សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ នៅព្រឹកថ្ងៃពុធទី១៥ ខែកញ្ញា ឆ្នាំ២០២១ លោក ហ៊ុន ណេងសមាជិកគណៈកម្មាធិការអចិន្ត្រៃយ៍រដ្ឋសភា ប្រធានគណៈកម្មការមហាផ្ទៃការពារជាតិនិងមុខងារសាធារណៈនៃរដ្ឋសភានិងជាតំណាងរាស្ត្រមណ្ឌលខេត្តកំពង់ចាម ដឹកនាំក្រុមការងារចុះសួរសុខទុក្ខ ប្រជាពលរដ្ឋម្ចាស់ផ្ទះត្រូវអគ្គីភ័យឆាបឆេះចំនួន១គ្រួសារ មាន១ខ្នងផ្ទះ ស្ថិតនៅភូមិដីលើ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម ។
រួមដំណើរជាមួយលោក ហ៊ុន ណេងរូមមាន ៖ លោក ទូច ឆៃ នាយកប្រតិបត្តិសាខាកាកបាទក្រហមកម្ពុជាខេត្តកំពង់ចាម លោក ទុន ណេត អភិបាលនៃគណៈអភិបាលស្រុកស្ទឹងត្រង់ លោក ទិន ស៊ាង ប្រធានក្រុមប្រឹក្សាឃុំពាមកោះស្នា និងមន្ត្រីរាជការមួយចំនួនទៀត ។
ក្នុងឱកាសនោះដែរលោក ហ៊ុន ណេងបានផ្ដាំផ្ញើដល់អាជ្ញាធរមូលដ្ឋានត្រូវខិតខំជួយដល់ប្រជាពលរដ្ឋដែលកំពុងតែជួបការលំបាកដូចករណីភ្លើងឆេះផ្ទះ ចាស់ជរាគ្មានទីពឹង ប្រជាពលរដ្ឋក្រីក្រជួបការលំបាកជាដើម។ល។
សូមបញ្ជាក់ថា ផ្ទះរងគ្រោះដោយត្រូវអគ្គីភ័យឆាប់ឆេះកាលពីថ្ងៃទី១១ ខែកញ្ញាឆ្នាំ ២០២១នោះ មានម្ចាស់ឈ្មោះ ស៊ន វី ភេទស្រី អាយុ៣៦ឆ្នាំ ជាស្ត្រីមេម៉ាយមានកូនក្នុងបន្ទុកចំនួន៦នាក់ ៕
ដោយ ៖ វណ្ណ:
