សារព័ត៌មាន នគរវត្ត តែងតែនាំមុខគេជានិច្ច
បទល្មើសនៃការដឹកជញ្ជូនឈើចេញពីដែនជម្រកសត្វព្រៃភ្នំឱរ៉ាល់ ខេត្តពោធិ៍សាត់ បាននិងកំពុងកើតឡើងជាបន្តបន្ទាប់យ៉ាងគគ្រឹកគគ្រេង ហើយគេដឹងថា មានឈ្មួញពីរនាក់ ដែលជាអ្នកមានសិទ្ធិគ្រប់គ្រាន់ក្នុងការដឹកឈើចេញពីតំបនដែនជម្រកសត្វព្រៃភ្នំឱរ៉ាល់ គឺលោក កោះ សំភី ហៅ ហយ និងលោក ង៉ោ ម៉ៅ ហៅ ចាន់ ឃាង ។ ពួកគេទាំងពីរនាក់មានអំណាច និងសិទ្ធិគ្រប់គ្រាន់ក្នុងការដឹកឈើចេញពីតំបន់ដែនជម្រកសត្វព្រៃភ្នំឱរ៉ាល់ ឆ្លងកាត់ស្រុកនានានៃខេត្តពោធិ៍សាត់ ឆ្លងផ្លូវជាតិលេខ៥ ឆ្ពោះទៅរាជធានីភ្នំពេញ ។ ក្រៅពីនោះ ក៏មានឈ្មួញម្នាក់ទៀត ដែលជាអ្នកមានសិទ្ធិផ្តាច់មុខក្នុងការដឹកឈើចេញពីតំបន់ដែនជម្រកឆ្ពោះទៅខេត្តកំពង់ស្ពឹ ។
ប្រភពរាយការណ៍ថា ង៉ោ ម៉ៅ ហៅ ចាន់ ឃាង ក៏ដូចជា កោះ សំភី ហៅ ហ៊ុំ ហយ ទទួលសិទ្ធិផ្តាច់មុខក្នុងការដឹកឈើចេញពីតំបន់ដែនជម្រកសត្វព្រៃភ្នំឱរ៉ាល់ យកមករក្សាទុកនៅឃុំឈើតុំ ស្រុកក្រគរ ខេត្តពោធិ៍សាត់ ។ ឈ្មួញទាំងពីរនាក់ ធ្វើសកម្មភាពជារៀងរាល់ថ្ងៃ និងបើកចំហរ ដោយមិនខ្លាចសមត្ថកិច្ចនោះឡើយ ។ ពួកគេ មានសិទ្ធិគ្រប់គ្រាន់ ក្នុងការដឹកឈើច្រើនប្រភេទ ដូចជារាជកុល, ផ្ចិក, សុក្រំ និងឈើអារជាច្រើនទៀត ។ ឈើដែលដឹកចេញពីតំបន់ដែនជម្រកសត្វព្រៃភ្នំឱរ៉ាល់ គឺដឹកតាមរថយន្តកែច្នៃ ឬក៏ត្រាក់ទ័រកែច្នៃ ។ បន្ទាប់មក ទើបមានរថយន្តធំៗ របស់ឈ្មួញ ហ៊ុំ ហយ ឬ ង៉ោ ម៉ៅ ដឹកបន្តតាមគោលដៅផ្សេងៗ ។ ឈ្មួញទាំងពីរនាក់នេះ ជាអ្នកមានសិទ្ធិ ដឹកតាមផ្លូវជាតិលេខ៥ ឯឈ្មួញម្នាក់ទៀត ជាអ្នកដែលមានសិទ្ធិផ្តាច់មុខក្នុងការដឹកឈើចេញពីដែនជម្រកសត្វព្រៃភ្នំឱរ៉ាល់ ឆ្លងខេត្តកំពង់ស្ពឺ ឆ្ពោះទៅខេត្តកំពត ចូលទៅប្រទេសវៀតណាម ។
បើតាមសេចក្តីរាយការណ៍ថា សកម្មភាពកាប់ និងដឹកជញ្ជូនឈើនៅតំបន់ដែនជម្រកសត្វព្រៃភ្នំឱរ៉ាល់ បានកើតមានធម្មតា ដូចប្រជាពលរដ្ឋរកស៊ីស្របច្បាប់ប្រទេសទូទៅយ៉ាងដូច្នោះដែរ ។ មន្ត្រីបរិស្ថាន ប្រចាំតំបន់ ជាអ្នកដែលបើកសិទ្ធិឲ្យមានការកាប់បំផ្លាញ ជាប្រព័ន្ធនៅក្នុងតំបន់ដែនជម្រក ។ មន្ទីរបរិស្ថានខេត្តពោធិ៍សាត់ ក្រោមអំណាចគ្រប់គ្រងរបស់លោក ប៉ាន់ មរកត រួមទាំងក្រសួងបរិស្ថានផង មិនដែលខ្វល់អំពល់នឹងដំណើរឆ្ពោះទៅរកមហន្តរាយព្រៃឈើ នៅក្នុងតំបន់ដែនជម្រកនោះឡើយ ។ ហេតុដូច្នេះហើយ បានជាប្រជាពលរដ្ឋទាំងហ្វូងចូលព្រៃដើម្បីកាប់ឈើលក់ឲ្យឈ្មួញ ។ មន្ត្រីបរិស្ថាន រីករាយនៅពេលដែលឃើញ ប្រជាពលរដ្ឋចូលព្រៃ ពីព្រោះបើគ្មានពលរដ្ឋចូលព្រៃទេ ពួកគេគ្មានប្រាក់ដាក់ហៅប៉ៅធ្វើមានបានឡើយ ៕
