សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ ពលរដ្ឋ២នាក់ត្រូវបានសមត្ថកិច្ចឃាត់ខ្លួន ក្រោយពីបានបង្កឲ្យសន្តិសុខរបស់ក្រុមហ៊ុន ចាន់ សុធា ម្នាក់រងរបួសធ្ងន់ រួមនិងរថយន្តពីរគ្រឿងទៀត បានរងនូវការខូចខាត នៅក្នុងជម្លោះដីធ្លីដ៏ក្តៅគគុក រវាងពលរដ្ឋនិងក្រុមហ៊ុន ដែលបានកើតឡើងកាលពីសៀលថ្ងៃទី១០ ខែសីហាកន្លងទៅនេះ នៅចំណុចភូមិតេជោអង្កាញ់ ឃុំតេជោអភិវឌ្ឍន៏ ស្រុកឈូក ខេត្តកំពត។
បើយោងតាមលោកវរះសេនីយ៍ទោ ហែម ចាន់ដារ៉ា មេបញ្ជាការរង និងជាប្រធានមន្ទីរយុត្តិធម៌ នៃកងរាជអាវុធហត្ថខេត្តកំពត បានឲ្យដឹងថា ពលរដ្ឋដែលសមត្ថកិច្ចឃាត់ខ្លួនបានខាងលើ ១.ឈ្មោះ ជា ស៊ីថា ហៅ ចេក ភេទ ប្រុស អាយុ 46 ឆ្នាំ មុខរបរ អ្នកសាព័ត៌មាន អំណាចប្រជាជន, ២.ឈ្មោះ សុខ ពិសី ភេទ ប្រុស អាយុ52 ឆ្នាំ មុខរបរ ជាងមាស អ្នកទាំងពីររស់នៅភូមិតេជោអង្កាញ់ ឃុំតេជោអភិវឌ្ឍន៏ ស្រុកឈូក ខេត្តកំពត។
គួរបញ្ជាក់ថា ការឃាត់ខ្លួនពលរដ្ឋដែលជាជនសង្ស័យខាងលើនេះ បានធ្វើឡើងនៅក្រោយការប៉ះទង្គិចគ្នា រវាងក្រុមប្រជាពលរដ្ឋប្រមាណជា២០នាក់ ដែលប្រដាប់ដោយដំបងនិងពូថៅ ហើយពលរដ្ឋទាំងពីរនាក់ខាងលើជាជនដៃដល់ ក្នុងការបង្កហិង្សាបណ្តាលឲ្យកំលាំងសន្តិសុខក្រុមហ៊ុន និងរថយន្ត បានរងរបួសនិងរងការខូចខាត។
មូលហេតុដែលផ្តើមឲ្យមានអំពើហិង្សារនេះ គឺដោយសារក្រុមប្រជាពលរដ្ឋបាននាំគ្នាមកសាងសង់ផ្ទះនៅលើដីមួយកន្លែង ដែលក្រុមហ៊ុន ចាន់សុធា អះអាងថាជាដីរបស់ខ្លួនហើយក៏បានបញ្ជាឲ្យក្រុមសន្តិសុខទៅឃាត់ប្រជាពលរដ្ឋ ។ សកម្មភាពជជែកគ្នារវាងសន្តិសុខក្រុមហ៊ុននិងពលរដ្ឋ បានបង្កឲ្យមានជម្លោះឡើង រហូតឈានដល់ក្រុមពលរដ្ឋដេញវាយសន្តិសុខ និងស្ទាក់តាមវាយរថយន្តរបស់ក្រុមហ៊ុន រហូតខាងក្រុមហ៊ុនទប់ទល់មិនឈ្នះបាននាំគ្នារត់រៀងៗខ្លួន៕ ហេង សូរិយា
