សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក សន កែវ បានឲ្យប្រភពព័ត៌មានដឹងកាលពីថ្ងៃអាទិត្យ ១១រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៨ ខែកក្កដា ឆ្នាំ២០១៨ថា ស្ត្រីខ្មែរ ៣២ នាក់ដែលត្រូវបានចៅក្រមស៊ើបសួរ សាលាដំបូងរាជធានីចោទប្រកាន់ពីបទជួញដូរមនុស្សដោយឆ្លងដែន និងអន្តរការរវាងអ្នកសុំកូន និងស្ត្រីពពោះកំពុងត្រូវបានឃុំខ្លួនក្នុងមន្ទីរពេទ្យ ដើម្បីងាយស្រួលតាមដាន។
លោកបន្តថា៖ «ស្ត្រី ៣២ នាក់គឺយើងយកគាត់ទៅដាក់នៅមន្ទីរពេទ្យនគរបាល ១៦ ឧសភា ។ ចំពោះករណីនេះផែនការបន្តទៅមុខទៀត ខ្ញុំមិនទាន់ដឹងទេ ដោយសារខ្ញុំមិនទាន់បានទទួល (បទបញ្ជា) នៅឡើយ»។
ពាក់ព័ន្ធនឹងសំណុំរឿងនេះកាលពីរសៀលថ្ងៃទី ២៩ ខែមិថុនាឆ្នាំ ២០១៨ លោក កោ វណ្ឌី ក៏បានចេញដីកាសម្រេចឃុំខ្លួន បុរសចិនម្នាក់ឈ្មោះ LlU QlANG អាយុ ៤៩ ឆ្នាំ ជាមេការ និងស្ត្រីខ្មែរចំនួន ៤ នាក់ទៀតដែលជាមេការនិងជាអ្នកបកប្រែពីបទ «ជួញដូរមនុស្សដោយឆ្លងដែន» និងបទ «អន្តរការរវាង អ្នកសុំកូន និងស្ត្រីពពោះ» យោងតាមមាត្រា ១៦ នៃច្បាប់ស្តីពីការបង្ក្រាបការជួញដូរមនុស្ស និងការពារអនីតិជន និងយោងតាមមាត្រា ៣៣២ នៃក្រមព្រហ្មទណ្ឌដូចគ្នានេះដែរ ។
ពួកគេទាំង ៥ នាក់នេះត្រូវបានសមត្ថកិច្ចចាប់ឃាត់ខ្លួននៅក្នុងប្រតិបត្តិការមួយកាលពីថ្ងៃទី ២១ ខែមិថុនានៅក្នុងផ្ទះមួយនៅខណ្ឌឫស្សីកែវពីបទបង្កើតភ្នាក់ងារស៊ីឈ្នួលពពោះជំនួសខុសច្បាប់ហើយក្នុងពេលចុះបង្ក្រាបនោះ សមត្ថកិច្ចក៏បានរកឃើញស្ត្រីចំនួន ៣២ នាក់ ខណៈពួកគេកំពុងស្ថិតនៅក្នុងដំណាក់កាលមានផ្ទៃពោះ ៕
