ភ្នំពេញ៖ ដោយអនុត្តន៍តាមបទបញ្ជាពីលោក ប៉ឹល កុសល អភិបាល នៃគណៈអភិបាលខណ្ឌ សែនសុខ លោក សាំង សុភៈវិចិត្រ អភិបាលរងខណ្ឌសែនសុខ បានដឹកនាំកម្លាំងចម្រុះចុះដាក់គោល ដៅត្រួតពិនិត្យ និងឃាត់រថយន្តដឹកដី ដឹកខ្សាច់ ប្រមាណជាង ១០គ្រឿង ដែលល្មើសច្បាប់ចរាចរណ៍ ធ្វើការអប់រំ ។
ប្រតិបត្តិការណ៍ដាក់គោលដៅត្រួតពិនិត្យរថយន្តដឹកដី ដឹកខ្សាច់នេះ ធ្វើឡើង នៅតាមបណ្តោយផ្លូវភ្នំពេញហាណូយ ( ១០១៩ ) កែងនិងផ្លូវចូលមណ្ឌលឪកាសខ្ញុំ ស្ថិតក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ កាលពីរសៀលថ្ងៃទី៦ ខែកញ្ញា ឆ្នាំ២០១៦ ។
លោក សាំង សុភៈវិចិត្រ ប្រាប់ឲ្យដឹងថា បន្ទាប់ទទួលបានបទបញ្ជាពីលោក ប៉ឹល កុសល អភិបាលខណ្ឌសែនសុខ លោកបានដឹកនាំកម្លាំងចម្រុះ ចុះដាក់គោលដៅ ដើម្បីត្រួតពិនិត្យរថយន្តដឹកដី ដឹកខ្សាច់ រកមើលឯកសារនានាពាក់ព័ន្ធរថយន្ត និងប័ណ្ណបើកបររបស់អ្នកបើកបរផងដែរ ។ ការធ្វើបែបនេះ គឺដើម្បីចូលរួមអនុវត្តន៍ច្បាប់ចរាចរណ៍ផ្លូវគោក នៃព្រះរាជាណាចក្រកម្ពុជា ។
លោក សាំង សុភៈវិចិត្រ ប្រាប់បន្តឲ្យដឹងថា កន្លងមកដោយមើលឃើញពីភាពអណាធិបតេយ្យ នៃរថយន្តដឹកដី ដឹកខ្សាច់ទាំងនេះ ចេះតែបង្កផលប៉ះពាល់ផ្សេងៗដល់បរិស្ថាន ក៏ដូចជាប្រជាពលរដ្ឋ រស់នៅក្នុងមូលដ្ឋាន ទើបលោកសុំបញ្ជាពីថ្នាក់លើ ចុះត្រួតពិនិត្យរកមើលឯកសារនានាពាក់ព័ន្ធរថយន្ត និងប័ណ្ណបើកបររបស់អ្នកបើកបរផងដែរ ។ ដោយឡែកសម្រាប់ថ្ងៃនេះ គឺកម្លាំងចម្រុះរបស់លោកគ្រាន់ ត្រួតពិនិត្យឯកសារនានា និងធ្វើការអប់រំប៉ុណ្ណោះ ចំណែកថ្ងៃបន្ទាប់ទៀត នឹងបន្តដាក់គោលដៅ ដើម្បីរឹតបណ្តឹងច្បាប់ចរាចរណ៍ឲ្យកាន់តែតឹងរឹងជាងនេះ ៕ តុង សីហា
សារព័ត៌មាន នគរវត្ត តែងតែនាំមុខគេជានិច្ច
