សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់បានតាមទាន់ប្តីកំពុងអង្គុយនេបនិត្យជាមួយស្រីក្មេងក្នុងក្លឹបមួយ បន្ទាប់ពីឆែកមើលតាមប្រព័ន្ធ GPS ក៏ទៅតាមប្តីធ្វើឲ្យ ឈ្លោះទាស់ទែងគ្នាបែកផ្សែងហើយត្រូវសន្តិសុខដេញចេញក្រៅទាំងពីរនាក់ ឯស្រីក្មេងបានរត់គេចបាត់។ លុះពេលប្តីប្រពន្ធ២នាក់នេះនាំគ្នាជិះរថយន្តមកដល់ពាក់កណ្តាលផ្លូវបានឈ្លោះប្រកែកគ្នាម្តងទៀត ត្រូវប្តីវាយប្រពន្ធបែកចិញ្ចើមទើបប្រព្រពន្ធស្រែកទ្រហោរយំរកសមត្ថកិច្ចឲ្យជួយធ្វើអន្តរាគមន៍ ។
ករណីនេះបង្កការភ្ញាក់ផ្អើល កាលពីកាលពីវេលាម៉ោង១និង១៥នាទីរំលងអធ្រាត្រឈានចូល ថ្ងៃពុធ ៤ រោច ខែ មិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៦ ខែធ្នូ នេះ នៅតាមបណ្ដោយមហាវិថីព្រះនរោត្តមកែងនឹងផ្លូវ១៥៤ សង្កាត់ផ្សារថ្មី៣ ខណ្ឌដូនពេញ ។
តាមសម្តីស្រ្តីរងគ្រោះបានប្រាប់ឲ្យដឹងថា រូបគាត់ឈ្មោះ សុខុម អាយុ៣៨ឆ្នាំ មុខរបរមេផ្ទះ ជាប្រពន្ធការពេញច្បាប់ជាមួយប្តីឈ្មោះ សុខ វណ្ណី អាយុ៣៨ឆ្នាំ មុខរបរធ្វើការនៅក្រុមហ៊ុនមួយ ដោយបានរៀបការជាមួយគ្នារយៈពេល១៦ឆ្នាំមកហើយ ដែលពេលនេះ មានកូនស្រីចំនួន២នាក់ កូនបងអាយុ១៣ឆ្នាំ និងកូនពៅអាយុ៨ឆ្នាំ ទៀតផង ។
ស្ត្រីរងគ្រោះបន្តថា មុនកើតហេតុ គឺរូបគាត់បានទៅចូលរួមកម្មវិធីខួបកំណើតមិត្តភក្ដិ ពេលត្រឡប់មកផ្ទះវិញបាត់ប្តីមិនឃើញនៅផ្ទះក៏ទូរស័ព្ទសួរស្រាប់តែប្តីរបស់គាត់ប្រាប់ថា នៅជាមួយមេនៅសង្កាត់ចាក់អង្រែក្រោម តែគាត់មានការសង្ស័យក៏ឆែកមើលGPS ដែលភ្ជាប់នឹងរថយន្តរបស់ប្តីម៉ាកស៊ីណា ពណ៌ស ពាក់ស្លាកលេខភ្នំពេញ 2AB – 2561 ឃើញនៅមុខក្លឹបកម្សាន្ត true face ដែលគាត់និយាយថា ជាក្លឹបលេងថ្នាំក្រវី គាត់ក៏មកតាមនឹងចូលទៅខាងក្នុង ស្រាប់តែឃើញប្តីរបស់គាត់នឹងស្រីស្នេហ៍វ័យក្មេងកំពុងតែហ៊ោកញ្ជ្រៀវសប្បាយ។ដោយទ្រាំមិនបាន គាត់ក៏បានស្រែកឡូឡានឹងឈ្លោះប្រកែកគ្នាពេញក្នុងក្លឹបហើយត្រូវក្រុមសន្តិសុខក្លឹបដេញពួកគាត់ទាំងពីរចេញមកក្រៅ។ បន្ទាប់មកគាត់បានឡើងជិះរថយន្តជាមួយប្តីចេញពីនោះមកដល់កន្លែងកើតហេតុបានឈ្លោះប្រកែកគ្នាម្តងទៀតរហូតមានការប្រតាយប្រតប់គ្នាក៏ត្រូវប្តីរបស់គាត់វាយនឹងកណ្តាប់ដៃ បណ្តាលឲ្យគាត់បែកចិញ្ចើមស្តាំម្ខាង ។
ភ្លាមៗនោះគាត់ក៏បានចុះពីលើរថយន្តមកខាងក្រៅស្រែកហៅសមត្ថកិច្ចមកជួយតែពួកគេ(សមត្ថកិច្ច)មានអ្នកខ្លះស្រវឹង បានចេញ
មុខដែរតែមិនបានជួយដោះស្រាយឲ្យគាត់ទេ ថែមទាំងបានបញ្ចេះប្តីឲ្យបើករថយន្តចេញទៅយ៉ាងរំភើយទៀតផង។បន្ទាប់មកសមត្ថកិច្ចទាំងនោះ បាននាំគ្នាចេញទៅអស់ដែរដោយទុកឲ្យស្ត្រីជាប្រពន្ធមានកម្លាំងទន់ខ្សោយស្រែកយំតែម្នាក់ឯងយ៉ាងកណ្តោចកណ្តែង ៕ ប្រាថ្នា
