សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ ក្រោយពីជួបគ្រោះថ្នាក់ចរាចរណ៍ រងរបួសបាក់ជើងម្ខាង ដោយគ្មានលទ្ធភាព គ្មានលុយព្យាបាល សង្ងំដេកឈឺម្នាក់ឯងអស់មួយសប្តាហ៍ អាការៈកាន់តែឈឺធ្ងន់ទៅ ពលរដ្ឋ អ្នកក្បែរខាងឃើញសភាពមិនស្រួល ពលរដ្ឋជួយហៅរថយន្តសង្រ្គោះរបស់អង្គភាព៧១១ ជួយដឹកយកទៅសង្រ្គោះនៅមន្ទីរពេទ្យ កាលពីវេលាម៉ោង១២និង៣៥នាទីរសៀល ថ្ងៃអាទិត្យ ១១រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៨ ខែកក្កដា ឆ្នាំ២០១៨ នៅភូមិអូរដឹម សង្កាត់ចោមចៅ៣ ខណ្ឌពោធិសែនជ័យ ។
ជនរងគ្រោះឈ្មោះ ម៉ាន់ សារ ភេទប្រុស អាយុ៣២ឆ្នាំ ស្នាក់នៅភូមិអូរដឹម សង្កាត់ចោមចៅ៣ ខណ្ឌពោធិសែនជ័យ ត្រូវបានដឹកបញ្ជូនទៅមន្ទីរពេទ្យព្រះកុសុមៈ ។
តាមពលរដ្ឋរស់នៅក្បែរខាងបានឲ្យដឹងថា ជនរងគ្រោះ មួយសប្តាហ៍ទៅហើយ ក្រោយពីជួបគ្រោះថ្នាក់ចរាចរណ៍ ដោយសារស្ថានភាពក្រីក្រ គ្មានលទ្ធភាពទៅរកសេវាពេទ្យ សុខចិត្តសង្ងំដេកថ្ងួចថ្ងូរម្នាក់ឯង អស់រយៈពេល៧ថ្ងៃ អាការៈកាន់តែខ្លាំងឡើង ទើបដឹងដល់ពលរដ្ឋក្បែរខាង ជួយសម្រួលឲ្យស្នាក់អាស្រ័យ យើយហៅរថយន្តរថយន្តសង្រ្គោះ ដឹកបញ្ជូនទៅមន្ទីរពេទ្យ ៕ សុខាសែនជ័យ
