សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្តីពីការរឹតបន្ដឹងច្បាប់ចរាចរណ៍ផ្លូវគោក នៅថ្ងៃទី២៥ ខែមីនា ឆ្នាំ២០២៥ បានបង្ហាញពីរបាយការណ៍លទ្ធផលរយៈពេល ២៥ថ្ងៃ ពោលគឺចាប់ពីថ្ងៃទី១-២៥ ខែមីនា ឆ្នាំ២០២៥នេះ កម្លាំងសមត្ថកិច្ចជំនាញចរាចរណ៍នៅទូទាំងប្រទេសកម្ពុជា បានរកឃើញយានយន្តល្មើសសរុបចំនួន ៧,៨៨៦គ្រឿង, ក្នុងនោះ មានរថយន្តធំ ៤៨គ្រឿង, រថយន្តតូច ២,៦៩៦គ្រឿង និងម៉ូតូ ៥,១៤២គ្រឿង ត្រូវបានផាកពិន័យតាមអនុក្រឹត្យ លេខ ៣៩.អនក្រ.បក នៅទូទាំងប្រទេស ។ ខណៈយានយន្តជិះចូលគោលដៅចំនួន ១១,០០៩គ្រឿង, រថយន្តធំ ១១២គ្រឿង, រថយន្តតូច ៣,៩៩៥គ្រឿង, ម៉ូតូ ៦,៩០២គ្រឿង ។
ជាមួយគ្នានេះ នាយកដ្ឋាននគរបាលចរាចរណ៍ ក៏បានបង្ហាញពីលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោកប្រចាំថ្ងៃ ខណៈកម្លាំងសមត្ថកិច្ច រកឃើញយានយន្តល្មើសចំនួន ៣០៨គ្រឿងទៀត ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស។
ក្នុងប្រតិបត្តិការខាងលើនេះ ពោលគឺ (គិតត្រឹមពីម៉ោង ១៤៖០០ ថ្ងៃទី២៤ ខែមីនា ឆ្នាំ២០២៥ ដល់ម៉ោង ១៤៖០០ ថ្ងៃទី២៥ ខែមីនា ឆ្នាំ២០២៥) បានឲ្យដឹងថា ចំនួនគោលដៅសរុប ២០៩គោលដៅ មានយានយន្តចូលគោលដៅចំនួន ៤០៨គ្រឿង, រថយន្តធំ ១គ្រឿង, រថយន្តតូច ១៤១គ្រឿង និងម៉ូតូ ២៦៦គ្រឿង ក្នុងនោះរកឃើញ យានយន្តល្មើសសរុបចំនួន ៣០៨គ្រឿង, រថយន្តធំ ១គ្រឿង, រថយន្តតូច ១០៥គ្រឿង និងម៉ូតូ ២០២គ្រឿង ត្រូវបាន ផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស ។
របាយការណ៍ដដែល បានវាយតម្លៃថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្ត ល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍យ៉ាងល្អប្រសើរ៕
ដោយ៖ តារា
