សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីតាមការបញ្ជាក់ពីមន្រ្តីជំនាញរដ្ឋបាលជលផលខេត្តព្រៃវែង បានឱ្យដឹងនៅថ្ងៃទី១ ខែកក្កដា ឆ្នាំ២០២២នេះថា៖ ក្រុមការងាររដ្ឋបាលជលផលខេត្ត នៅពេលចុះទប់ស្កាត់ និងបង្ក្រាបបទល្មើសជលផល នៅតាមតំបន់អភិរក្សត្រីមេពូជ ក្នុងភូមិសាស្ត្រខេត្តព្រៃវែង បានរុះរើ និងដកហូតលូស្បៃមុង១១០មាត់ យកមកដុតបំផ្លាញចោលនៅនឹងកន្លែង។
មន្ត្រីជំនាញ បានគូសបញ្ជាក់ថា៖ ចាប់ពីថ្ងៃទី២៧ ដល់ថ្ងៃទី៣០ ខែមិថុនា ឆ្នាំ២០២២ គ្រប់ផ្នែក និងសង្កាត់រដ្ឋបាលជលផល នៃរដ្ឋបាលខណ្ឌជលផលព្រៃវែង បានចុះត្រួតពិនិត្យ និងទប់ស្កាត់បទល្មើសនេសាទ នៅតាមតំបន់អភិរក្សត្រីមេពូជ ដោយបានរុះរើ និងដុតបំផ្លាញចោល លូស្បៃមុង ១១០មាត់ របាំងស្បៃមុង ប្រវែង ៤.៤៩០ម៉ែត្រ បង្គោលចំរឹង ចំនួន២.៧៦០ដើម និងចាក់លែង កូនត្រីចម្រុះ ចំនួន ១០១ គីឡូក្រាម ចូលបឹងធម្មជាតិវិញ។
សូមជម្រាបដែរថា អាជ្ញាធរ និងមន្ត្រីជំនាញនៅតាមបណ្ដាខេត្តជាប់បឹងទន្លេសាប បាននឹងកំពុងតែអនុវត្តបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បង្ក្រាបបទល្មើសនេសាទ ដើម្បីធ្វើឱ្យ ប្រសើរឡើងវិញនូវធនធានមច្ឆជាតិ និងលើកស្ទួយជីវភាពប្រជានេសាទ។
បេីតាមការបញ្ជាក់ពីលោក ជួង សុភា នាយខណ្ឌរដ្ឋបាលជលផលខេត្តបាត់ដំបង បានឱ្យដឹងដែរថា ក្នុងរយៈប្រមាណ៣ខែនៃយុទ្ធនាការបង្ក្រាបបទល្មើសនេសាទ ធ្វើឱ្យបទល្មើសធំៗ ដែលធ្លាប់កើតមាននៅ ក្នុងតំបន់បឹងទន្លេសាបនៃខេត្តនេះ បានរលាយបាត់អស់ គឺនៅសេសសល់តែបទល្មើសតូចតាចប៉ុណ្ណោះ ដែលវាមិនបង្កហានិភ័យធ្ងន់ធ្ងរដល់ធនធានមច្ឆជាតិនោះទេ តែទោះជាយ៉ាងណាក៏ដោយការបង្ក្រាបបទល្មើសនេសាទនៅតែបន្ត។ ក្នុងដំណាក់កាលបន្ទាប់ពីការបង្ក្រាបបទល្មើសនេសាទ គឺការខិតខំធ្វើយ៉ាងណា ឱ្យធនធានមច្ឆជាតិសម្បូរឡើងវិញ ។
ដោយឡែកចំពោះខេត្តកំពង់ឆ្នាំងវិញ ប្រជានេសាទ បានកត់សម្គាល់ឃើញថា បន្ទាប់ពីការបង្ក្រាបបទល្មើសនេសាទ ការនេសាទដោយប្រើប្រាស់ឧបករណ៍ មង សន្ទូច គឺអាចរកត្រីបានច្រើនជាងមុន ដែលពីមុនបានក្នុង១ថ្ងៃតែ១ម៉ឺន ទៅ១ម៉ឺន៥ពាន់រៀលតែប៉ុណ្ណោះ ប៉ុន្តែបច្ចុប្បន្ន ពួកគេអាចរកចំណូលពីការលក់ត្រី ពី៥ទៅ៨ម៉ឺនរៀល ក្នុង១ថ្ងៃ ។ ចំណែកពូជត្រី ដែលមិនឃើញកាលពីឆ្នាំមុនៗ បានមានវត្តមានសារជាថ្មី ដូចជា ត្រីគ្រុំ ត្រីឆ្កោក ត្រីកេះ និងប្រភេទត្រីកម្រផ្សេងៗទៀត៕
ដោយ៖អារុណរះ
