សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្សប្រុស ស្រី៤នាក់បានចូលផឹកស៊ីនៅក្នុងហាងដែលមានយីហោអូឌឹមចាស់ ខណៈកំពុងផឹក ស្រាប់តែមានបុរសម្នាក់ទៀតដែលអង្គុយផឹកតុផ្សេងបានមកជល់កែវជាមួយ ថែមទាំងចាប់ដៃចាប់ជើងធ្វើឲ្យបុរសម្នាក់ដែលអង្គុយជាមួយនារីនោះខឹង ទាញកែវវាយទៅវិញទៅមកបណ្តាលឲ្យនារីម្នាក់រងរបួស ។
ហេតុការណ៍នេះបានកើតឡើងកាលពីវេលាម៉ោង៩និង១០នាទីយប់ ថ្ងៃទី២០ ខែសីហា ឆ្នាំ២០១៦ នៅចំណុចហាងផឹកស៊ីមួយកន្លែងដែលមានយីហោ អូឌឹមចាស់ តាមបណ្តោយផ្លូវវេងស្រេង ភូមិត្រូវពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញមនុស្សប្រុស ស្រីចំនួន៤នាក់(ស្រី២នាក់) បានចូលមកផឹកស៊ីនៅខាងក្នុងខាងលើ ខណៈកំពុងអង្គុយតុមួយសន្ទុះក្រោយមក ស្រាប់តែមានបុរសមួយក្រុមមានគ្នា៦នាក់បានចូលមកផឹកស៊ីក្នុងនោះដែរ ដោយអង្គុយតុជិតគ្នា ។
សាក្សីដដែលបានបន្តថា បន្ទាប់មក ស្រាប់តែភាគីខាងបុរសដែលមានគ្នា៦នាក់ ក្នុងនោះមានបុរសម្នាក់បានលើកកែវមកជល់ជាមួយនារី ដែលអង្គុយមានគ្នា៤នាក់ មិនត្រឹមតែប៉ុណ្ណោះ បានចាប់ដៃ ចាប់ជើងហាក់ដូចជាស្គាល់គ្នា តែនារីនោះបានប្រកែកថា មិនដែលស្គាល់ទេ ធ្វើឲ្យបុរសដែលអង្គុយជាមួយនោះ មានចិត្តប្រចណ្ឌហើយបានប្រាប់ទៅបុរស២នាក់ដែលមកជលកែវជាមួយនោះឲ្យទៅអង្គុយតុវិញ ។ ក្រោយមកបុរសទាំង២នាក់នោះ ក៏បានទៅអង្គុយនៅតុវិញហើយបានប្រើពាក្យឌឺដងធ្វើឲ្យភាគីខាងប្រុស ស្រី៤នាក់នោះខឹងក៏តបតបង្កជាហិង្សាដាក់គ្នាបោកដប និងកែវបណ្តាលឲ្យនារីម្នាក់រងរបួសត្រូវដៃម្ខាង ។
សាក្សីដដែលបានបន្តទៀតថា ខណៈភាគីទាំងសងខាងកំពុងវាយគ្នានោះ គេបានឮសំលេងដូចជាផ្ទុះអាវុធមួយគ្រាប់ធ្វើឲ្យភាគីទាំងសងខាង បែកចេញពីគ្នា ។ ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ និងឃាត់បុរស២នាក់(ភាគីខាងមានគ្នា៦នាក់)យកទៅទីស្នាក់ការនគរបាលប៉ុស្តិ៍ចោមចៅដើម្បីសាកសួរ និងកសាងសំណុំរឿងបញ្ជូនទៅអធិការដ្ឋាននគរបានខណ្ឌពោធិ៍សែនជ័យរង់ចាំដោះស្រាយតាមច្បាប់ ៕ សុខាសែនជ័យ
