សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ដែលបើករថយន្តលឿនក្នុងស្ថានភាពស្រវឹង បុករះរថយន្តនិងម៉ូតូបណ្តាលឱ្យបុរសម្នាក់ស្លាប់និងម្នាក់ទៀតរបួស នៅខណ្ឌជ្រោយចង្វារ នៅថ្ងៃទី០៤ ខែធ្នូ នេះ កំពុងស្ថិតក្រោមការសាកសួររបស់លោក ស៊ិន វីរៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ។
ចន្លោះពេលនេះ ក្រុមជនរងគ្រោះលួចបង្ហើបឱ្យដឹងថា សាច់ញាតិជនបង្ក បោះពាក្យសម្ដីមិនទទួលខុសត្រូវចំពោះជនរងគ្រោះ តែកំពុងរត់ការជាមួយតុលាការ ដើម្បីឱ្យមានការដោះលែង ។ ក្រុមជនរងគ្រោះ កំពុងរង់ចាំចំណាត់ការរបស់តុលាការ តើសម្រេចបែបណាចំពោះករណីនេះ ។ ប៉ុន្តែពួកគេសង្ឃឹមថា តុលាការពិតជាផ្តល់ភាពយុត្តិធម៌ជូនពួកគេ និង ចាត់ការតាមផ្លូវច្បាប់ ចំពោះជនបង្កបទល្មើស ។
នគរបាលសន្និដ្ឋានថា បុរសរូបនេះ បើកបរធ្វេសប្រហែស ខ្ជីខ្ជា មិនប្រុងប្រយ័ត្ន ឬ មិនគោរពកាតព្វកិច្ច បណ្តាលឱ្យស្លាប់និងរបួសអ្នកដទៃ ។
ប្រភពព័ត៌មានបញ្ជាក់ថា ហេតុការណ៍នេះ កើតឡើងកាលពីវេលាម៉ោង២៣៖២០ ថ្ងៃទី៣០ ខែវិច្ឆិកា នៅចំណុចមុខសាលាសង្កាត់ជ្រោយចង្វារ ផ្លូវទន្លេសាប សង្កាត់ជ្រោយចង្វារ ខណ្ឌជ្រោយចង្វារ ។
ជនបង្កមានឈ្មោះ ឆាយ សុផា ភេទប្រុស អាយុ៣៦ឆ្នាំ មានទីលំនៅភូមិបាលីលេយ្យ២ ក្រុងប៉ោយប៉ែត ខេត្តបន្ទាយមានជ័យ បើករថយន្តម៉ាក LEXUS 470 ពណ៌ទឹកមាស ពាក់ផ្លាកលេខ ភ្នំពេញ2Q-0999 ។
ប្រភពព័ត៌មានបញ្ជាក់ថា រថយន្តបើកបរពីត្បូងទៅជើង មកដល់កន្លែងកើតហេតុបុករថយន្តមួយគ្រឿងពីក្រោយ ម៉ាក TOYOTA CAMRY ពណ៌ទឹកប្រាក់ ពាក់ផ្លាកលេខភ្នំពេញ2Q-8385 ។ បន្ទាប់មករថយន្ត LEXUS បន្តបុករះរថយន្តនិងម៉ូតូ៤គ្រឿងទៀត ព្រមទាំងបុកអ្នកថ្មើរជើងម្នាក់ឈ្មោះ សាន់ សុខន ភេទប្រុស អាយុ៣៦ឆ្នាំ ស្លាប់បញ្ជូនទៅមន្ទីរពេទ្យកាល់ម៉ែត ៕ចេស្តា
