ ខ្លួនត្រឹមតែជាអ្នកជូតលាងម៉ូតូទឹកប៉ុណ្ណោះ ប៉ុន្តែដោយសារការស្រឡាញ់ និងចង់ចេះប្រភេទកីឡាម៉ូតូទឹកនេះ រូបគេតែងតែហ្វឹកហាត់ ដោយឲ្យបងប្រុសជាកីឡាករជម្រើសជាតិថៃជួយបង្ហាត់បង្រៀន។

កីឡាករ សាលី អ៊ូមើត រៀបរាប់ថា មុនទទួលបានឱកាសចូលហ្វឹកហាត់ជាកីឡាករអាជីពក្នុងក្លឹបម៉ូតូទឹក Flammingo នៅប្រទេសថៃ រូបគេត្រូវបានឪពុកម្តាយរារាំង ដោយទទូចឲ្យត្រឡប់មកកម្ពុជាវិញ។ ប៉ុន្តែដោយក្តីស្រឡាញ់ អ៊ូមើត បានបដិសេធជារឿយៗជាមួយឪពុកម្តាយ រហូតទទួលបានឱកាសចូលហ្វឹកហាត់ពេញសិទ្ធិពីម្ចាស់ក្លឹប រហូតក្លាយជាកីឡាករតំណាងឲ្យក្លឹបចូលរួមប្រកួតជាបន្តបន្ទាប់។ ជាមួយនិងការតស៊ូ ក្នុងការហ្វឹកហាត់ រួមផ្សំនិងទេពកោសល្យផងនោះ អ៊ូមើត បានចូលរួមប្រកួតដណ្តើមមេដាយជូនក្លឹបពីការប្រកួតកម្រិតពិភពលោក នៅក្នុងតំបន់អឺរ៉ុប។

ម្ចាស់មេដាយមាសកីឡាអាស៊ីរូបនេះ បានពន្យល់ទៀតថា កក្តាដែលជំរុញឲ្យរូបគេមានសមត្ថភាពរីកចម្រើន ឈានដណ្តើមបានមេដាយពីការប្រកួតកម្រិតអាស៊ី និងពិភពលោក វាកើតឡើងដោយការអំណត់អត់ធន់ព្យាយាមហ្វឹកហាត់យ៉ាងខ្លាំងក្លា។

គួររំឭកថា កីឡាករ សាលី អ៊ូមើត គឺជាកូនខ្មែរអ៊ីស្លាម កើតនៅស្រុកមេមត់ ខេត្តត្បូងឃ្មុំ ហើយបានក្លាយជាកីឡាករម៉ូតូទឹក តាំងឆ្នាំ២០០៩ ដល់ឆ្នាំ២០២១នេះ មានវ័យ២៩ឆ្នាំ។ សាលី អូមើត បានឈ្នះមេដាយមាសធំៗ កម្រិតពិភពលោកជាច្រើនគ្រឿងជូនក្លឹបម៉ូតូទឹក Flammingo។ អ្វីដែលពិសេសម្រាប់ជាតិកម្ពុជា សាលី អ៊ូមើត បានឈ្នះមេដាយមាស១គ្រឿង និងមេដាយសំរឹទ្ធ១គ្រឿង ពីព្រឹត្តិការណ៍កីឡាអាស៊ី (ASIAN Games) លើកទី១៨ នៅប្រទេសឥណ្ឌូណេស៊ី កាលពីឆ្នាំ២០១៨ ជាមួយនឹងមេដាយមាស១គ្រឿងទៀត ដែលដណ្តើមបានដោយប្រភេទកីឡា ជឺជីតស៊ូ ដោយកីឡាការិនីកូនខ្មែរ-អាមេរិក ខាន់ ជេសា។ មេដាយមាស២គ្រឿង ក្នុងឆ្នាំ២០១៨នេះ គឺជាការបំបែកកណត់ត្រាថ្មីជាប្រវត្តិសាស្ត្ររបស់កម្ពុជា បន្ទាប់ពីមេដាយមាសជាលើកដំបូងរបស់កីឡាការិនីតេក្វាន់ដូ (WT) ស៊ន សៀវម៉ី ក្នុងកីឡាអាស៊ី លើកទី១៧ ឆ្នាំ២០១៤ នៅកូរ៉េខាងត្បួង ដែលនេះជាការបំបែកកំណត់ត្រាជាប្រវត្តិសាស្រ្តរយៈពេល ៦០ឆ្នាំ ក្នុងព្រឹត្តិការណ៍កីឡាដ៏ធំប្រចាំទ្វីបអាស៊ី រៀងរាល់៤ឆ្នាំម្តងនេះ។ ចំពោះព្រឹត្តិការណ៍បន្ទាប់ កីឡាអាស៊ី (ASIAN Games) លើកទី១៩ នឹងធ្វើឡើងនៅប្រទេសចិន នាឆ្នាំ២០២២ ខាងមុខ។ ជាមួយគ្នានោះ គណៈកម្មាធិការជាតិអូឡាំពិកកម្ពុជា បានប្រកាសពីការគាំទ្រដល់ការទទួលធ្វើម្ចាស់ផ្ទះចិន និងត្រៀមខ្លួនចូលរួមប្រកួតប្រជែងមេដាយ នៅក្នុងព្រឹត្តិការណ៍នេះផងដែរ៕

ដោយ៖ សិលា